Luku 17:7-12

⁷“Akali nyakamanya mendenya kendemane mendeme mendasa ee kalai pyoo katao tamopi dee mena sipisipi setao katao tamopi maitakao andaka ipatamopa embame baa lamaiyoo, ‘Emba yapa ipao pitipala nee naa,’ latepe?

⁸Daa, dopa nalenya embame kendemane doko lamaiyoo, ‘Emba nee endakipi tenda natale namba wambao natoo depa latakala emba lapalapa epe mende nyoo ketae petala nee natoli pyoo minakao ipu!’ late daape.

⁹Kendemane dokome embanya pii latenoli pyoo pitamosa embame baa lalyetepe? Daa, lalyala nayate.

¹⁰Dopaka pyoo Goteme nyakama kandao, ‘Pyepa!’ latamo dupa pitaka petala dokopa nyakamame dapa laapape: ‘Naima kendemane endakaliaka dupame naimanya isingi akalimi kalai pyepape leamo dutupa ikiaka petelyamanona,’ laapape,” Jisasame lea-pyaa.

¹¹Jisasame Jetusaleme paanya yuu Samatiapa Galilipanya kaina dokonya kaita pea-pyaa.

¹²Baa pao yuu taono endakali kuki palenge mendenya pyakameamopa, akali kopetali kingi ita mendeme kaitinisa baa kandeami-pyaa. Dokaitame tengesa naipao omosale katao baa kandao puu lao wii latala, “Isingi Akali Jisasa! Embame naima kondo kayape!” leami-pyaa.