LUKU 1:48-72

⁴⁸zaakɛ à ma yã dà, mamↄma à zↄ̀bleri kɛ̀ mɛ́ɛ ká pↄ́ke lɛ́zĩroo. Zaa tia ai gurↄ píngi weé bemɛ aubarikadeemɛ,

⁴⁹zaakɛ Luda gbãade yã bíta kɛ̀mɛ. À tↄ́ kú adona.

⁵⁰È wɛ̃nda dↄ̃ gbɛ̃ kɛ̀ aↄ̃è a vĩa kɛɛnↄnɛ ai ń boriia.

⁵¹À a gã̀sã pòro à a gbãaa ↄ̀dↄańnɛ, à ĩadãrinↄ fã̀akↄ̃a kↄ̃n ń laasuunↄ.

⁵²À gbãadeenↄ bↄ̀ kpatan, à talakanↄ sɛ̀ lezĩ.

⁵³À pↄ́ maaanↄ kpà nↄadɛrinↄa aↄ̃ kã̀, mↄde à ↄↄdeenↄ gbàrɛ ↄkori.

⁵⁴À a zↄ̀bleri Isarailinↄ ĩan ká, aↄ̃ yã e sãnlo.

⁵⁵À wɛ̃nda dↄ̃̀ Ibraĩnɛ kↄ̃n a borii pìnↄ lán à ò wa dezinↄnɛ nà.

⁵⁶Mariama vɛ̃̀ɛ kↄ̃n Ɛlizabɛtio lán mↄ aagↄ̃ↄ bà, ben à tà bɛ.

⁵⁷Ɛlizabɛti nɛ́'igurↄↄ kà, ben à nɛ́ ì gↄ̃gbɛ̃ ũ.

⁵⁸Kɛ̀ à fáandideenↄ kↄ̃n à danɛnↄↄ mà lán Dii wɛ̃nda dↄ̃̀nɛ nà, aↄ̃ pↄnnaa kɛ̀o.

⁵⁹À gurↄ sↄraagↄ̃dee zĩ aↄ̃ mↄ̀ bã̀ngu kɛ nɛ́ pìnɛ, lɛ wà à de Zakari tↄ́ kpánɛ,

⁶⁰ben à da bè: Auo! Weé à sísi Yaayamɛ.

⁶¹Aↄ̃ bènɛ: Gbɛ̃kee kú n danɛnↄ tɛ́ kɛ̀ à tↄ́ beee vĩro.

⁶²Ben aↄ̃ yã ò à denɛ kↄ̃n ↄↄo, lɛ wà dↄ̃ dian à yezi wà tↄ́ kpánɛ nà.

⁶³Zakari walaa gbèka, ben à kɛ̃̀a: À tↄ́n Yaaya. Yã pì bↄ̀ ń saɛ ń píngi.

⁶⁴Gwe gↄ̃ↄ à nɛ́nɛ gùɛ, à lɛ́ bↄ̀ èe yã oo èe Luda sáabu kpaa.

⁶⁵Ben vĩa ń fáandideenↄ kũ̀ ń píngi, ben Yudea bùsu gusĩsĩde gbɛ̃nↄↄ e yã pì tↄ̃kɛ̃ɛ ń píngi.

⁶⁶Ben gbɛ̃ kɛ̀ aↄ̃ yã pì mànↄ kũna ń nↄ̀sɛ guu wà bè: Bↄ́n nɛ́ pì égↄ̃ dɛ a ũ ziaa? Zaakɛ Dii ↄↄ ligazimɛ.

⁶⁷Luda Nini sù à de Zakaria, ben à annabikɛyã ò à bè:

⁶⁸Wà Dii Isarailinↄ Luda sáabu kpá! À mↄ̀ à a gbɛ̃nↄ bò.

⁶⁹À Mìsiri gbãadee bↄ̀we a zↄ̀bleri Dauda bori tɛ́,

⁷⁰lán à ò a annabinↄ gãzĩ nà zaa gìkɛna.

⁷¹Aↄ̃ bè eé wa sí wa ibɛɛnↄa, eé wa bↄ gbɛ̃ kɛ̀ aↄ̃ zàwaguu pìnↄ ↄzĩ.

⁷²Lɛmɛ à wa dezinↄ wɛ̃nda gwà lɛ, à bà kuunańyo yã e sãnlo.