Mantá Tanla 10:20-32

²⁰Junni cupato, yalaca quirabi jide! Junni natiya jele tituto, yalabe pejiniina! tiyoe tinue. Israelita itotonan, la mantaca jun jalaie tinue.

²¹Junni Diosichi Tenca Pédrobe tsantinunsi, Pedro patinue janamin tsachilaca quirabi. Junto yalabe itsantinue: —La nula neyananun tsachi joyoe tinue. ¿Niyaito jalainayun? tinue.

²²Junni Cornelio ereca junla beconan pato itsanlatinue: —Capitan Cornelio chiquilaca eree latinue. Aman yari seque quimin joe latinue. Diosica respetaito jeleramin jonan, piyanle israelítalanan yaca sen joe timinlae latinue. Junni Diosichi anjeli Cornéliobe cuenta quito, nuca jasa caride! tie latinue. Nuri Cornéliochi yaca jato, micarino joe tie latinue yape ya merása.

²³Junni Pedro yalaca meráto, tamochi wiyato, mile chudilaide! tinue. Junni ayuna nanchi Pedro yalabe pejinue. Aman Jesucrístobe penenamin israelítalanan pejilainue Jópebi chuminla.

²⁴Junni junhayuna nanchi Pédrola Cesaréabi felainue. Junnasa Cornelio yachi familailaca, amicolaca jera layasuwato méraminlanue.

²⁵Junni Pedro tamochi winasanan, Cornelio quirabi jato, yachi cale telenhinue Diosichi cale cuwenta.

²⁶Pedro mantimini yaca manwirucarito itsantinue: —Manwiruide! Lari tsachiri joyoe tinue.

²⁷Tsantitobi, Pédrobe Cornéliobe cuenta quede parejo wilainue. Wito quiranari, duque tsachila layaica jominlanue.

²⁸Junni Pedro yalabe itsantinue: —Nulari israelítala itotonan, israelítalaca miralarae tinue. Chiquilachi mite israelita itonlabe natiya penenano itolajoyoe. Israelita itonlachi yabi winotiya itolajoyoe tinue. Tsan josanan Diosi laca uyan quiraque manmicaricae tinue. Amana mirayoe tinue. Uyan tsachilaca nin epe joe nin chiran joe tituntsan joe tinue. Diosi ya cuwaca animalilaca chiran titude! tinato, laca micarie tinue yachi tsachilacanan chiran tituntsan joeque.

²⁹Jun tenchi laca jasa tinan, lari natiya jele tituto janiiyoe. Junto lachi miino muquee tinue ¿niyaque laca munarato jasa tiyun?

³⁰Junni Pédrochi fiquica meráto, Cornelio itsantinue: —Junpalu ma poleca lachi yabi chuniramanyoe tinue. Junto Diosibe rocaino órate ano fitunca ito rocainamanyoe tinue tre de la tardete. Aman Diosibe rocainasanan, tsaracari fibaquin camisa pun tsachi quiraie tinue.

³¹Lachi cale wiruito, itsantie tinue: Cornelio, Diosi nu rocainunca meránae tie tinue. Poperelachi ticatiya cuwamin jonun tenchi nuca mantenhinae tie tinue.

³²Junni tsachilaca Jópeca erede! Jun pueblobi Simón Pédroca neyasa caride! Aman Pédrori quidoca cato se suwamin Simónchibi chue tie tinue lamari quelote. Junni Pedro jato nuca micarichunae tie tinue.