Luke 11:18-24

¹⁸Arrantherran iterreyel, atyetyart arrenty-rnem-wenhel ayenh rlterrkelerl-anenty-arrpantey. Arrangkwarl yanhey! Ran atyetyart atyeng aney-angenharl. Ran atyetyart arrenty-rnemewantarl aneyel. Nthekwern ra arrenty-rnem irrentey-angenh, ra atyetyart arrenty-rnem irrpetyapew aneyelpewerr. Nthekwern atyetyart arrenty-rnem-wenhel ikwerenh-rnem irrentey-angenh, arrangkw.

¹⁹Arrantherr iterreyel, rarl ayenh rlterrkelerl-anenty-arrpantey, arrenty-rnem irrent-aynteyew. Iterrenh-arey arrpemarl arrantherr! Arrewantherrenh-rnem-alew, rernemarl arrenty-rnem irrentey-angker arrpemarl? Arrenty Satan-elang renh-rnem rlterrkeley-angenh, arrangkw! Nga alakenh angkenty, rernemap ngkweng ahelerrem, rernemarl ilem, ‘Rlterrk Akngey-wenhelant arrenty irrentey-angker.’

²⁰Akngey atyetyart ilkwanem ingkerrew anem. Arawerrng ikwerenh-akertel athan arrenty-rnem irrentey-angker inngarl. Anngel arrantherr aley areyel.”

²¹Jesus-el angka ingwer-anem ilenh, arawerrng Akngey-wenhan rlterrk Satan-wenh-angkwarr. “Artwa rlterrk ilkwel warl ikwerenh arntarnt-arem. Rarl alakenh arntarnt-arem, ilek-ilek ikwerenh mwanty ayntem warl kwenel. Ingwerentyakel nthakenh irrtyert-iney-angenh.

²²Artwa ingwer rlterrk innga ikwer-angkwarr apetyenty, renhap athenemel atwem. Rap inem ilek-ilek warlelarl aynteyel-rnem, rap arlperrtyelemel anthem ikwerenh-rnemew-anem.”

²³Jesus angkew, “Ingwerenty atyeng ilkelhey-angenh, atyenh-wenyarl ra. Ran ingwer-rnem atyeng-warl akngetyey-angenh, ranap renh-rnem atyeng-wety thweneyelarl arleng.”

²⁴Jesus angkew ikwer-rnem, “Arrenty-wenh-angkwarrarl alakenh-anyeman. Ra artwa anyentel-arleng-tangkwel anem, ingwerentyelap renh irrentem-anem ikwer-they. Ra artwa renh iwerl-alhem-anem, rap alhem-anem, arlpaw-ampeny-warl-anem ywarn-antey nthwem, artwa ingwerew arternperreyew. Ran ament angkem, ‘Ayengan angkep artwa ikwer-warl alpem, ayengarl awank anenh-warl.’