Mak 6:24-55

²⁴Tah ae ka suuh ke ka diik tina aragii, “Sanih ian sising u isi?” Ke tina ka kiliis u aragii, “On sising u isi paklu Jon Tom tel Bapitaiso.”

²⁵Fanpil, tah ae ka sangar fis usuf king ma ka fas u aragii, “Igii tom on ta paklu Jon Tom tel Bapitaiso usuf iau na olon ti pelet.”

²⁶Aunbiing king i ongen u arae, ke ka lala purngis e bala, isau le wara na falimlim kia usuf tah ae, ke i wara sabin le foron ses ae ri ien turim, ri ka ongen ta orek ae i use ta u, pesu biil i fasih in ongen ufu sising ken tah ae.

²⁷Fanpil ka wuun ufu nenge tom fapaket isi kep fafis paklu Jon Tom tel Bapitaiso usuf keleflik ae. Tom fapaket ae ka la una felun kamkabet ke ka bus ufu paklu Jon.

²⁸Ke ka kep fafis u na nenge pelet. Ka ta u usuf tah ae ke ka ta u usuf tina.

²⁹Aunbiing berberat na fafausum ke Jon ri ka ongen u, ri ka la ma ri ka kep pununfo ma ri ka fakau u na nenge matanfat una luun minet.

³⁰Foron aposel ri ka fis ma ri ka tafe Iesu, ke ri ka fas u ini foron tier tikii ae ri tel ta u, ke foron tier ae ri fausum ta fanu ini.

³¹Fanu fuun ri famam fafakiliis una aisa ri, pesu Iesu turan berberat na fafausum kia biil ti aunbiing kiri una ien. Iesu ka fas berberat na fafausum aragii, “Gam la, ma kerek la una kiptin biil isi gamek mangeh.”

³²Ke ri ka wof na nenge mon ma ri ka awes una nenge kiptin biil.

³³Isau le fanu fuun ae ri par ta ri sawe, ri iliim Iesu turan berberat na fafausum kia. Ri ka filau tina foron maleh temtem tikii, ke ri ka tapiek famu na falifuh ae Iesu ri, rin masah lo.

³⁴Aunbiing ri ka masah, Iesu ka par tara gur na fanu, ma ka mais kanaka ri, wara le ri arae foron sipsip ae biil tikas una parpar kale ri. Ke ka tanwaran fausum ri ini i fuun e tier.

³⁵Ka efef mang, ke berberat na fafausum kia ri ka la usuf i, ma ri ka fas u aragii, “Kumguui, kiptin biil sau igii, ma pisiih sabin fatat mang ik sup.

³⁶Wuun sarara fanu mang una foron fel ke foron maleh fatat, isi rik fiil ti inen ari.”

³⁷Isau le ka kiliis ri aragii, “Gam fen ri ini ti inen.” Ke ri ka fas u aragii, “O ier le kemen la ma kemek fiil ti foron beret ari? In wu tom ngan e mar e denari in fasih una fiil inen ari!”

³⁸Ke Iesu ka diik ri aragii, “Ifis e beret ae sing gam? Gam la ma gamek im.” Aunbiing ri ka usum tah na ifis e beret, ri ka fas Iesu aragii, “Ilim e beret ma ka u e kok.”

³⁹Ke Iesu ka fas berberat na fafausum kia le rin fakiis fanu na foron uh na olon foron rokap na fifih ae.

⁴⁰Ke ri ka kiis na foron uh, ma na temtem tikii na uh, fal nenge mar e fanu lo, ke fal ilim e sangful e fanu lo.

⁴¹Ke Iesu ka kep ilim e beret ke iwu e kok ae, ka par una kukulii ma ka fotrokap usuf God, ke ka sibik foron beret ae. Namih ka ta u usuf berberat na fafausum kia isi rin tulus fanu ini. Ka tulus ri tikii sabin ini iun kok.

⁴²Ri tikii ri ka ien ke ri ka mas.

⁴³Namih berberat na fafausum ri ka siing fafuun nenge sangful ini u e kes ini foron tigan beret turan kok.

⁴⁴Wewes lon fanu tamat ae ri ien tah ma ri ka mas, i fasih aragii ilim e arip.

⁴⁵Fanpil Iesu ka wuun famu berberat na fafausum kia isi rik wof na mon una Betsaida ae na nenge bulin dan kawil. Ma ka kiis fis isi in wuun sararah fanu ae.

⁴⁶Aunbiing fanu ri ka sararah tah, ka tatkau una nenge pungpung isi ik sising.

⁴⁷Ma aunbiing ka sup tah e pisiih, berberat na fafausum kia ri ka awes la mang awii na fatpoton dan kawil, ma Iesu keskes mang tinawii biitom na bulin dan.

⁴⁸Iesu i par u aragii le i ngangaten kanaka ulon berberat na fafausum kia isi rin awes, wara le kif i kufkufe tina famu lo ri. Ma na piklin ien, Iesu ka la na olon dan kawil usuf ri ma fatat ik liu ufu ri.

⁴⁹Isau le aunbiing ri ka par u i la na olon dan, ri ka wol le nenge kinit. Ke ri ka ngangeh,

⁵⁰wara le ri tikii ri par u ma ri ka lala sokeh. Fanpil Iesu ka orek usuf ri aragii, “Gong gam sokeh, iau sau igii. Gam tifat.”

⁵¹Ke ka wof kau unawii na palgan mon tura ri, ma fanpil kif ka met. Ri ka lala bitit,

⁵²wara le biil ri malal rokap na fakileng ae Iesu i fatapiek ta u na beret ke na kok. Balri i kubunor.

⁵³Aunbiing ri ka awes paket tah, ri ka masah na Genesaret, ma ri ka kabet mon kiri aiwa.

⁵⁴Ma aunbiing sau ae ri puh tina mon, fanu sabin tinaiwa ri ka iliim Iesu.

⁵⁵Ke ri ka filau una foron maleh tikii na falifuh ae, ma aunbiing ri ongen u le Iesu ae na nenge maleh fatat, ri ka kep foron sasem ini foron salri una maleh ae.