Maliku 9:2-43

²Zatapita ntsiku zitanthatu, Jezu adatenga Pedru, Tiyagu na Juwau, acikwira nawo kuphiri litali kwa okha. Ndipo adasandusidwa Jezu pamaso pawo.

³Bzakubvala bzace bzidasanduka bzicena, bziciyetima kuti mbe, kuposa momwe wakufula ali-yentse pa dziko angadacenesera.

⁴Nthawe imweyo wakupfundzira wale adawona Eliya na Mozeji, alikuceza na Jezu.

⁵Pedru adauza Jezu kuti, “Misiri, n'bzabwino kuti ife tikhale pano. Timange bzikumbi bzitatu, cibodzi canu, cinango ca Mozeji, na cinango ca Eliya.”

⁶Akhalewa tenepo thangwe iye akhadziwa lini cakulewa sabwa iwo adabva mantha kwene-kwene.

⁷Ndipo padafika mtambo uciwampsinkha. Mumtambomo mudabveka fala kuti:“Uyu ndiye Mwana wangu omwe nimbafuna, mum'bvere.”

⁸Mwa cisututu, wakupfundzira wale pomwe adanyang'ana-nyang'ana, alibe kuwona wina, adandowona Jezu yekha.

⁹Pomwe wakhabuluka m'phiri, Jezu adawaletsa kuti aleke kuwuza winango bzomwe adawona, mpaka Mwana-wa-Munthu amuke kwa wakufa.

¹⁰Iwo adakoya cintsintsi cire, acimbabvudzana okha-okha kuti:“Kumuka kwa wakufa ndiko kulewa tani?”

¹¹Ndipo adambvundza aciti: “Kodi thangwe ranyi amisiri wa Mtemo ambalewa kuti Eliya an'dzakhala wakutoma kubwera?”

¹²Jezu adatawira kuti: “N'cadidi, Eliya an'dzayamba kubwera kuti adzakondze bzentse. Tsono, thangwe ranyi bzakunemba bzimbalewa kuti Mwana-wa-Munthu an'dzaboneresedwa kwene-kwene na kunyozewa?

¹³Tsono Ine ndiri kukuwuzani kuti Eliya adafika kale, ndipo wanthu winango adacita bzentse bzomwe iwo akhafuna ninga momwe Bzakunemba bzidalewera cipande ca iye.”

¹⁴Pomwe iwo adabwerera kwa wakupfundzira winango wale, adawona mthithi ukulu wa wanthu ukhadawazungulira ndipo Amisiri wa Mtemo akhatsutsana na wakupfundzira wale.

¹⁵Pomwe wanthu wentsenewo adawona Jezu, adadabwa kwene-kwene, ndipo adam'thamangira kukam'musa.

¹⁶Iye adawabvundza kuti: “Nandi muli kutsutsana ciani?”

¹⁷Ndipo m'bodzi wa wanthuwo adatawira kuti: “M'pfundzisi, ndakubwereserani mwana wangu wacimuna thangwe adaphatidwa na mzimu wakuipa wakumutazisa kulewa-lewa.

¹⁸Ndipo ukandom'phata, umbam'gwesa pantsi, aciyamba kucoka phobvu kumulomo, acimbakukuta mano, mpaka thupi gwa kuuma. Ndipo ndidakumbira wakupfundzira wanu kuti aucose, tsono adatazira.”

¹⁹Pamwepo Jezu adawatawira kuti, “Hu! Wanthu wakusaya cikhulupiriro! Nin'dzakhala namwe mpaka lini? Ndin'dzapirira namwe mpaka lini? ndibweresereni.”

²⁰wadabwera naye. Pakuwona Jezu, mzimu wakuipa udayamba kusukusa mulumbwana ule mwa mphambvu, mpaka iye pantsi khu, nkhumbabvumbvulika, acicoka phobvu kumulomo.

²¹Jezu adabvundza baba wace kuti:“Bzimwebzi bzidamuyamba lini?” Baba wace adati:“Bzidamuyamba ali mwana.

²²Mzimu umweyu umbakhala ucimbamugwesa kawiri-kawiri. Umbam'gwesa pamoto pinango mmadzi kufuna kumupha. Penu Imwe mungakwanisa, tibvereni ntsisi, tithandizeni.”

