Luk 1:15-50

¹⁵Ya udu mada Kindrei, iy kameh asahan ndramak ari tinan handru. Iy sa-un waen hawe gwa boto-on, ndri-iy labai. Atehei iy eme len le badeh, iy kameh idih na Malawin Ndrabun.

¹⁶Iy le kameh tiyani iri lau badu Isra-el kameh ame hamon ja, ame hawe Laban Kindrei tiri.

¹⁷Ma idah kameh iy i bwena ta Laban na boto-on, ma hawe nyaran i tinan i buku none propet Alaija. Ma idah kameh iy kameh tubuni ndrine tama iri nah eme hamon ja, aseken nadu iri; ma iy kameh tubuni ndrine iri lau ta banuhun sahou bwe, ame hamon ta budon lewen ta lau mwasin; ma hawe idah kameh iy lowosa iri lau ta Laban, ado abe-en iy.”

¹⁸Eme Sekaraya tiye i ta angelo, “Ki buku sah kameh jo ki tanan lakou handru dah kasahan? Tasah, aru uduk ma la-uh badeh, ndra alon labai.”

¹⁹Eme angelo dah tiye, “Jo dah, angelo Gabiriyel. Jo ales udu mada Kindrei eme dah, ta asehek nyalam ta sahou mwasin dah.

²⁰Ma idah kameh ou winiyan basehek sahou bwe; winiya le len ta aliy barasahan. Tasah, ou batehei budon tam handru ba-en ta sahou tek bwe.”

²¹Eme iri lau abe-en Sekaraya, abe-en abe-en labwe. Eme iri lomondra anya, “Iy ndra luluwen labai udu bolo asiu tinan ta Kindrei.”

²²Ano Sekaraya eme len badeh, iy winiyan basehek sahou bala tiri bwe. Eme iy asehek sahou na andra lim le i tiri. Eme iri anya, “Iy kede-eh nane amekes lele in asiu tinan ta Kindrei.”

²³Lahou tan ta amekes ano, iy iu i asiu tan.

²⁴Udu len rayah ano iu, Elisabet nah ere tan. Eme iy udu le asiu winiya bun ma limeh.

²⁵Eme Elisabet tiye, “Kabwai, Laban ndrasebenei jo i san dah. Iy ndrabwidi maha-an ta bwilima udu tek badeh, ndra-au!”

²⁶Eme nah udu ta Elisabet asahan bun onoh badeh, Kindrei suni angelo Gabiriyel ja, ili kon Nasaret, udu loboho Galili.

²⁷Iy anya katiye sahou ta tandrakan ari, anya ki ta badih ari bakohok mwan bwe le, san tan ndra ta ndramak ari nyaran Josep. Ya Josep doh, badu boho kamen ta kabin Debit oro. Ya nyara badih doh, Mariya.

²⁸Eme angelo Gabiriyel ili asahan hawen ma asumon iy anya, “Bada-an tam! Laban udu hawem, ma iy atehei nyosowan laba tinan ewek la-um!”

²⁹Eme Mariya manin atur ta sahou ta angelo dah, eme iy lomondra saba sahou tan doh kameh.

³⁰Eme angelo dah anya, “Mariya, ou sanoh. Kindrei badeh, sekesek tam handru.

³¹Idah kameh, ou tuwi nah mwan ari ere ndrinem, eme ou tondrohani nyaran ki Jises.

³²Iy kameh asahan ndramak tinan, ma idah kameh aloh iy Nadu Kindrei udu loken labai. Laban Kindrei kameh mesekei iy asahan kabin, i buku none tubun Debit mene,

³³ma idah kameh iy asahan kabin ta atondrok lundriye Jekop oro, udu le buku doh; ma tondrok tan kameh winiyan bano bwe!”

³⁴Eme Mariya tiye i ta angelo, “Jo badeh, bakohok ari mwan bwe. Idah kameh ki buku sah handru?”

³⁵Eme angelo dah anya, “Malawin Ndrabun kameh ewek la-um, ma hawe boto-on ta Kindrei ewek la-um. Ta katin doh le, nah doh kameh i ndrabun ma aloh iy Nadu Kindrei.

³⁶Ou tanam boram Elisabet, iri asehek anya iy kameh nadun bwe; iy badeh, ndra alon labai. Arile na len dah badeh, nah udu tan bun tan ndrasahan onoh ai.

³⁷Lakou mari kede-eh Kindrei winiyan mesekei le ai.”

³⁸Eme Mariya anya, “Jo dah, jo lohowan ta Laban, kasahan ki buku ou asehek badeh!” Eme ma angelo dah iu ai.

³⁹Ano udu hamon ja, Mariya alokou iy, ano iy edek suwi iu ili bolo ndrondro-ou, badu kon tinan ili kon ari udu bolo Judiya.

⁴⁰Iy ma sekesek tan edek iu ili bolo asiu ta Sekaraya atou Elisabet.

⁴¹Eme Elisabet anuhun sahou sekesek ta Mariya, ma nah udu ndrinen nyokolokon. Eme Elisabet idih na Malawin Ndrabun,

⁴²ma iy asehek sahou boto-on anya, “Ou badeh, nyosowan tam, sakalawi nyosowan tiri badih mari, ma nyosowan ki la-u nah, na len ou kameh adeu iy eme len!

⁴³Lakou laba tinan dah, asahan eme tek, ta sasah handru? Ya eme tine Laban eme selesen jo dah.

⁴⁴Jo anuhun sahou sekesek tam le badeh, ma nah udu ndrinek nyokolokon ta sekesek.

⁴⁵Idah kameh ou sekesek handru, tasah budon handru tam ndra-en ta sahou mene Laban ndrasehek tam.”

⁴⁶Eme Mariya iyah wari ma tiye i buku doh: “Ndrinek atudun nyara Laban;

⁴⁷ma kohak handru sekesek ta Kindrei, ta aseben jo,

⁴⁸tasah jo badeh, lohowan tan ma iy tondrokei jo! Na dah kameh iri lau rebesem, ano rebesem kameh aloh jo akohok nyosowan.

⁴⁹Tasah, Kindrei tinan labai, iy mesekei lakou tinan labai ndrame tek, ya nyaran badeh, ndrabun.

⁵⁰Iy leheya tikisiy tan i tiri lau heh anoh iy; ano ili ta lau rebesem au, ano lau rebesem au, i le buku doh.