Maku 9:2-43

²Morarame 6me tõmehse ahtao, typoetory tõ tarose ypy kae tokõ pona. Peturu te, Tiaku te, João, enara toh tarose eya. Moroto tanyhtase ynororo.

³Zupõ saereme toehse, karimutume konõto toehse, emero ikurikasenã motye toehse, karimutume kuhse.

⁴Morarame Eria tõ tooehse Moeze maro, pake Ritonõpo omi poe urutonõpo tomo. Mame toto neneryme Jezu maro oturũko toh kynexine.

⁵Morarame toto eneryke tyya ynara tykase Peturu, —Jezu, kure reh taro sytatohse. Tapyi pitiko ynanamoxi oseruao axĩtao rokene, toiro atapyĩme, toiro Moeze tapyĩme, toiro roropa Eria tapyĩme, enara ehtohme, tykase ynororo eya.

⁶Tõserehse toexiryke morara tykase Peturu.

⁷Mame Jezu tõ otururuhtao ro akurũ tooehse. —Umũkuru nymyry mosero, Umũkuru kurano. Mose omiry etatoko, tykase Ritonõpo akuru htae.

⁸Morarame, —Ỹkae enexi ropa, tykase toh repe. Toto esahpyry pona rokẽ tõsenuhmase toto. Jezu rokẽ moroto, toto esahpyry po.

⁹Morarame tyhtorykõ ropahtao ypy poe ynara tykase Jezu typoetory tomo a, —Kapu ae Ayhtohpyry ase. Ajohpãme sã ynaenetopõpyry oya xine onekãtopyra ehtoko aporo. Jorihxĩpo tõsemãse ropa jahtao rokẽ mekarotatose, tykase ynororo typoetory tomo a.

¹⁰Morara exiryke onekãtopyra tokurehse toto. Oxime rokẽ tõturuse toto. —Otara nykã hkoty, “Jorihxĩpo tõsemãse ropa jahtao rokẽ mekarotatose,” nykano, tykase toto oxime rokene.

¹¹Morarame tõturupose ropa toto Jezu a, —Oty katoh Moeze omihpyry warõkõ ynara ãko nae, “Eria osemazuhme oehnõko mana. Okomino Ritonõpo nymenekahpyry,” ãko toh nae? tykase toto Jezu a.

¹²Ynara tykase Jezu eya xine, —Ajohpe pyra. Oehnõko osemazuhme mana imehnõ tuarõtanohpotohme Ritonõpo poko, toto a Ritonõpo enetupuhtohme repe. Yrome Eria tooehse. Mame taosanumase toto a iiryhmary se toexirykõke. Ritonõpo omi poe urutõ nymerohpyryae ro tyhtomase eya xine. Etatoko pahne. Oty katohme roropa ynara ãko Ritonõpo omihpyry, “Kapu ae Ayhtohpyry etuarimãko mana itamurume. Irumekãko roropa mã toto” ãko Ritonõpo omiry nae? tykase Jezu eya xine.

¹⁴Morarame tyhtose ropa tahtao, typoetory tõ maro, imoihmãkõ tonese. Moeze omihpyry warõkõ maro oseosezuhnõko toh kynexine.

¹⁵Mame Jezu tonese tyya xine ahtao tãtãkyemase toto imoihmãkomo. Eya toytose toto axiny, aomikase.

¹⁶Mame Jezu tõturupose eya xine, —Oty poko oseosezuhnõko matokene mokaro maro? tykase Jezu eya xine.

¹⁷Toirono a Jezu tozuhse, —Umũkuru enehno oya repe jorokohpe exiryke. Tunurẽkara sã roropa mana.

¹⁸Ayaytoryhtao emapõko mã joroko nono pona. Mame akuakurotãko mana. Taryhtaryh ãko mana. Etoetopohmãko roropa mana. “Joroko itũtanohpoko ropa,” yka repe opoetory tomo a. Yrome onutũtanohposaromepyra toh kynako, tykase ynororo Jezu a.

¹⁹Morarame ynara tykase Jezu eya xine, —Otara ahtao jenetupuhnõko matou? Amaro xine ase repe ãmorepatorỹko. Okynã amaro xine ywy repe. Yrome jomiry onenetupuhpyra ro amarokomo. Omũkuru enehta xiaro yneneryme, tykase Jezu eya xine.

²⁰Mokyro tarose toto a Jezu neneryme. Jezu eneryke tyya mokyro tytotytopohmapose joroko a. Toepukase ynororo nono pona. Tõsẽtoritorimase. Takutakurotase roropa ynororo.

²¹—Pake serara nah? tykase Jezu kurãkara zumy a. —Pake moinoro nase serara, pitiko ro tahtao.

