Luke 1:56-75

⁵⁶Ango edo Mary kariga tamonde (3) ae Elizabeth de sima edo tekago overegedo ainda nasida maunsisina.

⁵⁷Awara, Elizabeth da mai bari iji gumbiri imo mai jianda engisina.

⁵⁸Ango esiri ainda nasi aikae embotopo de matomono demi Badari da do ari bajinabé eutu ainda yai piesira awa ingido ae Elizabeth de daedo yawa edo esitera.

⁵⁹Edo deguta 8 biri ainda, embomai jiwae guputera, mai saka ainda tamo jiugari awa embo. Edo iji dá ainde mai awa ainda mamo Zacharias awa nombo tain sitera.

⁶⁰Atako ainda ai mi awamanede sisina, “Ango ainyae! Mai einda dao awa John tara.”

⁶¹Ango tesiri awamanemi mina sitera, “Orobe itoda dao John awa itae.”

⁶²Edo ainda mamode ipami iwata kawata eite sitera, imo ainda mainda dao ro piain jipapa eiri, awa tarate.

⁶³Ango edo Zacharias ove gaiari rorae jipapa esiri pietero, “Mai ainda dao John,” gagurisina. Ango esiri gido embomai berari korebé esitera.

⁶⁴Edo iji dá ainde God mi Zacharias da be pirigedo iwawa udegesiri ge site God dasiga esisina.

⁶⁵Ango esiri gido embomai demonda berari adu edo do buriya esitera, edo bino awa yai Judea da nasi peji tetembada jiari berari ainda tedo tedo etero arapu esisina.

⁶⁶Edo embomai berarimi bino awa ingido domi kotembesitera, “Mai eiwa bajido buro ro aini?” Edo Badari da goroba awa ainda yai.

⁶⁷Edo ainda mamo Zacharias awa Asisi Kotopu mi sirido gisijiri God da ge karigedo sisina:

⁶⁸“Puwavi! Kaende Israel embomainda Badari God dasiga oré. Ami gundo ainda embomainda yai udegari piesira.

⁶⁹Edo ami Tonembari Embo goroba kaena embo jiri erira, ainda buro embo David da orobeda.

⁷⁰Ami ainda peroveta kokotopude matu tarigari​ ​ango sisina awa.

⁷¹God ainda Tonembari Embo piari gundo kaena gitopo emboda yai awa tonemaina, edo daedo sinigambari emboboda ipada awa​ ​dodo kumaina.

⁷²Ami sisina awa, ainda do ari kaenato ewowo gawowoda yai arapa aina, edo ainda piari tembari kotopu isira awa ruvegainyae.

⁷³Ami tarigari okain ewowo kaenato Abraham de sisina awa, imo gundo kaena awa gitopo embobo kaenatoda ipada awa dodo kumaina, edo kaena adu itae imo tumondebain ara.

⁷⁵Awatedo, kaena ainda jisida, kotopu edo wasiri dambu darari ango itara iji berarida.