Ruki 21:4-29

⁴Ijadufuo maeje buka moni uruvana zarae rove bume isesina bino kena Godi vajae. Ro bara amune ije fu moni ma isekube fu ire fuone fuaevekiro nijae rove fuka aguake abena una Godi maemano kiae.

⁵Areme e Jesudo vua fievo gue bu kari Godido are ije gana kuae. Bu gana kuaevo Are maegure saeva ije bu mune ka mukore ijiaru karina sae. Ro kuke are guove ijia buka ire maeje boeje karina Godi vajavono kuae.

⁶Bu ijiege kuavoga Jesu fu una kiae, Ire boeje gure ja giavo ije bu rade maza be abekuma mune gure besukua be fube ije fu namo ijia ijiege nadufuo. Ijadufuo maeje rade buka e Jiusi ijiebuo e ani ijiebe farae korega mune buka diduena arikono kiae.

⁷Jesu fu ijiege kuariamoga e vua fuone fievo ije bu una kuae. E Nijasiamo, a vierafega ire ije fu veze redufuo? Ro kuke no nuga irere ijia gana vierafero ire ije fune rekuvenoro no ijiege vierafeno kuae?

⁸Ro Jesu fu una kiae, Maza rade e bino buka oenoekinu una e gue biesiriake ijadufuo nika mukoreigia giakinu oenoefo. E gue buka ive none ijia usiae biesiriana kiako, Noeje no e ije fu ruako kuaeva ijeneno kiaeke. Ro kuke e gue bu usiae kiako, Maza ije fune ruaemano kiaga jade uri bu nuvediavo.

⁹Ro maza ijia e gue buka una e guena bijaeke ro kuke e gue buka una e mamekanu buone ijena bijaeke. Ro bu ijiege rega ja fiekuva jade jumevo. Ro igia fie, maza ijia ire ijieki binobino buka rega ja giadufuo. Rove jade vierafero maza rane ije fune ivuaremoro jade ijiege vierafevo.

¹⁰Rade e aesakae binobino ijia karinoeva ije buka una bue bijiaeke. Ro kuke e kini gue bu una guena bijaega ja fieke.

¹¹Ro kuke aesakae ige fuka ma ireobo uvekega vasia ireobo roga e gue buka vasia abena oeke. Areme e uruvana buka adame ise binobino abena oeke. Ijiege rena ire ni binobino ka ise ja jumedufuo ije bu rekega saove gufia nuga mamekanu gue bu ijia rega ja giake.

¹²Ro igia fie, ire boeje na kuariavo ije bu rade redufuo. Ro ude jaeje e buka are e Jiusi bu afuina vua kuaevo ijia kame isekafiakinuro kaenamiana dibure uniake. Ro kuke jaka na ma vierafevo ijadufuo buka ja kaenamiana e kini ijiakiro e mamekanu ijiebuo nidua ijia vaga bu vua ise joesina kuaeke.

¹³Ro maza ije bu ja ijiege revo ijia ja urina vua none maeje dabe e ije kuariadufuo.

¹⁴Ro jade uri vua ja izege kuariadufuo ijene uruke vierafevo.

¹⁵Ijadufuo maeje nare vua ja kuaedufuo ije vierafejiake. Ijadufuo ja uri e ije bu ja kame vua gikikimana kuariavo ijiebuo vua ije karatuana una vua maeje kuariadufuo.

¹⁶Ro kuke orafa jone ijiakina uviarafa ro makirafa jone ijiakina e jaena gire besu karinoejo ije buka ja ziegafiake. Bu ijiege rena ja buka toenamiana kame e ani ije vajiaga bu kena isekafiaga e gue ja oedufuo.

¹⁷E boeje buka ja kame vame binobino ijia arafiriakinu ziegafiake. Ijadufuo maeje jane e none rena ive none dabe kuaenoevo ijadufuo bu ijiege reke.

¹⁸Rove igia fie, na e besubesu jaeje naka mukoreigia samuagiake.

¹⁹Ijadufuo nika kojo giriesaekina Godi fu karauniaga ja rade vame ma karivako ije abeno kiae.

²⁰Areme Jesu fu urina kiae, Ja maza ije e bijaevo bu usiaena sidove Jerusareme okurakuva ni vierafero Jerusareme bune dabe arafirikuvejo ja vierafedufuo.

²¹Ijadufuo e ije erarebe ja sakae Judia guove ijia karivo ije ni subina uruo ijia vafo. Ro kuke e ije erarebe ja sidove guove ijia karivo ije ni subina vafo. Ro erarebe ja sidove ije arena usiae vaeva ije jade una sidove ijia ruovo.

²²Ijadufuo maeje maza ije ire ise bu redufuo ije bune buki akae ijia isoena kuae. Maza ijia bu e ume igia oenoeva ije abero ire boeje ume igia naovo ije kame isekafiaga fu vua ijiakuma riareke.

²³Ijadufuo rade ire ise ije fu ume igia remo ije bara e fudieva ijiakiro ame iviama nafeva ije buka irufui abeke. Ro maza ije Godi fu e Jiusi ije ziegafiamo ijia e boeje aesakae ijia kariva ije buka ma uruke isejavaedafuo.

²⁴Ro maza ijia e bijaevo ije bu e gue kaniaga gue bu kaenamiana una e binobuo aesakae ijia uniake. Ro sidove Jerusareme ije bu e Jiusi baki ijiebe dabe arafiri vakuma areme rade maza buone fu furikuma bu ijia arekono kiae.

²⁵Jesu fu ijiege kuaria areme kiae, Bu ijiege rekega nuga mamekanu bino bu mazani ro asame ro zuvi saove gufia ireva ijia rega bu giake. Ro kuke ume igia fuka majaufi ireobo ufike davare fuka urukeigia ufega e boeje buka uri totenamikinu jumeke.

²⁶Ijiege rena Godi fuka ire boeje saove gufia noavo ije kame urukeigia uvega e bu ije giana kuaeko, Ire ije fubite irerebe ume igia rekuveno kuaeke. Ro ire ijadufuo daro ije fu bu kekuma buka ireobo oe bijukuriadufuo.

²⁷Areme maza ijia Ema ijiebuo Fari ige na una amite uve ijia daro ro sanaema none ijiakuma roga ja gieke.

²⁸Ijadufuo ja oenoega ire boeje bune zinuevena revogakuva nika oemarefo. Ijadufuo maeje maza ije Godi fu ja karauniadufuo ije fune ivuaremono kiae.

²⁹Areme Jesu fu vua be ijiege mena kuariana kiae, Ni ine makame ro ine gue bu a kanavo ije vierafefo.