Luka 4:7-21

⁷Adalese, te peljan ko kočija angla mande, sa ka ovel klo.”

⁸I o Isus phenđa lese: “Pisimei ko Sveto Lil: 'Per ko kočija samo e Gospodese, te Devlese, hem samo ole kande!'”

⁹I o beng anđa le ko Jerusalim hem čhivđa le upro najučo than e Hramesoro hem phenđa lese: “Te injan e Devlesoro Čhavo, frde tut akatar tele!

¹⁰Adalese soi pisime ko Sveto Lil: 'Ka naredini ple anđelenđe te arakhen tut,'

¹¹hem: 'Ka akharen tut ko vasta te na khuve tut preja ko bar.'”

¹²O Isus phenđa lese: “Vaćerdoi ko Sveto Lil: 'Ma kušin e Gospode, te Devle.'”

¹³I ked završinđa đijekh kušnja, o beng cidinđa pe olestar đi nesavi aver prilika.

¹⁴I irinđa pe o Isus, ano zoralipe e Duhosoro, ki regija Galileja, i šundilo o glaso olestar ko sa o krajo.

¹⁵I sikavđa olenđe ano sinagoge hem inele pohvalime sarijendar.

¹⁶I alo ki diz Nazaret kote barilo hem, palo plo adeti ko dive e savatesoro, đerdinđa ani sinagoga hem uštino te čitini.

¹⁷I ine lese dindo o lil oto proroko Isaija. Ov phravđa o lil hem arakhlja o than kaj inele pisime:

¹⁸“O Duho e Gospodesoroi upra mande adalese so pomazinđa man hem bičhalđa man te anav o šukar lafi e čororenđe te proglasinav: da o phandle ka oven oslobodime e kororenđe ka irini pe o dikhiba o mučime ka oven slobodna

¹⁹te proglasinav o adžićerdo berš e Gospodesoro.”

²⁰Tegani phandlja o lil, irinđa le e slugaste, i beštino te sikaj. I sare ani sinagoga dikhle ano leste.

²¹A o Isus lelja te vaćeri lenđe: “Avdive pherdilo o Lil savo šunđen tumare kanencar.”