LUUKAS 7:31-43

³¹Junak intok ju'u Jesukrijto inen jiiak: ―Jitau sa tua nee a' tamachianee juka' yoemrata i'an inim jiapsamta. Jaisa inime'e mamachi.

³²Inime'e, ili uusim, jum jita nenenkiwa'po yeeweka intok jume' bem ta'aa'ummeu inen jiame bebena: “Kusiata, tua ujyoisi itom emou kuseo juni'i, eme'e ka ye'eka. Chukula intok kia sioksi itom emou bwikaao juni'i, taa eme'e ka bwaanak.”

³³Bwe'ituk ju'u Joan yee babatoowame inim jiapsaka, inika'a ka yu'in ji'ibwaao, intok kia juka' ae nanaakowamta juni'i, ka a' je'eekai, eme'e intok, bebeje'eri ka tu'i jiapsi aet aane'eti jiia.

³⁴Iniat chukula intok ket ju'u inim emo benasi yoeme yepsak, si'imeta a bwa'eekai intok pa'asi ba'awata ne je'eekai, intok eme'e, inika'a yu'in a' jiji'ibwaka intok ae nanaakowamta a' je'e'eti jiia. Intok kia jume' ka tu'i yoememmak intok jume' ya'uraatau bicha tomita weyemta nau totojammak a' weama'ati jiia.

³⁵Taa ju'u suawa Liojta betana weyeme, jume' aapo'ik Liojta betana suawakammet a ju'uneiyaatu.

³⁶Jume' paiseom betana seenu, Jesujta a' ji'ibwa nunuk. Jesus intok inia jo'au yepsak intok junama'a mesau yejtekai.

³⁷Junak intok senu ka tu'i jamut, jiba junama ili bwe'u jo'arapo jo'aakame, Jesujta junae paiseota jo'au a' ji'ibwaseka'po ju'uneaka, ini'i, jita tosai tetae ya'aripo, ochokok tua win jubaka weiyaaka ama yepsak.

³⁸Intok ini'i, Jesujta wokiu yejtek. Intok bwanaka, a' opoam Jesujta wokimmet ko'om weyekai. Chukula a' chonimmea a' wacha'ariakai. Intok amet tenteka, juka' ochokok win jubak amet to'aak.

³⁹Ju'u paiseo, Jesujta nunulame a' bichakai: “Ini'i lutu'uriapo Liojta betana weyeka yeteu nokametuko, inia jamut, aet mammamtat ju'une ean, inika'a jachin a' jiapsa'ut. Bwe'ituk ini'i tua ka tu'i jamut ti,” au eetuan.

⁴⁰Junak ju'u Jesus, ju'u paiseotau: ―Simoo, senu weemta ne eu teuwaabae ―ti au jiiak. Ju'u paiseo intok: ―Neu a' teuwaa yee majtame ―ti a' yoopnak.

⁴¹Ju'u Jesus iniau: ―Waate woika, seenuk tomita yee rereuwamta a' wikiriian. Seenu, mamni siento tosai tomim a' wikiriian. Senu intok woi taka ama woj mamni tosai tomim a' wikiriian.

⁴²Inime'e intok ka a' beje'etuao, ju'u tomita am reuwaalame, ju'u bem a' wikiria'ut am jiokoek. Nee tejwaa, inime'e woim betana jabesa tua che'a a' nak machi ―ti a' temaek.

⁴³Ju'u Simoo' teame: ―Ju'u, che'a bu'uukut jiokoiwakame, ti nejpo ea ―ti au jiiak. Jesus intok: ―Tua empo junaen a' teuwaala ―ti au jiiak.