Lucas 1:51-76

⁵¹Impeta na en begsák nen barasu na, sakay linitu na en hambug hidi ti pággisipan.

⁵²Inibutan na ten trono di en tehud hidi a kapangyariyan. Sakay intaas na en ked hidi ten mababa a kalagayan.

⁵³Pinutat na ti mágkaganda a bagay en magaláp hidi. Sakay pinalakad na a awan ti tawid a ányaman en mágkayaman hidi.

⁵⁴Tinulungan na en tagapagserbi na a Israel, awan na hidi linimon a kahabagan.

⁵⁵Tinupad na en pangaku na ten ninunu tam hidi, kánni Abraham sakay en lahi na hidi a awan ti katapusan!”

⁵⁶Nágyan ti Maria kánde Elisabet ti tállu a bulan bagu siya a ummuli.

⁵⁷Nadid, dikona dummemát en odas a magenak dán ti Elisabet ay lállaki en anak na.

⁵⁸Masaya a tarud en kadatigan na hidi sakay en partidu na hidi dikona a mabareta di a pinagpala siya nen Panginoon.

⁵⁹Ten kawalu a aldew ay ummangay hidi ten bilay de Elisabet gapu turiyán di dán en anak. Ngaranan di nakuwan a Zacarias en anak a kona ten ama na,

⁶⁰peru kinagi ni Elisabet, “Bakán! Juan ngaran naid.”

⁶¹Kinagi di, “Peru awan kam ti kapartidu a tehud a ngaran a kona haán.”

⁶²Kaya sininyasan di en ama na tánni itanung di ni ánya gustu naid a pangngaran ten anak na.

⁶³Nággid ti Zacarias ti pagsulatan sakay insulat na a, “Juan i ngaran naid.” Nagtaka hidi a atanan.

⁶⁴Ti odasid biyid a iyud ay nakapagupos dán ti Zacarias, sakay tulos siya a nagpuri ten Diyos.

⁶⁵Neántingan en kadatigan di hidi, sakay nekalat en bareta ten buu a mabuki-bukid a lugar ti Judea.

⁶⁶Atanan nen nakabareta hidi ay mággaisipán ten pangyayari. Kinagi di, “Ánya wád pangyariyanid ni anakid a iyád? Gapu maliwanag a ked dikona en kapangyariyan nen Panginoon.

⁶⁷Naputat ti Banal a Ispiritu ti Zacarias a ama ni Juan, sakay nagpahayag ti mensahi a gubwat ten Diyos.

⁶⁸Kinagi na, “Puriyán tam en Panginoon a Diyos ni Israel! Tinulungan na sakay pinalaya en tolay na hidi.

⁶⁹Nángpaangay siya dikotam ti essa a makapangyariyan a Tagapagligtas, a gubwat ten lahi ni David a tagapagserbi na.

⁷⁰Tenhud pa a panahun ay impangaku na dán ten pamamag-itan nen propeta na hidi a banal,

⁷¹a iligtas na kitam ten atanan a kadima tam, sakay ten atanan a maiyamut dikotam.

⁷²Nagpangaku bi a kagbiyan na en ninunu tam hidi, sakay awan na kalimunan en banal na a kasunduwan.

⁷³Impangaku na ten ninunu tam a ti Abraham,

⁷⁴a iligtas na kitam ten atanan a kadima tam, tánni makapagserbi kitam dikona a awan ti ánteng,

⁷⁵sakay magin banal sakay matuwid ten pangileng na mentras a biyag kitam.”

⁷⁶Intulos pa ni Zacarias a kinagi, “Siko a anak ku ay ngaranan di ka a propeta nen Kataasan a Diyos. Gapu mágdipalongu ka ten Panginoon a mánghanda ten paglakadan na.