LUUKA 21:4-29

⁴Haali/ uni ’baar mo pashki to ’pen mo ’peni tom buni gun ishkin ka enthus mo, hili ayim ’pena ha’th’ko’d piti mo tani dhuki’da ris to ’baar mo kun mini kar a’di mo be.

⁵Dhali me’d jin ona ’kwanin tiya gwo mo gom gu’b gi mondheleladhelel mo mmonyaŋu a’di ki wosha ’borga/ mo dhali to kun c̱inu mo dhali a’di ki o gwo mo ki:

⁶Me’da ris to gwansan kun p̱arkina um e mo tani atee mini p̱u’du/ mo ki wosha kamu/ yisa minu dhal ka maḵamp̱o/ ap̱owa kamu/ imahan yisa kun mini ’koki ṯaka ’cesh mo.

⁷Dhali uni ki doṯ a’di gwo mo ki: Manṯor Gwo, ki mii yan midi mii kakasja mo? Dhali jamas mii gi wakata minu mii mo? ki mii yansan jin mura ’twa/ mmobu’th mo mo.

⁸Dhali a’di ki o gwo mo ki: ’Cunycuri mii ki is bum ki ’bore/ mo ma ki um minu ’koki susi dheres mo. Haali/ ’kwani tana ris mini iiyu/ ki gway pem mo mmo/o gwo mo ki: Aha/ tana a’di be, dhali, Mo a’di p̱u’dki’d hila/ mo tani, dhalku/ ki ii mmobaṯẖ uni isho’k mo.

⁹Dhali ki um mini ciḵ gwo gom mo/as mo dhali adulaṯṯ jin miina ’kwani mo tani dhalka shi/iny jwa ki shwa mo ma haali/ mii yansan a’di midi mii bu’th mo mo nṯwa/a/ mo, hili ’pemen midi diki p̱u’d naskina/ ki jahanne/ mo.

¹⁰Yan’ko’d a’di ki o uni gwo mo ki: Kal gi kala kamu/ midi cu mis ap̱o/ kala kamu/ mo dhali ’peŋkuman bampaŋ kamu/ midi cu mis ap̱o/ ’peŋkuman bampaŋ kamu/ mo be.

¹¹Dhan mony’cesh midi yiḵin is ki mo ka ris mo dhali e mon tiya ka ris mo tani ṯe/ midi ’kosha ’kosh mo dhali mo/isa nyor ’peni to kun woci ’kwani is mo, dhali to kun mini dher ’kwani is bwa mo dhali dhan momer ’peni momis mo be.

¹²Hili nṯwa/a/ ka ris to gwansan mo tani uni mini dhu me’d buni ap̱o/ um mo dhali ṯo’c um bwa mo mmoc̱i um e gu’b gi montul is mo dhali eya sijin mo dhali um minu susu mo mbwambori imaliḵ mo dhali e imudhiir mo gom gway pem mo be.

¹³Yansan midi ta atente/ gom um mmota iman/o gwo mo be.

¹⁴Thosoni adum bum nṯwa/a/ mo ma dhali dhalku/ ki dhuwa du ki mur mo gom gwo jin mina umi thoḵ mo,

¹⁵haali/ aha/ mina c̱i um ’twa/ mo dhali moyuḵ mo a’di jin mina jan ’deŋ kamu/ ’peni uni kun ta ’kup̱ ki um mol roc̱ mo walla ’ce’d uma p̱o/ mo be.

¹⁶Um minu c̱i mo ki ikwan mo si’da/ dhali ikam bum mo dhali ibas bum mo dhali imugum bum mo, dhali kun tiya ’peni bwam um mo tani mina uni i’kosh jwa mo be.

¹⁷Um mina ’kwani ’baar mo ishi/i e mo gom gway pem mo be.

¹⁸Hili amur ’kup̱ ’deŋ kamum bum mo tani minu diki ’ce’d sho’k mo be.

¹⁹Ki miim bum jin ’dima um ’kup̱ mo tani um mini gam moŋ’kom bum mo be.

²⁰Hili ki um mini p̱ar Pa Urushaliim e mo mmo’kamkunu a’di ’kup̱ ki deḵ mo ki ’kwani ma mee mo tani yan’ko’d um ki mish mo mo ki a’di ta mony’ce’d sho’k jin p̱u’dki’d ki ’dishe/ mo be.

²¹Yan’ko’d dhali uni gwansan kun ’kon e Pa Yahuudiyya mo mini so ’kuwosha turga/ mo, dhali dhalki uni gwansan kun ’kon e bwaman ’peŋkuman bampa/ mo tani mini ii mo, dhali mmo’koki dhal uni gwansan kun ’kon ka pije/ e bampa/ mmocic̱ e a’di mo.

²²Haali/ atee gwansan a’di ta mo gi toru gwo ’twa/a ’cesh ka ḵar/e mo mmothima ris to kun ’kwarkunu mo be.

²³Ayy/ayy/ayy gom uni gwansan kun bwaa uc̱i mo dhali gom uni gwansan kun c̱i uc̱i ako mmop̱i mo ka tee gwansan mo. Haali/ adhana wukura/ midi caaca mo jin midi p̱u’du/ ap̱o/ mony’cesh mo dhali anyor midi di ap̱o/ ’kwani gwansan mo.

²⁴Dhali uni minu tor ’ko’da ’cesh ki sheŋ gandala turga/ mo, dhali uni minu sus mo mmota habuus mo e bwaman kal gi ’kwaniny’ceshi ’baar mo. Dhali Pa Urushaliim minu shubur ki sho’k gi ’kwani kun ’koki ta ’Kwani Yahuuda/ mo ntaga tee gi ’kwani kun ’koki ta ’Kwani Yahuuda/ minu thim mo be.

²⁵Dhali jamas mii midi di eya tente/ mo dhala ppe mo dhali acul mo. Dhali eya p̱o/ mony’cesh mo tani awukura/ e kal gi ’kwaniny’cesh mo midi di mo eya dumbul bway mo goma ḵuku/ ḵuku/ ḵumma/ yi’de/ mo dhali mombir bakal mo.

²⁶’Kwani mina shi/ini wu ’kup̱ mo gom moŋḵo/ is mo gom to jin c̱orkina uni mo, a’di jin midi p̱u’du/ ap̱o/ mony’cesh mo. Haali/ mom’bi’th gi momis mo tani minu yiḵin is mo be.

²⁷Dhali yan’ko’d uni mini p̱ar Ya/ gi ’Kwani e mo mmoyayu/ e bwaaraḵ mo ki mom’bi’th mo dhali ka dhan monyca jin ca’d ilu/ mo be.

²⁸Dhali ka ris to gwansan mini ṯel mii ’pen mo mmobu’th mo mo tani hili ’kup̱ ki mis mo ma dhali ’deki ’kup̱ bum mo haali/ mowan ’bam bum mo tani a’di ’disha’dish mo be.

²⁹Dhali a’di ki ṯor uni gwo mo ki gwom ’bi’th/e mo ki: Hili cwamp̱u/ mo ma dhali aris cwa ’baar mo.