Luk 23:16-37

¹⁶Miaŋgöra nöŋön jibi yarö azi yeŋön ihileknöhök qegetka pösatpi etma.”

¹⁷(Pailötnöŋ yambu (yara) dop Pasowa sösöŋgai nalöŋe kösö mireyök azi mohok pösat eŋgimaljapma.)

¹⁸Mewö jiiga yeŋön körekbörek silata qeta jiget, “Ia mönö yapmakek! Barabas mönö pösat neŋginöŋ.”

¹⁹Barabas miaŋön sitinöŋ karim gila malgeri, yeŋgö galömŋina aka azi kun qei kömuyöhi, miaŋgöra kösö mire alget tarök.

²⁰Pailötnöŋ Jisös pösatmamgö möta keu kunbuk jiyök.

²¹Jiyökmö, yeŋön qetala öraŋböraŋ misiba qet gigilahöget, “Maripomnöŋ qeget! Maripomnöŋ qeget!”

²²Qet gigilahögetka yaŋön keu indimŋi karöbut kewö jiyök, “Yaŋön mönö wani bölöŋa ahök? Nöŋön yaŋgöreŋ pinjit kun kude miwikŋaibiga kömupkö buŋaya akŋawaŋgö dop qahö akza. Mewö aiga nöŋön jibi yarö azi yeŋön ihileknöhök qegetka pösatpi etma.”

²³Mewö jiyökmö, yeŋön jakbak memba kapaŋ köla toroqeba qet gigilahöba qetket, ‘Jisös maripomnöŋ qeget kömuma.’ Mewö qeta Pailötköreŋ keu mi qeapköget.

²⁴Qeapkögetka Pailötnöŋ keuŋini bapŋe anda keu kapaŋ köla jigeri, miaŋgö ölŋi ahumapkö jim teköyök.

²⁵Jim teköba Barabas etmapkö kapaŋ kölgeraŋgöra i pösari erök. I karim qeba malgeri, yeŋgö galömŋina aka azi kun qei kömuyöhi, miaŋgöra kösö mire alget tarök. Mi pösari erökmö, Jisös sihimŋinaŋgö dop jauŋgauraŋga ak waŋgimegöra böröŋine alök. Mewö.

²⁶Pailötnöŋ Jisös böröŋine aliga waŋgita köna namŋe anda Afrika siti qetŋi Sairini miaŋgö azi kun qetŋi Saimon miwikŋaiget. Yaŋön nupnöhök kaŋgoriga jim kutum waŋgiba Jisösgö maripomŋi waŋgita yaŋgö awötŋe algetka aŋguba wuataŋgöba anök.

²⁷Mewö aniga ambazip kambu ketaŋi yeŋön luluŋda andöŋe wuataŋgöba anget. Yeŋgö sutŋine ambi tosatŋan mewöyök jiŋgeŋ köla sahöta anget.

²⁸Sahöta angetka Jisösnöŋ liliŋgöba eŋgeka kewö jiyök, “O Jerusalem ambi, iŋini mönö nöŋgöra kude sahötket. Nöŋgöra qahöpmö, nanŋini aka nahönböraturupŋini mieŋgöra mönö sahötme.

²⁹Mötket! Könaŋgep nalö kun kai miaŋgöreŋ kewö jime, ‘Ambi köpin mi simbawoŋ. Gölöm qahö ala morö kude megeri, mi simbawoŋ akze. Nahönbörat juzu eŋgiba qahö dohongögeri, mi simbawoŋ.’

³⁰Nalö miaŋgöreŋ ambazipnöŋ könahiba kunduŋi Toŋi yeŋgöra kewö uletme, ‘Iŋini mönö kunduŋi mi jigetka teköba qaknine öŋgöme.’ Aka sem siagö Toŋi mi kewö ulet eŋgime, ‘Iŋini mönö baŋetŋine asamböt neŋgime.’

³¹“Nöŋön Anutugöreŋ ip gwölögwölö akzal aka nöŋgöra töndup kewö ak niŋgize. Iŋini ip köhömuŋi siŋgisöndokŋinambuk könöp sihit qeba kinje. Miaŋgöra Anutunöŋ likepŋi meleŋ eŋgiiga könöpnöŋ amqeqeŋanök eŋgohotiriiga sihimbölö öŋgöŋgöŋi mötme.”

³²Bölöŋi meme yahöt mi mewöyök Jisösbuk mohotŋe etkubingöra etkuaŋgita anget.

³³Anda gölme qetŋi Nöröpsihit qetzei, miaŋgöreŋ aŋgota Jisös maripomnöŋ qeget. Qeba bölöŋi meme yahöt mi mohotŋe kun ölŋe kun qaniŋe likeplikep mewö etkuget.

³⁴Mewö aketmö, Jisösnöŋ jiyök, “Iwini, yeŋön yuai akzei, miaŋgö könaŋi qahö möt kutuzeaŋgöra siŋgisöndokŋini mönö mosöt eŋgiman.” Qeget kiniga Jisösgö sile esuŋaŋgöra kiawen megetka qötöŋi ahui miaŋgö dop mendeŋda meget.

³⁵Mewö aketka ambazip kambu yeŋön kinda mi uba eket. Eketmö, Juda jitŋememe yeŋön mewöyök mepaqepaik mem waŋgiba kewö jiget, “Anutunöŋ möwölöhöm waŋgii Amötqeqe Toŋi Kraist akza ewö, tosatŋi bauköm eŋgiba malöhaŋön mönö nanŋi bauköm aŋguma.”

³⁶Yarö azi yeŋön mewöyök keu gönahit jiba ilita kösutŋe anda wain o asölŋambuk kusahöla memba öŋgöba waŋgiba

³⁷kewö jiget, “Gi Juda yeŋgöreŋ kiŋ kembuya akzan ewö, mönö ölöp nangi bauköm aŋguman.”