²³Jezu adati:“Uli kuti mungakwanise, bzinthu bzentse n'bzakukwanisika kuna omwe ana cikhulupiriro.”

²⁴Pamwepo baba wa mwana adakuwa acidandaula aciti, “Ndiri kukhulupirira. Ndithandizeni kusaya cikhulupiriro kwangu.”

²⁵Pomwe Jezu adawona kuti wanthu ali kuwanda pambutoyo, adawutsimula mwa ukali mzimu wakuipayo, adati:“Iwe mzimu wakutazisa kulewa-lewa na kubva, ndiri kukuuza kuti ucoke mwa mwanayu, ndipo leka kudzapita pomwe mwa iye.”

²⁶Mzimu ule udakuwa ucim'sukusa mwa mphambvu, ucicoka. Mwana ule adakhala ninga wafa, mpaka azinji akhambati, “Wafa.”

²⁷Ndipo Jezu adam'phata boko acimuimisa, iye adaima.

²⁸Pomwe Jezu adakapita mnyumba, wakupfundzira wace adamubvundza pambali, kuti, “Ife tidatazira tani kuucosa mzimu ule?”

²⁹Jezu adatawira kuti, “Mzimu wa mtundu umweyu ungacoke lini pakusaya kucita mpembo na kubzimana kudya.”

³⁰Jezu na wakupfundzira wace adacoka kumbuto ire ndipo adapita na kuGalileya. Iye akhafuna lini kuti wanthu adziwe komwe akhali,

³¹thangwe akhapfundzisa wakupfundzira wace, acimbawati:“Mwana-wa-Munthu an'dzaperekedwa kwa wanthu, ndipo an'dzamupha. Tsono angamupha, Iye an'dzamuka pomwe zingadzapita ntsiku zitatu.”

³²Tsono iwo alibe kubvesesa bzomwe iye akhalewa, ndipo akhagopa kumubvundza.

³³Ndipo wadafika kuKafernau. Pomwe iye akhali mnyumba, adawabvundza kuti: “Kodi panjira pale mukhambatsutsana ciani?”

³⁴Wakupfundzira wale adakhala cete, thangwe bzomwe wakhatsutsana bzikhali bzakuti mkulu mbani pakati pawo.

³⁵Jezu adakhala pantsi, acicemera wakupfundzira khumi na awiri wale, aciwauza kuti:“Penu winango an'funa kukhala wakutoma, an'dzakhala wakumalizira, ndipo wakudzatumikira wentse.”

³⁶Pamwepo adatenga mwana m'bodzi, acimukhazika pakati pawo acikumbatira, adawauza kuti,

³⁷“Ali-yentse an'tambira mwana ninga uyu thangwe ra Ine, ali kutambira Ine, Ndipo wakutambira Ine, ali kutambira ine na omwe adandituma.”

³⁸Juwau adawuza Jezu kuti:“Mpfundzisi, ife tidawona munthu winango acimbacosa mizimu yakuipa pakulewa dzina lanu, ndipo tidamuletsa, thangwe ambafamba lini na ife.”

³⁹Tsono Jezu adati:“Lekani kumuletsa, thangwe palibe omwe angacite bzidabwiso mudzina langu patsogolo pace acindinyoza.

⁴⁰Sabwa wakusaya kutsutsana nafe, umweyo ngwakuphatana nafe.

⁴¹Na tenepo ule omwe an'kupasani mkombo wa madzi mudzina langu, thangwe ra kuti ndimwe wa kwa Krixtu, cadidi ndiri kulewa kuti umweyo cipo angadzasaye kutambira mabaibai.”

⁴²“ Penu wina angaphonyese m'bodzi wa ang'onowa wakukhulupirira ine, umweyo bzikhali bwino kuti amangiriridwe cimwala ca nyampheyo mkhosi acikam'thusa panyandza.

⁴³Penu boko lako liri kukuphonyesa, ligwate. N'bzabwino kuti ukapite kumoyo wakusaya kumala uli wakugwatika boko, kuposa kuti ukapite una manja yentse mawiri kumoto wakusaya kumala.”