Luku 1:54-65

⁵⁴Baame naimanya yumbange dupapi, Apotakame dokopi, Apotakamenya mandipaenya mandipae palitami dupa pitakapi dupa nisotona leamoli pyoo, baanya kondo kaenge mana doko kame sala nayao kalai akali Isataele dupa nisoo kateana,” lao Matiame wee joo lea-pyaa.

⁵⁶Dopa latala baa Ilisapetapa kana tepomapi mende pitipala baanya andaka pilyia-pyaa.

⁵⁷Indupa enda Ilisapetanya wane mandipenge gii doko epeamopa, wane ane mende mandea-pyaa.

⁵⁸Enda dokonya makisa katengepi palupi dupame wane doko manjomo lapae sepala Kamongo dokome baa etete kondo kayalame lumu lao Ilisapeta mona yaepeamoliaka piami-pyaa.

⁵⁹Koto kalange pateamopa koto tukulapo dokonya wane ŋaŋa dokonya elya pingi kambu kepakamaipenge gii doko epea-pyaa. Dokopa endakali dupame limbatala wane doko baanya takangenya kenge lengeli pyoo, “Sakataya lamana.” leami-pyaa.

⁶⁰Dopa leaminoaka doko, endangi dokome dokaita lamaiyoo, “Daa, wane doko kenge Jone lamanana!” lea-pyaa.

⁶¹Dopa leamopa dokaitame baa lamaiyoo, “Embanya apangepi kaiingipi kenge doko lenge mende nakatengena,” leami-pyaa.

⁶²Dopa latala kingimiaka makande pyoo takange doko pisoo pituu, “Embame wane doko kenge api lakamili lao masilipi?” leami-pyaa.

⁶³Dopa leaminopa takange dokome pepa pingi selesa mende peena lao kingimi makande pia-pyaa. Selesa mende maitiaminopa pepa pyao pituu, “Wane dokonya kenge Jonena,” lao baame pepa pia-pyaa. Dopa lao pepa piamopa endakali dupame kandatala mona andeami-pyaa.

⁶⁴Gii dokopaka pupae lao Sakatayanya nengekaita dee lumbiamopa baame Gote lao tama pia-pyaa.

⁶⁵Dokopa baanya makisa katenge endakali dupame paka kayami-pyaa. Jutia yuu manda dupanya katenge endakali pitakame Sakatayapi enda wanepi dutupanya lao pii longo lao tayami-pyaa.