LOS HECHOS 10:20-32

²⁰Dingattjen co dania co nchedudaha de sattjiho xa ixin janha rroanha chojni yá.

²¹Cottimeja Pedro vania tti te chojni rroanha Cornelio, co Pedro ndache na: ―Janha tti tettjé ra. ¿Quehe rinao ra?

²²Jehe na ndac̈ho na: ―Coetonna na ná xicapitán dinhi Cornelio. Jehe ná xí jian que ditticaon Dios co cainxin chojni judío chondehe na respeto co rinao na xa. Mé ná ángel de Dios joí co ndac̈ho ngain xa ixin rrorroanha xa joajna para que soixin tsji ndoha xa co jehe xa tsinhi xa tti soixin rrondache xa.

²³Cottimeja Pedro ndache na para vixinhi na nchia. Co ttie mé vittohe na nttiha. Nchanho yoxin Pedro sajoicao na conixin icanxin chojni que vaguitticaon Jesús que vintte ciudad de Jope.

²⁴Ndoexin joiji na ciudad de Cesarea. Nttiha Cornelio joichonhe conixin nindoha co chojni que navacaoxon, cain nimé vayé Cornelio para que chonhe na nijoirroé Pedro.

²⁵Are Pedro joiji nchiandoha, Cornelio vac̈hje para chjé joajna co vettoxin nttajochjihi para rrojinchesayehe.

²⁶Pero Pedro joinchengattjen co ndache: ―Dingattjen. Caixon janha ná xí na inchin jaha.

²⁷Co are jehe na nichjé chó na, joixincaho chó na nchia, co nttiha dixejo tsje chojni.

²⁸Cottimeja Pedro ndache na: ―Jaha ra noha ra ixin chojni judío c̈hoha ẍatte ngain chojni jé ni dixinha nchiandoha na. Pero Dios cjoagohna janha ixin irrondac̈hjanha ixin ẍonhi chojni o cosa ttjoaha.

²⁹Mexinxin are joiji chojni que jaha ra rroanha ra, toin sajoihi co ẍonhi joanchianguia na. Mexinxin, jaxon rinaho tsonona quedonda vayahna ni ra.

³⁰Cottimeja Cornelio joattehe: ―Jai vittja nó nchanho janha nttihi nchiania jointtacoanxian Dios are otsocjin, co hora mé ẍa joineha ixin jointtasayá Dios. Are mé vicon ná xí que jingá ná lontto jidaquín.

³¹Co xí mé ndachjenji na xa: “Cornelio, Dios coinhi ixin jaha nichjehe co ẍaxaon tti nchehe jaha para ttjenguijna cain chojni noa.

³²Mexinxin rroanha jaha joajna ciudad de Jope para tsí Simón, tti xí que dinhi Pedro cai. Xí mé jí xa ndoha iná tti dinhi Simón, pero mé datse roé co, co nchiandoha jí nchia chiaon c̈hica ndachaon. Are tsí Simón Pedro, jehe rronichjaha jaha.”