²²Tuhke rokẽ apoto htaka tomapose nase joroko a. Nakuaka roropa tomapose aorihtohme repe. Ikurãkary waro awahtao umũkuru ikurãkako, yna pyno awahtao, tykase jorokohpã zumy Jezu a.

²³Ynara tykase Jezu eya, —Enetuputyryhtao oya emero riry waro ase Ritonõpo poe. Wenetupuhko pahne, tykase Jezu jorokohpã zumy a.

²⁴Morara kary etaryke tyya tosenakũnuhse, —Enetupuhnõko ase! Wakorehmako oenetupuhtohme nymyry ya, tykase ynororo tyxitaryme.

²⁵Morarame imoihmãkõ atanonopyryke tymyhtokoxi, ynara tykase Jezu joroko a, —Tunurẽkara mase joroko, typanare pyra roropa mase. Mose ae otũtako ropa jũme, tykase ynororo.

²⁶Kui tykase joroko tykytyky tykamexipose tutũtaryme. Mame aorikyhpyry sã toehse ynororo joroko esahpyo. Moro eneryke tyya xine, —Norihno hro, tykase imoihmãkomo.

²⁷Mame tanỹse ropa Jezu a tomary ke. Towõse ropa.

²⁸Morarame tapyi taka tomõse ahtao, ipoetory tõ tõturupose Jezu a, —Oty katohme joroko tũtara kynako yna omipohna? tykase toto Jezu a.

²⁹Ynara tykase Jezu, —Joroko tõ tũtara oturupyra awahtao xine Ritonõpo a. Morara exiryke tũtara kynako, tykase.

³⁰Morotoino toytose toto Karirea rãnakuroko. Tokare pyra toytory se Jezu typoetory amorepatohme.

³¹Mame ynara tykase ynororo typoetory tomo a, —Kapu ae Ayhtohpyry ase. Yrome jewokãko toh mana ahno a jorihmapotohme. Mame taorihmapose jahtao ẽsemãnõko ropa ase oseruao tõmehse ahtao, tykase Jezu typoetory tomo a.

³²Zuaro pyra sã ipoetory tõ kynexine. Yrome oturupopyra toh kynexine aomihpyry poko tyhxirorykõino.

³³Morarame Kapanaũ pona toytose toto. Tapyi taka tomomyryhtao tõturupose typoetory tomo a Jezu, —Oty poko moturutou osemae? tykase toto a ynororo.

³⁴Yrome onezuhpyra toh kynexine, tõsezusezuhse toexirykõke tamuxime toehtohkõ poko.

³⁵Mame typorohse tahtao typoetory tõ tykohmase tyya, 12mãkomo. —Tuisame se oexirykõ se awahtao xine imehnõ akorehmatoko, tykase Jezu eya xine.

³⁶Mame poeto pitiko tyrise eya toto rãnaka, xikihme. Mame tonaka tyrise eya eahmatohme. Ynara tykase ynororo,

³⁷—Poeto pyno awahtao xine ypoetoryme aexiryke ypyno roropa matose. Morararo ypyno awahtao xine ywy ro rokẽ kara pyno matose. Ritonõpo maro roropa yna pyno matose, jenehpohpõme Ritonõpo exiryke, tykase ynororo eya xine.

³⁸Mame ynara tykase João, —Jezu, imepỹ ynanenease joroko tõ tũtanohpõko oesety poe. Morara kamexipopyra ynanexiase eya kymaro xine pyra aexiryke, tykase ynororo repe.

³⁹Yrome ynara tykase Jezu eya, —Ah joroko tõ tũtanohpo ropa jesety poe. Imepỹ kurãkary waro tahtao jesety poe kure ymaro mana. Ykerekeremara mana.

⁴⁰Imehnõ kyzehno xine pyra ahtao kuakorehmatorỹko mana.

⁴¹Etatoko pahne, imepỹ tuna ekaroryhtao õkurukõme ypoetoryme oexirykõke epehmary poko wenikehpyra Ritonõpo mana.

⁴²—Yrome imepyny a jenetupuhkehporyhtao poetohti a jomiry enetupuhpitoryhtao eya xine, kurehxo mokyro pymyry ae topu konõto mykyry, ematohme nakuaka inerytohme. Ahtao poetohti onenekunohpyra mana.

⁴³Mame oemarykomo a popyra orirykohtao osemahkatoko! Kurehxo oya xine etone tomahke awahtao xine Ritonõpo esaka omõnõko matose. Popyrahxo oya xine oemarykõ osetato ahtao apotoimo htaka rokẽ omõnõko matose, ezehpỹ htaka.