Luke 8:13-39

¹³Edo vero banga tamonda duduritera awa engo embomai ge awa ingido do yawade budo era. Ata ge awamaneda doda besinya piae, awamane iji tupo God gebé edo era. Ata iji angode bawari gumburi awamaneda gebé ari dodo taigedo era.

¹⁴Edo vero kurere teoroda duduritera awa engo embomai ge awa ingido ainto eiworo kotembari jiwaemi do buriya ari, gaiapade ain, edo tamopisida jipapa ain arimi pasiuri awamane be dave ekae edo era.

¹⁵Ata vero butu daveda piesiri duduritera awa engo embomai ge awa ingido do davebé davede ge awa jido takimbedo era, awa tataimbarimi be dave ekedo era.

¹⁶“Edo daedo embo aimi keimo ijimbedo ou kuwoda piari tao ae o awari tenemba dutuda piari tao ae. Ata ainda petari yaida pieuri ami parara pisido eira, edo embo gundo mandoda totoreite parara awa gorote.

¹⁷Aindabé, rorae ro onjigarida itari awa kundo arapada piaina. Edo rorae ro apuregari itari awa pirigari arapa aina.

¹⁸Awatedo, ge nato ro ingevi awa jidogogo ewo! Aindabé, embo aimi ge awa do davebé davede jido takimaina awa God mi kondade edo gari teka piaina. Ata embo aimi ‘Ge awa bainyae. Na matu gari!’ ango kotembeteira, awa saka ro ainda yai isira awa dodo baina.”

¹⁹Iji angode, Yesu da ai ae nanonameji de embo awa gaintedo guputera. Ata embo jisi da itera, awatedo, torido tambari tao ae.

²⁰Ango etero gido embo neneimi ainde sitera, “Ito ai ae nanonameji de awa arapada petetera isite imo gain jipapa era.”

²¹Ata ango tetero Yesu mi mina sisina, “Nato ai ae nanonameji de awa eiwamane ainkaimi God da ge ingido kera edo era.”

²²Ango edo deguta da (1)de Yesu ae ainda ambodani de un ma doda visido ami awamanede sisina, “Puwo! Kaende ubutu kupo neinda tembore. Ango tesiri awamane ma gaigedo tembari tuturo esitera.

²³Ata iji ainde awamane tepero embo awa durudo jitao ausina. Edo burigibé bisibubura bajina wotedo ubutu desiri ma utoro vivisiri awamane bouga bajinabé buritera.

²⁴Edo awamane gundo imo audedo sitera, “Badarari, Badarari, kaen betain era!” Ango tetero Yesu erido petedo ge okain bisi ae kakawa de tesiri, awamaneda wasiri dandedo damodamo etero ubutu binono dorisina.

²⁵Ata ami awamanede sisina, “Itomane gebé ari embo anda yai pipitevi?” Edo awamane adu edo korebé edo akuta ge mina tara esitera, “Embo eiwa averi? Ine ge okain bisi ae kakawa de siri ainda ge kera era!”

²⁶Ainda amboda awamane temundo yai Gadareni ainda maunsitera Galili ubutu kupo neinda.

²⁷Iji angode Yesu ma dodo tai butuda piesiri, embo da (1) nasi bajinada edo gupusina ami Yesu tapusina. Iji riboribé embo ainda doda binei isima edo esitera. Edo embo awa gongosini itae, ko ainda mandoda itae, ata goiari yaida isima edo esisina.

²⁸Iji ainde embo awa Yesu gido aorogatedo ainda taida dudurisina. Edo Yesu mi asisi beyae ainda doda awa idegarate tesiri ami aoro ikanade gatedo sisina, “Yesu, God Ikane bé Ikaneda Mai, imo namonde ro ain jipapa esi? Imo benunu tena, na dedo sitote!” (Iji jiwae bineimi embo awa dedo dumundo esisina. Awatedo, embobomi asi okain aurimi ari ami ainda ipatai bundedo sima edo esitera. Ata embo awa asi okain aurimi ari jiuri kapeuri bineimi gisijido abu taoteda kundo maundo esisina.)

³⁰Edo Yesu mi tedogosisina, “Dao ito averi?” Edo ami mina sisina, “Jisi Da”, aindabé, binei jiwaebé embo ainda doda torari itera, awatedo.

³¹Ango edo bineimi Yesu de benunu tedo dowae esitera, ami ge okain tari awamane God da rirowa bari yai ugonuda mamborekae.

³²Edo iji dá ainde pumane jisi da peji tembada rorae indeite isiretera. Awatedo, bineimi Yesu de benunu tedo dowae esitera, “Nakare awara ato maundo pumaneda doda torore.” Edo ami awara sisina.

³³Ango tesiri binei emboda doda awa dodo idedegedo maundo pumaneda doda totoritera. Edo pumane jisi da adujinanga edo tumundo maundo dedewada wotedo un ubutuda dadagumbedo un injido bebetegesitera.

³⁴Iji angode pu sima ari embobomi wasiri ro idegesira awa gido adu tumundo maunsitera. Edo bino awa nasi bajinada edo indari kumbari urari nasida karigetero gositera.

³⁵Ango etero embomai idegedo wasiri nongo esiri teri awa jisimi gain maunsitera. Edo awamane Yesu da yai gundo embo binei matu dodo idegetera awa taputera. Embo awa ombarijiari ari Yesu da taida anumbedo kotembari dave bureite isiri gido adu esitera.

³⁶Edo embobo avekave wasiri awa gositera ami daedo Yesu mi nongo esiri embo bineimi bundari awa kaviyegesiri awa embo teteka gumbera awamanede tetero gositera.

³⁷Ango edo embomai berari yai Gadareni doda adu ari bajinabé buritera. Awatedo, awamanemi Yesu yai neinda mambarate sitera. Ango tetero gido imo ma doda visido overegedo mamain esisina.

³⁸Edo embo binei doda idegesitera, ami Yesu de benunu tedo dowae esisina, “Imonde daedo mamanita?” Ata Yesu mi embo awa pipiteite sisina,

³⁹“Dodo egenembedo orobe itoda mambuyo! Edo awamane teyo goré, God mi wasiri babain ro imo embo esira awa!” Edo embo awa dodo maundo nasi bajinada doda embomai berari ainda itera awamanede Yesu mi wasiri babain ro imo embo esiri awa karigesimene maunsisina.