San Lucas 1:15-50

¹⁵porke mokone satlawel weyijkatitos inawak Dios. Ayik konis vino nion tlan tewinti, iwa tentos de Espíritu Santo desde ijkuak yetos ijtik inanyo Elisabet.

¹⁶Iwa kichiwas mamoyolkopakah miakeh tlakah de Israel inawak Inteko Dios.

¹⁷Ye achto moteixpantiti inawak Toteko ika iespíritu iwa iweletilis n tiotlajto Elías. Kichiwas mamoyekwikakah n tetajmeh iwa impilwah. Iwa kinmititis non amo tetlakitah, matetlakitakah, ijkó kinyolkopas n tlakah para makiselikah n Toteko.

¹⁸Zacarías okitlajtlani n ángel: —¿Kenomi nikmatis tlan otikijto milák?, ne ya nitetajtsi iwa nosiwa ya tenantsi.

¹⁹N ángel okinankili: —Ne Gabriel, iwa niktekitilia Totajtsi Dios. Ye onechaltítlanki manimitsiliki ninteh kualitlájtolteh.

²⁰Pero axa, kemi amo otikneltokak tlan onimitsili, mach weletis titlajtos asta matlakati mokone, iwa nochi ni ijkó mochiwas ijkuak ajsiki n tonati.

²¹Iwa kemi Zacarías yowejkajtoka ijtik Weyi Tiopa, n tlakah non kala okichixtokah opé motekipachoah tleka amo owalkisaya.

²²Ijkuak Zacarías owálkiski, amo owéletki okintlapowi, ijkuakó okajsikamatkeh itla okimonextili ijtik tiopa. Ye sa okinmanotsaya porke ayakmó oweletia otlajtoaya.

²³Ijkuak Zacarías otlanki okichi iteki ijtik Tiopa, oyá icha.

²⁴Satepa Elisabet omoka kókoxki de konetl, iwa mákuili mestli mach okiski de icha, iwa okimoliaya:

²⁵“Axa n Noteko onechchiwili tlan kuali ika itlasojtlalis, para ayakmó manechpijpinawikah por amo oniweletia onikpiaya nokone.”

²⁶Ijkuak Elisabet yokipiaya chikwase mestli kókoxki de konetl, n Totajtsi Dios okitítlanki iángel Gabriel mawia Galilea itech se altepetl non itoka Nazaret,

²⁷para makitlajpaloti se íchpochtli non itoka María. Ye yokisentlalijka monamiktis iwan se tlakatl non itoka José, nin José ojojpaixwi n Rey David.

²⁸N ángel okalak kan okatka María iwa okili: —¡Xipaki! Dios satlawel omitstiochi. N Toteko kajki mowa.

²⁹Pero ijkuak María okitak n ángel, saikpanoa omotlajtlachialti iwa mach okimatia tlan kijtos, iwa okimoliaya tleka ijkó okitlajpaloaya.

³⁰Ijkuakó n ángel okili: —María, amo ximawi, porke Dios yolpaki monawak.

³¹¡Xikkaki!, axa timokawas tikókoxki de konetl, iwa non konetl tiktlalilis itoka Jesús.

³²Ye saikpanoa weyijkatitos, iwa kinotsaskeh Tekone de non Weyijkatitok. Dios Toteko kitlalis mayeto Rey ijkó kemi otlanawati David iwejkatata.

³³Ye nochipa kinawatijtos n país de Israel, iwa itlanawatil mach ayik pojpoliwis.

³⁴Ijkuakó María okitlajtlani n ángel: —¿Kenomi manikpia nokone, ne ayamó nikpia nookich?

³⁵N ángel okinankili: —N Espíritu Santo walmuikas motech, iwa iweletilis n Totajtsi Dios mitsmokemis kemi se mextli. Yika, n konetl non te tikpias yetos yolchipawak iwa kinotsaskeh Tekone de Dios.

³⁶Moprima Elisabet, maya ya tenantsi, noiwa kipias se konetl. Ijkó kiné, non okiliayah ayik weletis kipias ikone axa ya kókoxki de konetl iwa ya kipia chikwase mestli.

³⁷Porke Totajtsi Dios nochi weleti kichiwa.

³⁸Ijkuakó María okili: Ne iteska n Totajtsi Dios. Mamochiwa nowa ijkó kemi yokijto. Ijkuakó n ángel owálkiski.

³⁹Itech nonteh tonatijmeh, María oyá totokatijkak okitlajpaloto iprima Elisabet. Ye ochantitoka itech se altepetl non kajki itech tepeyo de Judea.

⁴⁰Ijkuak oajsito itech non altepetl, María okalak icha n Zacarías, iwa okitlajpalo n Elisabet.

⁴¹Ijkuak Elisabet okikak itlajtol n María, ikone n Elisabet otsékuinki ijtik inanyo, iwa Elisabet otenki ika n Espíritu Santo.

⁴²Ijkuakó Elisabet ika pakílistli okualnankili chikawak: —¡Dios omitstiochi okachi ke nochteh n siwameh, iwa n konetl non tikpias, Dios yokitiochi!

⁴³¿Akin ne, para manechontlajpaloki imamá n Noteko?

⁴⁴Porke san nima ijkuak onikak otechtlajpalo, nokone otsékuinki ijtik nonanyo ika pakílistli.

⁴⁵¡Tlawel xiyolpaki, ken otikneltokak nochi tlan Toteko yokijto!

⁴⁶Ijkuakó María okili: Ika nochi noyolojtsi nikweyilia Noteko,

⁴⁷iwa miak niyolpaki inawak Dios, Notemakixti.

⁴⁸Porke onechitak kemi iteska, iwa ken niyolyámanki, Dios onechiknoma, iwa desde axa nochteh n tlaltikpaktlakah nechiliskeh niyolpakiliso.

⁴⁹Porke Dios weletini okinchi notech wejweyi milagros. ¡Ye yolchipawak!

⁵⁰N Totajtsi Dios nochipa kinmiknomatis akimeh kitlakitah.