Luca 23:27-41

²⁷Ãdji caid̶u ẽberãrãda bio cãbana wãbʌda basía. Maʌ̃ne ʌ̃cʌrʌ wẽrãrãda Jesu carea jĩã panasid̶aa.

²⁸Jesuba ãdjimaa acʌped̶a jarasia: –Jerusaleʌ̃nebema wẽrãrã, mʌ̃ carea jĩãrãnadua; ãtebʌrʌ ara bãdji carea, bãrã warrarã carea bid̶a jĩãnadua.

²⁹Ewari ab̶a ẽberãrãba jarad̶ia: “Bio bia b̶eaa wẽrãrã warra tod̶acara idjab̶a ju dawad̶acara.”

³⁰Maʌ̃ne eyaa nãwã jarad̶ia: “Dai ʌ̃rʌ̃ b̶aedua.” Dewara eyaa jarad̶ia: “Daira ãnã nũmʌdua.”

³¹Ẽberãrãba mʌ̃, bacuru onoa quĩrãca b̶ʌda bead̶ibʌrʌ, bacuru põ quĩrãca b̶eara ¿sãwãni?–

³²Jesu ume crud̶e bead̶i carea ẽberã cadjiruarãda umé edesid̶aa.

³³Ẽjũã Boro B̸ʌwʌrʌ abadama jũẽsid̶ad̶e Jesura crud̶e cachi jira b̶ʌsid̶aa. Dji ẽberã cadjiruarã sid̶a crud̶e cachi jira b̶ʌsid̶aa, ab̶a Jesu jʌwa araare, ab̶a idji jʌwa acʌare.

³⁴Maʌ̃ne Jesuba jarasia: –Zeza, ãdjia o panʌra quĩrãdoadua. Ãdjia adua panʌa cãrẽda o panʌda.– Maʌ̃ awara sordaorãra ne jemenesid̶aa Jesuba cacuad̶e jʌ̃ b̶ad̶ara sãwã jed̶ecad̶i cawaya.

³⁵Jũma maʌ̃gʌra ẽberãrãba acʌ duanasid̶aa. Maʌ̃ne dji bororãba idjira ipid̶a biẽ́ jara duanesid̶aa: –Dewararãda carebasia. Ãcõrẽba idjida dadjirã ẽdrʌ edamãrẽã b̶ʌsibʌrʌ, ¿ara idub̶a poya ẽdrʌẽ́ca?–

³⁶Maʌ̃ awara sordaorã arima duanʌba Jesura ipid̶a biẽ́ jarabadjid̶aa. Ãdjia Jesua uva b̶a oregueada diad̶e wãnaped̶a jarabadjid̶aa: –Bʌda wãrãda judiorã borobʌrʌ, ara bʌdub̶a ẽdrʌdua.–

³⁸Jesu boro nocoare bed̶eada cachi jira b̶ʌsid̶aa cawabid̶i carea idjira cãrẽ carea beabʌdada. Griego bed̶ead̶e, latiʌ̃ bed̶ead̶e, hebreod̶e bid̶a nãwã b̶ʌ́ b̶asia: “Naʌ̃gʌra judiorã boroa.”

³⁹Maʌ̃ne ẽberã ab̶a cadjirua od̶a carea crud̶e cachiped̶ad̶aba Jesura nãwã biẽ́ jarabadjia: –Bʌda wãrãda Ãcõrẽba ẽdrʌ edabari diai jarad̶abʌrʌ, bʌdub̶a ẽdrʌped̶a dai sid̶a ẽdrʌ b̶ʌdua.–

⁴⁰Baribʌrʌ dewarabemaba idjira nãwã quẽãsia: –¿Bʌ sid̶a cawa o panʌmĩna wad̶ibid̶a Ãcõrẽra wayaẽ́ca?

⁴¹Wãrãda dadjira nama jira pananida panʌa cadjiruada oped̶ad̶a bẽrã. Baribʌrʌ za b̶ʌ ẽberãba ¿cãrẽ cadjiruada osi?–