Lucas 1:56-75

⁵⁶Hari. Masiko ahoarabakosiki vani hoja'ihi ida Maria Isabel vakadiania. Naothinia ajihi'ihi, Nazaré sidajia joi'ianahi.

⁵⁷Hari. 'Bana'ihi ida Isabel. Makhira ada isai.

⁵⁸Oniaroa, ija'ari Isabel gorani maakarinia vahojaki, kidija'ari vihiki khama, vakamitha'iki ida Isabel kaisai 'bana'ina monina. Vaabono vakani'akhama'aha: —Ada banini hi'aha Isabel kaisai. Jahaki ada Deus vakadimoni hina. Na'arihavi hini kaba'i, Deua bikajoamoravini isa'ihi — vakhani'aha. Khai vakhani'aha adani ija'ari vaipohiki Isabel khama.

⁵⁹Hari. Semana hoarani-ra vahoja'aha ada isai, vakarajomi'aha siikosida rajomia. Isaia bivahojaki kania vakaikahi'aha adani Zacarias, Isabel, vakadija'ari vihiki. Sasidotxia bikarajomi'aha ada isai, Deus kaija'ari hira kaimoni. Vanofiki ida isai-ra vanaonivini Zacarias, kidiabi'i onina.

⁶⁰Isabel va'ora ni'aha: —Iniani. Kodisai-ra anaonivini João.

⁶¹Oniania, vakhani'aha: —Akadija'ari vakadiania ni-hojaki ada makhira João oniki.

⁶²Ni-varavarana-ra kaaboka'iaki kaho ada isai kaabi'i, oniani ida vasa'a vanana'dohivini hija: —Hana hini onii ida inofija kadaisai onina kaimoni hini?

⁶³Zacaria bikanofiki ida tábua kapitani kapa'itxi, isai onina-ra najirivini ibavini kaimoni. Biagathani'ihi, bikanajiri'ihi. “Isai onina João.” Ija'ari vahojakia vakava'ibodivaranikaraho'aha.

⁶⁴Oniania, Zacarias bikaaboka'ianahi ida varavara'ianana, athi jahakia Deu-ra vara ni'a'aha.

⁶⁵Ija'ari Zacarias gorana maakarinia vahojakia vakava'ibodivaranikaraho'aha ada Zacarias varavara'ianana. Ija'ari vaibavi ipohikia avaadahaoni'aha, vara vavani'a'ihi ida isai monina. Judéia kaaraboni namahimahionahakia akarafarakhama'iki ida isai monina.

⁶⁶Ija'ari vakamithava vakava'ibodivarani'ihi, vaabono vakanana'dohikhama'aha: —Karaho'aha ada isai, nahina koda bana kabadanira ada? Deus danona hojani-ra avigavini mani ida isai kania.

⁶⁷Hari. Oniaroa, Ma'onahai Jahaki Zacarias va'i-ra nahonariahihi'aha. Zacaria vara bivani'ahi ida nahina namitha'iariki Deua binava'isohivini hi'iki. Bini'aha:

⁶⁸—Vara avani'ava ida Deus akadika'da'di jahana, ovani ada Israel kaija'ari vakadiDeus hira. Va'ora akava'ijoa'iki adani kidija'ari gathaki fori vihijanarara kaimoni.

⁶⁹Deua bikaronaki ada aihotahi abono danoki haria kajoamoraki kaimoni hina. Deus kahonai abono Davi kohana oniki kahanodi namitharonisiagaki ada aihotahi abono.

⁷⁰Deus va'ora nava'isohi'bo'da'iki adani athi namoniva abono vajahaka'oaki kohana. Oniaroa, vananamitha'ihi ida Deus athi. Vani'aha:

⁷¹“Deua bikaronaki bana ada aihotahi abono akadiania. Akadija'ari-ra va'ora akava'ijoaki bana ada ija'ari haria vavajahariki vasa'a kabodinia.” Vakhaniha adani Deus athi namoniva abono.

⁷²Zacarias asia vara niki: —'Bo'dakari Deua vara bivani'aki ida akadija'ari avikhananavaki-ra va'ora va'adivini, binanamithaki jaboni ida athi jahaka'oaki Deus kava'iponahi a'bo'daki.

⁷³Deua binava'isohijora'iki ada akadi'arahoda okhananavaki Abraão Deus kava'iponahi a'bo'dakia. Deua bini'aha: “Abraão. Deus ka'oa ohina mani ida ira onava'iponi'imariniravini hija. Va'ora oakava'ijoaki bana adani kadaija'ari vanamitharonisiagaki. Va'ora osaariki bana adani ija'ari va'ora vavajahariki vasa'a kabodinia. Va'ora ova'aha'iki bana adani kadaija'ari, vaofinirina oadani bada vani'ahaha'oadahaki bana ida kodibadani”. Deua bini'aha ada Abraão kohana — niha ada Zacarias.

⁷⁵Asia vara niha ada Zacarias: —Deua binofiki ida haria akava'ijoavini akadimahi-ra nasohira kaimoni, bada ani'aja kaimoni ida badani Deua bivajahaki mahi hahavi arihokina oadani — niha ada Zacarias.