LUKA 16:23-30

²³Muige Urasamkak utebge, ge e au asiasi digier, e egremada Abramai erdari aumurizge a Lazaro ge abidoge timireder.

²⁴Ege eudige ererekri, “Baba Abrama! Ma kari omarge tarakai: ma Lazaro temarik e tabara tagpim nige watakmei a watabakiamu kara werut gebem waitimuar ableglam kaka asiasi digili muige able urge!”

²⁵Ege abi Abramade tidetagri, “Kara werem, ma mena dikepwali nako mama idid watarali mai gair debelu ma watirepli. A Lazarode ya gair adud lu watirepli. Able kerker pe irdi epe sererge dali mape asiasi pema digili.

²⁶A nerut pe dikeredi, able aukaka muimui awak pe merbidoge eipuge iperedi, ya waiakai netat lelut umerkak wadatupi kerbialam obakiamu mari watarardar, a netat lelut umerkak watadatupi kei watabakiamu kerbim pe nade mama tarali.”

²⁷Ege able lugizira apu akaidari abi detagri, “Baru bab, ka marim bagwi, ma Lazaro emarik obakiamu kari bab metage

²⁸pe nade kara 5 barada turidli. Ma abi emarik yabi umerem watadaratagrare ya waiakai wi umerkak watabakiauare able asiasi utebem.”

²⁹Abramade abi detagri, “Mari baradara tuduridli Mose a perepeta ko yabi umerem watadaratagerlare. Mari baradagize umele yabi watarasorlare.

³⁰Ege lugizira apu akaida abi ikaidari, “Nole bab Abrama, wi umerkak yabi watarasorlare! Ese netat le eudlam wekiam a yabim obakiamu wi ya taba witlam watabatare.”