Lucas 23:16-37

¹⁶Nal za naya yenn xaa zee sela na xaa.

¹⁷Nu rese liin leezha nla yalni ne, Pilat nsela tub xaa nzho lozhyib.

¹⁸Per rese myet dublegan mbazhe, nu nzhé: —Nanzheklat nu sela lu xaabyi ba, Barrabás nzhekla nu sela lu.

¹⁹Barrabás nak tub xaa mbit myet nu leeka lee xaa nak xaa mchaldil xaa nabeyy yezh, kwaanzee mlo xaa Barrabás lozhyib.

²⁰Pilat nzhekla sela Jesús, zee mbare xaa ngunii xaa lo re myet stub welt.

²¹Per lee re myet mbare nzhé: —¡Kee xaa lo krus! ¡Kee xaa lo krus!

²²Myon welt mbare Pilat nzhé lo re xaa: —¿Chozhiin? ¿Cho kwaan nawent mle xaa ne? Nanguzhalt na nik tub kwaan nawent kwaan mle xaa zee gut na xaa, nebse teed na xaa bid zee sela na xaa zee nya xaa.

²³Per lee re xaa seetaka nye doo mbazhe, nu mbezh re xaa nzhaal kee xaa lo krus. Tant nkee doo re xaa bi, zee mle xaa gan le Pilat kwaan nzhekla re xaa.

²⁴Zee lee Pilat mnabeyy zee gaka mod nzhekla re xaa.

²⁵Zee msela Pilat Barrabás xaa mbit myet nu xaa mchaldil xaa nabeyy yezh. Nu mzaa xaa Jesús zee gaka mod nzhekla re myet.

²⁶Zee mbe re xaa Jesús, nu lee tub xaabyi le Simón xaa yezh Cirene nyaad ngwa wen, zee mnabeyy soldad xaa zee wee xaa krus cheen Jesús naz tras tich Jesús.

²⁷Zyen doo myet mreke tich Jesús. Nu zyen doo ngwnaa, me nzhonn, nzhake tich xaa, nel nales doo nzhak lextoo me ne me xaa.

²⁸Zee lee Jesús mzere yenn naz tras mwii lo re me, nu nzhé xaa: —Xchap na, me Jerusalén, nanzhonnt gu kwent cheen na, lee gu nzhonn kwent cheen re gu nu kwent cheen re xinn gu.

²⁹¡Bkenzha gu! Zhin tub mbizh gorna yé gu: “Nyakdoola re me nit, nu noka nyakdoola re me nik tub welt zer zaa nizh go mad”.

³⁰Zee zelo re me yé me lo re yi: “Bla tich re nu”. Nu noka yé re me lo re yi: “Sebyo nu”.

³¹Chelee snee le xaa lo tub yag naye, nakapra le xaa lo tub yag mbizhla.

³²Nu noka mbe xaa chop xaa nakap zee gut xaa xaa tubka kwaan Jesús.

³³Gorna mzhin re xaa pa nii xaa “Zhit Yek Xaa”, zee lee re soldad mkee Jesús lo krus, nu noka mkee xaa rop xaa nakap lo krus; tub xaa mkee xaa lad li lo Jesús nu stub xaa mkee xaa lad rebes lo Jesús.

³⁴Zee lee Jesús nzhé: —Xuz na, chee jwalt kwaan kale re xaa ne, nel nanet xaa cho kwaan kale xaa. Nu mloo re xaa swert nen cho xaa le gan xab xaa, zee nen cho kwaan yizo kad tub xaa.

³⁵Nu dub welt lo xaa nzhi re myet ngwii. Nu lo re xaa baa nzhi re xaa non, nu nxizhno re xaa Jesús nu mbezh re xaa: —Nanlaat lu yet stub xaa, per chozhiin nyent mod sela lu leeka lu lo krus. Né lu lee lu nak Crist, Xaa Mxaal Dios Nabeyy lo re nu.

³⁶Nu noka re soldad mxizhno Jesús. Nu nzhazaa xaa xis ub kwaan nala go Jesús.

³⁷Zee nzhé re soldad lo xaa: —Chol lu nak Rey cheen re xaa Israel, bla lo krus.