23Iˀḏi ovâytu̖ˀan, “Maḏi undi nä́ˀi tuní, heḏá tꞌowa-á dovâyt tꞌowa ditû̖ˀdi dítu̖ˀâ̖a̖mí, ‘Woekandi, páaḏé bipihehkháaˀa̖mí.’ Han ítú̖ḏáho unbí híˀ ginnân úntundaˀí: Un ítꞌoe háa ee Capernaum búˀay dáyˀannin, heḏiho nää-á nä́ä naví ówí̖nä́ wáˀ han waagibá naa dînkhâyˀä̖ˀ dáyˀa̖míˀin.
24Hewänbo naaḏá taˀgendi wâytu̖ˀa̖mí, wí Jôesi Táḏáví tukheˀbiˀ-á iví nange iweho wíˀóesígíˀohpí.
25Naaḏá wâytu̖ˀa̖mí háa báyékí pa̖a̖yo phaḏe taˀgendi napóeˀin, Jôesi Táḏáví tukheˀbiˀ Elijah nawówájiˀ ihayḏi. Pojeḏá píngé pa̖a̖yo wíˀikwa̖ˀnanpí, heḏiho tꞌä̖hkí iˀ nange wáy báyékí diha̖a̖póe. Heḏi tobá Israel-win kwiyä̖ˀ inbí senäˀ díntꞌahánnin báyékí diji wänboˀ, hä̖ˀin kwiyä̖ˀbíˀwepiye Jôesi Táḏáḏí Elijah óesaanívíˀweḏi oe Sidon búˀpiyân óesan, wí búˀ Zarephath gin dâytu̖ˀoˀ iwepiye, wí kwee iví sen ûnchuuˀiˀ óekhä̖geˀnamíḏí.
27Heḏá wáˀ Jôesi Táḏáví tukheˀbiˀ Elisha nawówájiˀ ihayhä̖̂ä̖, báyékí in Israel-win diphéetaymuu, heḏi wénä wänbo in wíḏiwówapí. Wí sen Naaman kin nakhá̖wä̖́ˀiḏa̖ˀmân nawówa, heḏi i-á Syria nangewi-ân namuu.”
28In méesate ee dikwꞌóˀnin nä́ˀi ditꞌoe ihayḏi hânho ditꞌayyaapóe.
29Tsíkhagipí dívíwí̖núḏí iˀ búˀḏí jáˀwépiye Jesus óechä̖nupiye. Iˀ búˀ-á okú wáhkí nakꞌóe, heḏi oe okú kwꞌáyepiye óepiye tꞌowá kꞌáygéḏí óekeˀtꞌâave-íḏí.
30Hewänbo i-á inbí jáagé i̖ˀge naphaḏeḏiboˀ iweḏi namää.
Luke 4
Luke 4:23-30