Lukas 2:8-39

⁸Iwe, mi wor ekoch chon mas sip ra nonom lemälen ewe fanü, ra tümwünü folenier pwiin sip lepwin.

⁹Iwe, nöün ewe Samol we chon läng a pwä ngeniir o lingen ewe Samol a tinetiu wor, iwe, ra fokun niuokus.

¹⁰Nge ewe chon läng a üreniir, “Ousap niuokus. Pun nengeni, üa arongato remi ewe Pworaus Allim mi aworato pwapwa chapur, epwe tori aramas meinisin.

¹¹Lon ei rän ikenai eman Chon Amanau a uputiu ngenikemi lon ewe telinimwen Tafit, i Kraist ewe Samol.

¹²Nge ei epwe eu asisil ngenikemi: Oupwe küna eman mönükol a finifinila lon roron o konola lon eu lenien amongöü man.”

¹³Lon ewe chök otun eu mwichen chomong chon läng ra nom ren ewe chon läng, ra mwareiti Kot o apasa,

¹⁴“Kot epwe ling lon läng, epwe wor kinamwe won fanüfan ngeni aramas, chokewe Kot a pwapwa rer.”

¹⁵Nge lupwen ekewe chon läng ra feila seniir o feitä läng, ekewe chon mas ra kapasfengen lefiler, “Ousipwe feila Petleem o nengeni ei mettoch a fisitä, ewe Samol a asile ngenikich usun.”

¹⁶Iei mine ra feila fän pacheu, nge ra küna Maria me Josef, pwal ewe mönükol mi kon lon ewe lenien amongöü man.

¹⁷Wesin ar küna ewe mönükol, ra asilefeili ewe pworaus ra rong usun ewe mönükol.

¹⁸Iwe, aramas meinisin mi rong ei pworaus ra mairü ren met ekewe chon mas ra üreniir.

¹⁹Nge Maria a amwöchü ekei mettoch meinisin o ekieki usur lon letipan.

²⁰Iwe, lupwen ekewe chon mas ra liwiniti lenier, ra alinga o mwareiti Kot fän iten ekewe mettoch ra rong o küna, pun a usun chök met ewe chon läng a asile ngeniir.

²¹Lupwen a tori awaluen ränin ewe mönükol, wesin an sirkomsais, ra aita ngeni Jesus. Iei ewe it ewe chon läng a aita ngeni mwen Maria esamwo pwopwo.

²²Iwe, lupwen a tori ewe fansoun ar repwe föri ewe angangen alimelim fän iter usun met a fen mak lon Allükün Moses, Josef me Maria ra uwala ewe mönükol Jerusalem pwe repwe anomu mwen mesen ewe Samol.

²³Pun iei usun a fen mak lon än ewe Samol Allük, “Iteiten mwänichi meinisin repwe pin fän iten ewe Samol.”

²⁴Ra pwal uwato ar asor usun a mak lon än ewe Samol Allük: Ruoman lisom are ruoman apansüsün lisom.

²⁵Lon ena fansoun mi wor eman mwän lon Jerusalem itan Simeon. Ätei a pwüng o aleasochisi än Kot kewe Allük meinisin, a pwal witiwiti ätewe epwe echipa Israel. Iwe, Ngünmifel a nonom won.

²⁶Ngünmifel a pwäri ngeni, pwe esap mäla mwen an epwe küna Kraist, ätewe Kot epwe tinato.

²⁷Simeon a feila lon ewe imwenfel fän emwenien Ngünmifel. Iwe, lupwen Josef me Maria ra uwala ewe mönükol Jesus lon ewe imwenfel pwe repwe föri fän itan met örünier lon pwüngün ekewe Allük,

²⁸Simeon a ekietä ewe mönükol fän mwärin, a mwareiti Kot o apasa,

²⁹“Ai Samol, iei ka apwönüetä om pwon, iei mine kopwe mwüt ngeni noumw chon angang pwe epwe feila fän kinamwe.

³⁰Pun üa küna ren mesei om angangen amanau,

³¹ewe ka amolätä mwen mesen aramas meinisin.

³²Epwe eu saram mi pwärala letipom ngeni chon lükün Israel, nge epwe awarato ling ngeni noumw aramasen Israel.”

³³Iwe, semen me inen ewe mönükol ra weitifengeniir ren ekewe kapas Simeon a apasa usun ewe ät.

³⁴Mürin Simeon a afeiöchüür o üreni Maria, “Nengeni, ei mönükol a fil me ren Kot pwe epwe eu lenien pöütüla me eu lenien küna manau fän iten chomong lon Israel. Ätei epwe pwal eu asisil me ren Kot chomong aramas repwe ü ngeni lon ar kapas,

³⁵pwe ekiekin chomong aramas epwe pwäla ren. Iwe, lolilen watte epwe akinasa lelukom, usun efoch ketilas a akinasa aramas.”

³⁶Iwe, mi pwal wor eman soufos fefin itan Anna nöün Fanuel seni ewe ainangen Aser. Ei fefin a fokun chinlap, ra manaufengen me pwülüan lon ükükün fisu ier chök mürin ar apwüpwülü.

³⁷Iwe, lupwen pwülüan a mäla, a lipichsefäl tori iei a ierini walik me rüanü. Neminei esap feila seni ewe imwenfel, pwe a chök fel ngeni Kot lerän me lepwin fän echikefel me ikiotek.

³⁸Lon ewe chök otun a wareitiir, a kilisou ngeni Kot o kapas usun ewe mönükol ngeni chokewe meinisin mi witiwiti än Kot epwe angasala Jerusalem.

³⁹Iwe, lupwen Josef me Maria ra wes le föri meinisin usun met mi mak lon än ewe Samol Allük, ra liwiniti Nasaret lon Kalilea, iei poputän telinimwer.