Lukas 1:15-50

¹⁵a vuhuna bara i dagi a rana na matane Bakovi Dagi. Nahea ge ninu a vain, a naru vagole. Na tahuna i tabana na tamudine kinana, a Hanu Kiripiripi bara i made turana.

¹⁶E Ioanes bara i rata e huriki a Israel ri hamule mai e Bakovi Dagi, a Vure ne ria.

¹⁷Bara i rata a leho vona na nitora na Vure, i manga e Elaisa hosi. Bara i laho muga ne Bakovi Dagi, ge rata e huriki a bakovi ri gi ngaru e tune ria, ge rata e huriki ri longotaro a Vure ri gi bole a niluhoi ne huriki a bakovi kamumu. I mavonga, e Ioanes bara i pelekado e huriki a bakovi a ngatavine muga ne Bakovi Dagi ge bele ne ria.”

¹⁸Pali e Sakarias i nanea a agelo, “Ga lohoka navai vona a ngavamu ge muholi? Maria e girihigu miri gare hateka.”

¹⁹A agelo i koli i ta maea, “Iau e Gabriel, ra iau a pesi na matana Vure. I rudu valai iau ga vakalongo ioe vona a ngava kamumu iea.

²⁰Ngane bara o ngava­rubu, ge harena na tahuna ge bele lobo a ngava a taki ioe vona, a vuhuna o lohogorigori vona a ngavagu. A ngava lobo a taki ioe vona bara i bele muholi na parava vona.”

²¹E huriki polovavo ri dava mavongea e Sakarias, ri luhoi viliha lae, i navai i maradoi hateka pololilo na roho na Vure?

²²Na tahuna i pagitala i keri ni ta, i vakasiri lae kunana a limana, lakea ri matakilaka vona, e Sakarias i masia a maki tara pololilo na roho na Vure.

²³Na tahuna a parava ni leho vona i lobo, i hamule lakea na tanga vona.

²⁴Muri e girihina, e Elisabet, i singou, lakea i made kapiloho kunana na keva i lima, i kavurikea a Vure, i ta maea,

²⁵“Ngane e Bakovi Dagi i rata a rabu kamumu nau, i kori iau ga tahoka e tugu. I puga vuroki a nimaruhu nau na matane huriki a bakovi a ngatavine.”

²⁶Na tahuna e Elisabet i singou na keva i lima pali, a Vure i rudua e Gabriel, a agelo vona, ge lakea o Nasaret, na tabeke ne Galili.

²⁷A Vure i rudua, ge bele na sirula ni habikari na bakovi tara, a rana e Iosep, a hamone Davit. A sirula iea, a rana e Maria.

²⁸Lakea e Gabriel i vano, i bele ne Maria, i taguia, i ta maea, “A hatelanga kamumu vomu. E Bakovi Dagi i made turamu, i ngaru ioe!”

²⁹Pali e Maria i luhoi lege vona a ngava iea, i navai tavulai?

³⁰Lakea a agelo i takia, “Maria, naha ni mangenge. A Vure i ngaru ni rata kamumu ioe.

³¹O longo valai. Ngane bara o singou, o podea a koma bakovi. O vunua ge Isu.

³²A rana bara i dagi, bara ni gale a Tuna Vure Meli Liu. A Vure, e Bakovi Dagi, bara i ratea ge matakari a harikianga ne tubuna e Davit.

³³Bara ia a hariki na kabu ne Iakop na parava vakaroro. A nimatakari vona i uka ma ge lobo.”

³⁴Lakea e Maria i nanea a agelo, “Pali iau a uka e girihigu. Ge bele navai nau a koma?”

³⁵A agelo i koli mule, i ta maea, “A Hanu Kiripiripi bara i valai vomu, a nitora na Vure Meli Liu bara i kavitagu ioe. Lakea a koma bara o podea ni gi gale a bakovi kiripiripi, bara ni gale a Tuna Vure.

³⁶O longo valai, e balomu e Elisabet i gare liu, pali ngane i singou, bara i podea a koma bakovi. Muga ni taki ta i lame. Pali ngane i singou na keva i polotara pali,

³⁷a vuhuna a Vure i uka ma i keri ni ratana tara maki.”

³⁸E Maria i koli, i ta maea, “Iau a vora ne Bakovi Dagi kunana. Ge rata virihi iau vona ge manga a hini o taki pali.” Muri a agelo i pea e Maria, i vano.

³⁹Muri e Maria i vano, i laho hari sike na tanga tara na lolo na tabeke ne Iudea.

⁴⁰I lokovonga, i dili na ruma ne Sakarias ge gosia e Elisabet.

⁴¹Na tahuna e Maria i taguia e Elisabet, a koma pololilo na tamudine Elisabet i kiriko. A Hanu Kiripiripi i dili ne Elisabet,

⁴²lakea i gale dagi i ta maea, “A Vure i rata kamumu hateka ioe ne huriki a ngata­vine lobo. A Vure i rata kamumu hatekea e tumu bara o podea.

⁴³Iau e rei o valai nau, ioe e kinane Bakovi Dagi nau?

⁴⁴Na tahuna a longo a nitagui vomu, e tugu na tamudigu i vivi, i kiriko.

⁴⁵A Vure ge rata kamumu ioe, a vuhuna o luhoi a ngava e Bakovi Dagi i taki ioe vona ge bele!”

⁴⁶Lakea e Maria i ta maea, “A hategu i kavurikea e Bakovi Dagi.

⁴⁷A vivi hateka na Vure nau, ra viri i korimule iau,

⁴⁸a vuhuna i uka ma i lohopile iau, a ngatavine tavula, a vora vona. I vakatubu ngane, i lokovonga na nilobona malala, e huriki lobo bara ri taki iau, na Vure i rata kamumu hateka iau,

⁴⁹a vuhuna a Vure Tuhaka Hateka i rata a naro kamumu hateka nau. A rana i kiripiripi.

⁵⁰A Vure i dodo e huriki ri longototoa. Bara i dodo ria, e tune ria, e tubune ria.