LUK 7:31-43

³¹Yesus iyo asok bogobe-nala e, “Kamano kaa albip ibo dogonupmin unang tinum albip a? Ibo tinum bisel ke fito-silip kuta, ibo man kangkang ilitap kuba.

³²Man kangkang iyo abiip mat kal ton-bom-nilip e, milii bagaa kulu ipkumal iyo olabe-nilip e, bogolip, ‘Nuyo, atol dagamin tap kemum o ageta aseng kwaa-bom-nulup e, ot bo-bom no ke-bulup kuta, ipta nusino atol dagamin binim ke-bilip ko. Minte nuyo, tinum kaana dubamin tap kemum o ageta aman-kulup kuta, ipta nusino amemin binim ke-bilip ko. Dogonupmin umi kuguup migik migik kanumin uyo kup-kugulupta, ibo, “Waago o,” age kulaa yakyak ke-bilip o,’ agan-nuubip ko.

³³Ulutap kale, (ibo Jon iyo, ‘Waago o,’ age som-nilip e minte, niyo, ‘Waago o,’ nage no kem-nuubip kale,) Jon imi aget fugunin uyo, God yagal bogopne-nala e, ‘Kanupmin unan-kalin boyo kabo unan-kalin ba o,’ nage-se kalaa age-nala fala-bilita, God iyo nimi deng uyo tebemak o age-nalata, unan-kalin maak maak so sok dum ok so uyo suun kup falamin kup kemsa kuta, tal kanu-balata, ibo atam-nilipta, bogo-nilip e, ‘Tinum beyo sinik mafak tebe dufak daaluta, unan-kalin boyo suun kup falam-nuuba o,’ agan-nuubip ko.

³⁴Kale minte Mo Tibil imi Man niyo tal-nili e, iman so sok dum ok so umaak amem kalaa age-nilita, kupkasaali kale, alugum ipmi iman unan-nuubip boyo unan tebesi kuta, ibo bogo-nilip e, ‘Ibaa. Abuyap be atamin. (Juda kasel numi kuguup uyo unan-kalin uyo fala fala ke-bom God imi beten uta kup ke-emin kuta, Yesus beyo maak kanumin binim kale,) beyo takis mani kwaamin tinum so kuguup mafak waafulin tinum migik so imi duup o,’ agan-nuubip ko.

³⁵Tinum dok ita God imi kuguup tambal uta kup kema umdii, bota tebe kafalebeluta, kek kek iyo atamipta e, beyo tebe God iyo tele utamsa tinum atamta, nuyo felepmuta, te yak imi kuguup tambal uyo waafulan-temup kalaa agelan-temip o,” age Yesus iyo kam age baga-ema ko.

³⁶Falosi maak Yesus imi bogobe-nala e, “Kabo talapta, nimi am kal nisino alop iman unelum o,” agelata, no Falosi imi am kal ton-bom iman un-silip e,

³⁷sa dagamin unang maak abiip kugol albu kale, tolong doluta, “Yesus iyo Falosi am kal iman unan-be o,” agelip kalaa age-nulu e, tam tuum kalosip tet tem tang tambal kuunin ok uyo ilu kuptamo-nulu e, tulu ko.

³⁸Tal Yesus imi miit tem mep so kugol katuun duung fegela daak ton-nulu e, agol kup amemu e, umi tiin ak singkam daa te daak Yesus yaan diim abelu e, uyo ulumi dubom kon timitim uta kulu Yesus yaan diim tiin ak daak abelu uyo tolobe-nulu e, king win kufu-emin kuguup uta ku Yesus imi yaan uyo fiil buube-bom-nulu e, “Suguul o. Nimi Kamogim o,” agan-bom-nulu e, kota tang tambal kuunin ok umdii sing daa kwaapmu daak Yesus imi yaan diim abemu ko.

³⁹Falosi imi Yesus bogobe-nala, “Talapta, iman unelum o,” ageba iyo unang umi kanupmin kuguup boyo utam-nalata, yagal aget fuguna ko. “Kanupmin unang boyo sa dagamin unang kale, tinum keyo aafen God imi weng kem baga-emin tinum iyo maak nimnam, yagal utamata, dogonupmin unang uta melepne-bo kalaa agan-be kuta, utabaala o,” agela ko.

⁴⁰Yesus iyo Falosi imi aget fugun-be uyo utam-nala e, bogopma, “Saimon kabaa. Niyo weng maak bogop-kaman-temi o,” agela e, Saimon isiik bogopina, “Aa. God imi weng kafalemin kabo bogopnelal o,” agela e,

⁴¹Yesus isiik do weng maak bogopma, “Tinum alop maak tebe no mani yuum kupka-emin tinum iyo dagalip kobela kale, tinum maak imi yuum uyo K100 e minte, tinum maak imi yuum uta K10 uta kup no kale,

⁴²tinum alop iyo yuum boyo mo-nimip binim kelip kuta, asok tinum beyo alop imi yuum uyo kupkapma ko. Tinum alop kuta, maagup ita mani tiin molin tinum bemi aget kup kopma kale, waanta o?” agela e,

⁴³Saimon isiik bogopma, “Nimi aget fugun-bii uyo, tinum bemi yuum afek molin-tem kela mani tiin molin tinum tebe kupkabela tinum beta mani tiin molin tinum bemi aget kup kopma kalaa agan-bii o,” agela e minte, Yesus iyo imi bogopma, “Kota kapmi aget fugunin uyo tol kepkelu o,” age-nala e,