1Na foron biing tom ae, nenge tara gur na fanu ri ka la turim sabin. Ma aunbiing biil mang ti inen ari, Iesu ka tawi turim berberat na fafausum kia usuf i, ke ka fas ri aragii,
2“Ia mais kanaka fanu igii, wara le ri ka kiis pes ta ituul e biing turang, ma igii biil mang ti inen ari.
3Male ian wuun sarara ri una foron maleh temtem tikii kiri ini fitol, ke fal lo ri in paket ri e ramram tole sal, wara le fal, foron maleh kiri i tapak.”
4Berberat na fafausum kia ri ka kiliis u aragii, “Kiptin biil sau igii, fia keren kep ti inen wah, isi ik fasih una fen ri tikii?”
5Iesu ka diik ri aragii, “Ifis e beret ae sing gam?” Ri ka kiliis u aragii, “Ifit.”
6Ke Iesu ka fas fanu ae isi rin kiis na nanal. Ke ka kep ifit e beret ae, ka fotrokap usuf God, ke ka sibik u ma ka ta u usuf berberat na fafausum kia isi rin tulus fanu ini. Ma berberat na fafausum kia ri ka tel u arae i use ta u.
7I mel e fal e birbiro kok sabin tinaiwa, ka fotrokap sabin usuf God isi, ke ka fas berberat na fafausum kia isi rin tulus fanu ini.
8Fanu ri ien ma ri ka mas, ke berberat na fafausum kia ri ka siing fafuun ifit e kes ini foron tigan inen ae ri mas tiga.
9Wewes lon fanu tamat tikii aiwa, ifasih aragii ifet e arip. Aunbiing ri ka ien tikii, ke Iesu ka wuun sarara ri.
10Ke ka wof na mon turan berberat na fafausum kia ke ri ka awes una falifuh na Dalmanuta.
11Foron Farasi ri ka tapiek ke ri ka tipes fapue tura Iesu. Ri ier isi tof u, ke ri ka fas u isi in fatapiek ti fakileng tinbae na kukulii.
12Iesu ka mangeh, ma ka tara aragii, “Sanih e wara ae ulul na fanu igii ri ka fas iau isi ian fatapiek ti fakileng? Tekentu kanaka ia fas gam, biil tom ian fatapiek ti fakileng usuf gam.”
13Ke ka la koseng ri, ka wof fis na mon, ma ka sopaket dan kawil una nenge buli.
14Berberat na fafausum kia ri ruruu le rin kep ti fal e beret, isau le ri kep i tikii tutus sau e beret tura ri na mon.
15Ke Iesu ka fanau ri aragii, “Gamen tumarang isi is ken foron Farasi turan is ke Erot.”
16Ri ongen u arae, ke ri ka ngurke fafis kamtinan orek ae na fotpoto ri tom, aragii, “I use u arae, wara le biil ti beret arer.”
17Iesu ka usum tah na sanih ri ngurke u, pesu ka diik ri aragii, “Isi sanih gam ka tara le biil ti beret? Arafah, biil biitom gam iliim u, ke biil biitom gam malal lo? Balmi i kubunor biitom?
18Imel e matmi, isau le biil ifasih gamen par ini. Ke imel e balbalu gam, isau le biil ifasih gamen wong ini. Gam wol pes u,
19aunbiing ia sibik ta ilim e beret usuf ilim e arip e fanu. Ifis e kes gam fafuun u ini foron tigan beret ae fanu ri mas tiga?” Ri ka kiliis u aragii, “Sangful ini u.”
20Ke ka diik ri sabin aragii, “Ke aunbiing ia sibik ta ifit e beret usuf ifet e arip e fanu, ifis e kes gam fafuun u ini foron tigan beret ae fanu ri mas tiga?” Ma ri ka kiliis u aragii, “Ifit.”
21Ke ka diik ri aragii, “Arafah, biil biitom gam malal?”
22Iesu turan berberat na fafausum kia ri ka tapiek na Betsaida, ke fal e fanu ri ka tangne nenge kut usuf i, ma ri ka sising u isi in sigil iun mata.
23Ka pose na liman kut ae, ke ka tangne ufu tina maleh ae. Aunbiing ka ubis ta matan kaltu ae, ke ka luun iun lima na iun mata, ke ka diik u aragii, “O ka par ti tier?”
24Ke kaltu ae ka sake paklu, ke tarah, “Ia par fanu. Isau le ri par arae foron au ri la.”
25Ke Iesu ka luun iun lima sabin na iun mata kut ae, ke ru ka sapeng fis, ke ka par fakasi foron tier tikii.
26Iesu ka wuun ufu una fel kia, ke ka fas u aragii, “Gong o soleng maleh ae.”
27Ke Iesu turan berberat na fafausum kia ri ka la una foron maleh fatat isi Sisaria Filipai. Aunbiing ri toltole sal la, ka diik ri aragii, “Fanu ri tara le iau e seh?”
28Ke ri ka kiliis u aragii, “Fal e fanu ri tara le wo e Jon Tom tel Bapitaiso, fal ri tara le wo Elaisa, ke fal ri ka tara le wo neng lon foron poropet.”
29Ke ka diik ri sabin aragii, “Arafah lo gam, gam tara le iau e seh?” Ke Pita ka kiliis u aragii, “O e Mesaia.”
30Ke ka tikale ri le gong ri fas tikas ini le i e seh.
31Ke namih Iesu ka tanwaran fausum berberat na fafausum kia aragii, “Kalalik ken Kaltu in kalsakai in fuun e tatawin, ke foron famfamu, foron laulaumet na pris ke foron tom fafausum ini nagogon rin ta pokta ri usuf i. Rin siimete u, isau le nami na in tuul e biing in aptih fis sabin.”
32I famalal fakasi tom e orek kia, pesu Pita ka lame ufu koseng ri ma ka tikale u le gong i orek arae.
33Iesu ka giliim ke ka par berberat na fafausum kia, ke ka fakiing Pita aragii, “Satan! Fin koseng iau! Wara le biil o mi na wolwol ke God, biil. O mi sau na wolwol ken fanu.”
34Ke Iesu ka tawi turim gur na fanu ae turan berberat na fafausum kia usuf i, ke ka fas ri aragii, “Male tikas i ier le in mih lo iau, in fapuh u tom, ma ik kusep aupaket kia, isi ik mi lo iau.
35Wara le seh i gong kale liu kia, ke in mangmangal koseng u, isau le seh i sok ufu liu kia i wara lo iau ke Rokap na Fafas, in liu.
36Male tikas i kep tikii foron tier tina piklinbat, isau le ka falaulau tanwa, in farokap u arafah?
37Ke in ta sanih una fiil kiliis tanwa?
38Fanu na ulul igii, ri liu na palgan sinang laulau ma liu kiri i tapak koseng God. Male tikas lo ri i matlawen lo iau ke na foron orek kiak, Kalalik ken Kaltu sabin in matlawen lo, aunbiing in tapiek ini memeh ke Tama turan foron kalkaluu na angelo.”
