Luku 16:23-30

²³Hande hamoko halita꞉ oni ti to hala꞉ ale pa꞉ta꞉ puaata꞉ tanda tieke minolo hata꞉ handa꞉liaeyekepate Eipoloha꞉ma꞉ La꞉satesi yaapo lopula alu pea pitipikieki papate haepekeeki handeekeme.

²⁴Koto ekina꞉ ipikana꞉ma꞉ anekema꞉ wi alo hata꞉ alota꞉ Apa꞉ Eipoloha꞉ma꞉o. I̱ pa꞉ta꞉ a꞉ta꞉ma꞉ homa꞉e. Do ti to hala꞉ ekima꞉ I̱ tanda tieke peaasa꞉ ekina꞉ La꞉satesima꞉ ipika꞉ kiki ma̱lekema꞉ ikali pa꞉ta꞉ tenke lao yaka kekeke kosa꞉ pina꞉yeke wataena꞉ tapae laa leekeme.

²⁵Koto leekepate Eipoloha꞉ma꞉ma꞉ alota꞉ Ya wekio. Hone niminae. Neketa꞉ hande kenkena꞉ hae natena꞉ta꞉ kota꞉ epeke alemanu wotu wia haepate La꞉satesita꞉ ota꞉ hoke alemanu homeke mia꞉me. Kutu piekepate ameta꞉ ipikita꞉ ta꞉na꞉ma꞉ homo haena꞉ta꞉ neketa꞉ tanda naleme.

²⁶Kotoeki manuta꞉ koto ya꞉la꞉pate ma꞉nda꞉ta꞉ nika꞉ haloma꞉eki tukiki pa꞉ta꞉ hombo tieke ula꞉ ekima꞉ do diki halopa꞉ nane haloma꞉ wanda꞉hali ma꞉nda꞉ta꞉ ta neke hale nane ipuluekema꞉ taapelemepate a꞉pa꞉peke na ya꞉lieke. Kutupa neke hale nane haleme wanda꞉hali ma꞉nda꞉ta꞉ doane ipuluekema꞉ taapea꞉ka꞉na꞉ta꞉ a꞉pa꞉peke na ya꞉lieke leekeme.

²⁷Koto leeke mo hamoko halima꞉ alota꞉ Apa꞉o. Kota꞉ I̱ma꞉ neke honke aloma꞉ yaka apa꞉na꞉ da nane La꞉satesi pena꞉ tapae.

²⁸Koto pa꞉ta꞉ta꞉ yaka kame tonu yunki hata꞉ halemema꞉ iki make do tanda pu hala꞉ alena꞉ a꞉paama꞉na꞉yeke La꞉satesima꞉ kinki pulu pena꞉yeke loa꞉me leekeme.

²⁹Koto leeke handa Eipoloha꞉ma꞉ma꞉ alota꞉ Naka꞉ kame tonuna꞉ kinki pita꞉la꞉ pi manuta꞉ Mosesima꞉ make potopede haliwekima꞉ amba꞉ lao ula꞉me. Naka꞉ kame tonuma꞉ mo haliwekina꞉ pi opina꞉e laa leekeme.

³⁰Hande hamoko halima꞉ ipika꞉ pi hombo peaaso alota꞉ A꞉pa Eipoloha꞉ma꞉o. Kotota꞉ ana꞉ dia꞉me. Pate amba꞉ homeeke hali ma꞉nda꞉ma꞉ paa tiao lolo pea꞉ka꞉na꞉ta꞉ kota꞉ mo haliwekima꞉ ika꞉ hoke hau peleme ekimanu hoki walimikie laa leekeme.