Lukas 1:48-72

⁴⁸Ana loti-mete natalolole au ena, Ndia hatahori neondan fo sosoan taak ia. Numa hatematak ia neu, basa hatahorir tao au ia leo, ina mana mauak nalan seli,

⁴⁹nahuu Manetualain tao dedeꞌa heran nara neu au. Ndia naa, mana Koasa Mateꞌen ma Malalao Ndoos.

⁵⁰Manetualain soa natudu dale kasian neu basa hatahorir mana fee hada-horomatak ma rakaluku-rakatele neun, numa tanak esa neni tanak esa neu.

⁵¹Ana pake koasan, fo tao nala hatahori mana koa aok kara ramue-anggik.

⁵²Ana hai heni hatahori mana toꞌu koasar, nahuu sira nekededema aon nara. Tehuu Ana soꞌu botik hatahori mana makaloloe aok kara.

⁵³Ana hao-hani hatahori mana ndoe-laꞌak kara losa rakabete, tehuu Ana husi heni hatahori kamasuꞌik kara fo ara laꞌo ro lima roun nara.

⁵⁴Ana tulu-fali Ndia hatahori Israꞌel asa, ma soa natudu Ndia dale kasian neu sara.

⁵⁵Lele uluk, Ana ndara fangga hehelu-bartaak no ita bei-baꞌin nara, fo ndia, baꞌi Abraham no basa ndia tititi-nonosin lalaꞌen. Hatematak ia hehelu-bartaak bei neni ndara fanggak seku neu.”

⁵⁶Boe ma Maria leo no Elisabet losa bulak telu. Basa de ana fali neni ndia uman nai Nasaret neu.

⁵⁷Fain losak ka, boe ma Elisabet bonggi nala ana touk esa.

⁵⁸Hara liik naa natanggela neni ndia nufanelun ma nggoro isin nara rae, Manetualain natudu dale susuen, de fee anak esa neu Elisabet ena. Boe ma basa sara ramahoko.

⁵⁹Neu kakanak naa bei fo faik falu, boe ma ara sunat ana, tungga hatahori Yahudi hohoro-lalanen. Ara rae foi kakanak naa, nade Sakaria, tungga aman naden.

⁶⁰Tehuu inan nareresi nae, “Ta bisa talo naa! Muste nade Yohanis!”

⁶¹Tehuu ara bala rae, “Tao hata de here nadek Yohanis? Ta hambu hatahori esa boe na nai ei nufanelum ndia pake nadek naa!”

⁶²Boe ma ara dududuk Sakaria fo sangga bubuluk ana nau foi kakanak naa nade see.

⁶³Sakaria dududu fo noke batu lei. Ara feen, boe ma ana surak nae, “Ndia naden Yohanis!” Boe ma basa hatahorir heran bali-bali.

⁶⁴Medak neu ma, Sakaria maan mana barakaik naa, bangganaꞌu tutik kana. Boe ma ana soꞌuk koa-kiok neu Manetualain.

⁶⁵Basa hatahorir fo mana leo deka-deka rai naa, ramataꞌu ma heran. Boe ma tutuik naa natanggela numa bafak mai neni bafak neu, losa hatahorir marai profensi Yudea leten nara oo bubuluk boe.

⁶⁶Hatahorir fo mana ramanene tutuik naa duduꞌa rae, “Manggaledok ena, Manetualain koasan sama-sama no kakanak naa. Neu ko namoꞌo mamais a, ana dadi neu hatahori dae-bafok rupak leo beek, ou?”

⁶⁷Basa boe ma Manetualain Dula-dale Malalaon maso neni Sakaria neu. Huu naa de ana kokolak nae,

⁶⁸“Koa-kio Lamatuak, hatahori Israꞌel Manetualain! Ana mai ena fo tefa-soi nala Ndia hatahorin nara, mita fo ara boso sama leo ata-dator bali.

⁶⁹Manetualain soꞌu nala Hatahori esa ena fo Ndia koasan ta neni babanggak, fo neu ko Ana tao nasoi-nasoda ita. Ndia ia, numa baꞌi Dauk tititi-nonosin mai.

⁷⁰Manetualain helu-bartaa memak basa iar ruma lele uluk mai ena, pake Ndia mana toꞌu dedeꞌan fo dalen mahanik kara.

⁷¹Hatematak ia Ana nau nakamboꞌik ita numa ita musun nara mai, ma numa hatahorir fo dalen nara mburuk neu ita mai.

⁷²Ana natudu Ndia dale susuen neu ita bei-baꞌin nara, nahuu Ana nasaneda taa-taa neu Ndia hehelu-bartaan neu sara, fo Ana ndara fangga no baꞌi Abraham.