Lukas 4:7-21

⁷Au sangga fee basa sala leu O. Kada O musi tao dedeꞌak esa dei, bei fo au fee. Kada lofoanak! Kada O makaluku-makatele neu au. Kada ndia!”

⁸Tehuu Yesus nataa nasafali nae, “Hambu nai bee leo ndiak? Huu nana sulak nai Manetualain Susula Malalaon dalek, nae, ‘O musi kada makaluku-makatele neu Manetualain. Ma kada o musi ono-lau neu Ndia.’ ”

⁹Basa ndia, boe ma nitu la malanggan noo Yesus neni kota Yerusalem neu. Nai ndia, ana noo Yesus hene leni Uma Ina Huhule-Haladoik mamana mademan neu. Boe ma ana nae, “Mete ma O ia memak Manetualain Anan, na, O palaboku dae muu leo!

¹⁰Huu nana sulak nai Manetualain Susula Malalaon, nae, ‘Dei fo Manetualain fee Ndia ata nala leme nusa-sodak mai, fo ala lanea O.

¹¹Dei fo ala latanee O, fo suek O eim ta deta laꞌe batu faa boe.’ ”

¹²Tehuu Yesus nataa nae, “Boso babalik Au. Huu nana sulak nai Manetualain Susula Malalaon nae, ‘Boso soba-dou Manetualain!’

¹³Nitu la malanggan soba-dou Yesus no dalak mata-matak, tehuu ta nala sana. Boe ma ana laꞌo ela Yesus, de nahani fai mandaak.

¹⁴Basa ndia, boe ma Yesus fali neni propinsi Galelea neu bali, huu Lamatuak Dula Dale Malalaon feen koasa. Ta dook, boe ma hataholi la malai nusak ndia mulai lalelak Ndia naden.

¹⁵Ana nanoli nai hataholi Yahudi la uma huhule-haladoin, sudi nai bee. De, hataholi la koa Ndia, lae, “Yesus ndia, Hataholi ana seli, maa!”

¹⁶Laꞌi esa, Yesus neni Ndia nggolon Nasaret neu. Nandaa no hataholi Yahudi la fai huhule-haladoin, fo ndia ‘fai Sabat’, de, Ana maso neni uma huhule-haladoik dalek neu, sama leo Ndia natetemen. Boe ma Ana foꞌa nambadeik, fo sangga les nai Manetualain Susula Malalaon.

¹⁷De, ala lo fee Ndia baꞌi Yesaya susulan. Ana bukan, de Ana les, nae,

¹⁸“Manetualain Dula Dale Malalaon koasan nai au dalek. Huu ndia de Ana tudu au, fo au afada Lamatuak Hala Malolen neu hataholi kadiꞌi-taidae kala. Ana nadenu au, fo afada, ae, malai bui la, dei fo lakamboꞌik; mboke kala, dei fo lita lasafali; nana tuni-ndeni kala, dei fo lasoda lo lakamboꞌik.

¹⁹Huu hatematak ia, Lamatuak fain losa so, fo Ana tao nasoda Ndia hataholi nala.”

²⁰Les basa susulak ndia, boe ma Yesus lulu fali kana, de Ana lon neu malangga makaluku-makatelek, de, Ana nanggatuuk. Basa hataholi la malai uma huhule-haladoik ndia dalek, mete lahele Ndia.

²¹Basa de, Ana nafada hataholi la, nae, “Hata fo ei mamanenen neme Manetualain Susulan isinaak ndia, hatematak ia ana dadi so!”