Los Hechos 15:12-20

¹²I'suᵽaka Ᵽedrote ãrĩka ã'mitiritirã nimauᵽatiji nokata'rika. I'suᵽaka nimaeka ᵽoto, Tuᵽarãᵽi ãrĩwa'ri maikoribeyu uᵽaka ima judíorãkamarