Mɔnnu 8:9-34

⁹Yi kpuro yi bururewɑ kpɑsɑsɑ bwisiɡiin mi. Mɛyɑ yi mɑɑ dɛɛre wi u yɛ̃ru mɔn mi.

¹⁰I nɛn sɔ̃ɔsiru mɔɔ n kere sii ɡeesu, kpɑ i mɑɑ yɛ̃ru mwɑ n kere wurɑn tii.

¹¹Domi bwisi yi bɛɛrɛ mɔ yɑ kpɑ̃ yɑ burɑ yɑ̃nu kpuro kere. Ye bɑ rɑ kɑsu kpuro sɔɔ, ɡɑ̃ɑnu sɑri ni kɑɑ kɑ yi weesinɑ.

¹²Nɛ bwisi, nɑ rɑ ɡɑrin ɑsɑnsi tubu. Nɑ yɛ̃ru mɔ n kɑ ɡɑ̃ɑnu wunɑnɑ.

¹³À n kĩ ɑ Yinni Gusunɔ bɛɛrɛ wɛ̃, ɑ de ɑ kɔ̃sɑ tusi. Nɑ tii suɑbu kɑ yɛ̃kɔ kɑ kɔ̃sɑn kookoosu kɑ keetɑn ɡɑri tusɑ.

¹⁴Nɑ rɑ tɔnu bwisi kɛ̃, kpɑ n nùn lɑɑkɑri wɛ̃. Nɛnɑ nɑ yɛ̃ru, nɛnɑ mɑɑ dɑm.

¹⁵Nɛn sɑɑbuwɑ sinɑmbɑ kɑ bɑndu nɛni, mɑ wiruɡibɑ woodɑ wɛ̃ɛmɔ ye yɑ dee dee sɑ̃ɑ.

¹⁶Nɛn somirun sɑɑbuwɑ sinɑmbu kɑ wiruɡibu kɑ siri kowobu kpuro bɑ kɑ tem nɛni.

¹⁷Be bɑ mɑn kĩ, nɑ mɑɑ bu kĩ. Be bɑ mɑn kɑsu, bɑ koo mɑn wɑ.

¹⁸Arumɑni kɑ bɛɛrɛwɑ nɑ tɔnu wɛ̃ɛmɔ kɑ mɑɑ dukiɑ ye yɑ ku rɑ sɑnkire. Kon de ye tɔnu mɔ kpuro yɑ n dɑ wɛ̃re.

¹⁹Nɛn ɑre yi sii ɡeesu kɑ wurɑn tii bɛɛrɛ kere.

²⁰Nɑ sĩimɔwɑ swɛɛ yì sɔɔ ɡem kɑ kookoo ɡeesu wɑ̃ɑ.

²¹Nɑ be bɑ mɑn kĩ ɑrumɑni wɛ̃ɛmɔ mɑ nɑ dukiɑ yibiɑmɔ ben beru yerɔ.

²²Yinni Gusunɔ u mɑn mɑrɑ u sere ɡɑ̃ɑnu kpuro tɑkɑ kuɑ.

²³Bɑ mɑn ɡɔsɑ bɑ yi yellun di n tɛ bɑ sere hɑnduniɑ tɑkɑ kuɑ.

²⁴Bɑ mɑn mɑrɑ bɑ sere nim wɔ̃ku kuɑ, sɑnɑm mɛ nim bweru sɑri.

²⁵Bɑ mɑn mɑrɑ bɑ sere ɡuunu kɑ ɡunɡunu swĩi.

²⁶Sɑnɑm mɛ, Gusunɔ kun ɡinɑ tem tɛrie kɑ mɛn ɡbeɑ. Bɑɑ tuɑ, u ǹ mɑm kue.

²⁷Sɑɑ ye u wɔllu tɛriɑmɔ kɑ nim wɔ̃kun bubenu, nɑ wɑ̃ mi.

²⁸Sɑnɑm mɛ u ɡuru winu doke wɔllɔ, mɑ nim mu kurɑ tem di mu tɛriɑ, nɑ wɑ̃ɑ mi.

²⁹Sɑnɑm mɛ u nim wɔ̃kun nim yɔ̃rɑ yeru sɔ̃ɔsi u nɛɛ, mu ku tu sɑrɑ, mɑ u tem tɑ̃sisiɑ,

³⁰nɑ wɑ̃ɑ win bɔkuɔ sɑ sɔmburu mɔ̀. Win nuku dobu wɑ̃ɑ nɛ sɔɔ bɑɑdommɑ. Nɑ ɡɔ̃ru dobu mɔ win wuswɑɑɔ,

³¹kɑ hɑnduniɑ sɔɔ. Mɑ nɑ bɔri yɛndu mɔ tɔmbun suunu sɔɔ.

³²Ǹ n mɛn nɑ, nɛn bii durɔminu, i mɑn swɑɑ dɑkio. Doo nɔɔruɡibɑ be bɑ nɛn swɑɑ swĩi.

³³I sɔ̃ɔsiru wuro, i ku tu ɑtɑfiiru ko, kpɑ i bwisi ko.

³⁴Doo nɔɔruɡiiwɑ wi u mɑn swɑɑ dɑki, mɑ u rɑ n yɔ̃ nɛn dii kɔnnɔwɔ bɑɑdommɑ u n mɑn mɑrɑ.