Luká 1:51-76

⁵¹Kezáini kugupemú gelego iteaká noi vegená nene ezáa alévolé zámuza ale utó ike kelémo ahuloaká noive.

⁵²Itó kugulizaki ve kehelú okago keí gonanalivagi holomalotí velehé limiaká niave. Itó vegená limiki minamoláatini kugulizáini ale napa oaká noive.

⁵³Gohogó vegená itó gaúna hiliki nimina vegená nene netá gihila kemekago, kagatupa igo miniaká niave. Itó henóinigi vegená ahulokimikago muhelé iki miniaká niave.

⁵⁴Ómasi eza gelekelé otoko minuni vegená nene hize lé olimikave. Eza agika lamanakímove loko Isilae vegená leza lá olimikave.

⁵⁵Avotegini láa loko lo moloketamó nene Avalahani itó agapilamó zuhagi lo mololetamómámini gihila utó oloko voko minanogo ive.

⁵⁶Loko Maliá loake, Elisapeteki minasike ikani losive makole ale ahuloake, numunaloka atiginá oko vimó.

⁵⁷Itó Elisapeté eza izegipa getati gamena alitokago, gipa getamó.

⁵⁸Getokago, vegenala zuha agivelage keza Guivahanímo muluna ze hoú lake ale utó i netakumú giliake, ezagi makó mulúikú lamaná gelemó.

⁵⁹Lá iake, gamena 8 oko vokago, gipa namunimámini agupeló Ómasímini anosa militanigi mukí vegená alegesá ake amelaho Zakaliani agulizató milanigi lamó.

⁶⁰Liki likago, izolaho géneka like Óe, agulizá Zoní ave loko molatune.

⁶¹Loko lokago, keza láa liki li amemó: Íi, geí zuhatini kugulizá makó nenéminoko nomive.

⁶²Liki géneka hánaka nilake, Zakaliá nene gipalámini agulizá nanave loko molative liki kigizanitunú avevezaha ikago,

⁶³eza pepamú agizanitunú avevezaha okago, pepa alimi amikago, agulizá Zoní ave loko luhuva gizamó. Gizokago, giliake sigaga lamó.

⁶⁴Lá ikago, Zakaliani genezala litá oko lamaná okago, Ómasi agepoka limó.

⁶⁵Lá okago, agive lugáa keza giliake kelegesá ligimó. Lá okago, Zutaia mikasigú zopegaloka numutó namató nene ámina gakó avetó iki ligili hagili ikago,

⁶⁶vegená mukilite gakóini giliake ali kigikagú milake gipama nene napa okoko nana itive. Liki lamó nene, Guivahanímini zámuza nene ámina gipaloka nego giliake lamó neve.

⁶⁷Itó amelaho Zakaliani nene Ómasímini Sikalahulímo agikagú minake alémo vávani igo alika utó iti netakumú epoapoga like láa loko limó:

⁶⁸Isilae ve leza Guivahanite Ómasi agepoka litune. Eza nene vegenala zuha lelí lelémo vatí ike netá golesagutí gologí olimikave.

⁶⁹Lugutó viziti lapusa ale oteko hizekave. Gelekelé izegipala Tevitini agapilamó zuha lelitoka neve.

⁷⁰Ómasímini agepagutí gakó liaká ve kelémo vávani okago epoapoga gozapá láa liki liaká amóma neve:

⁷¹Lova vetini kigizakutí gologí oletanogo ive. Mukahá lipiliaká nia vegutí akagá oletanogo ive.

⁷²Avotegini nigika hize kimitove loko lo moloketamole. Lo múnaheake lo hukoko li gakó gele minake lá oketamole.

⁷³Itó avoteho Avalahani láa loko alévolé oko lo molotamole:

⁷⁴Gala vetini kigizakutí gologí oletanogo ive. Lá okiko lelegesá legemiko gelekelé otoko minanogo une.

⁷⁵Nenemú ligika avasavagi miniko gakote minamiko gelekelé otoko minoko hilitune, liki lamó neve.

⁷⁶Itó gipa geza Guivahanímini monó gakoláa lole ale oko aí gapo veletataninazo, geikumú nene vozaú vémini agepagutí gakó loaká veve liki linigave.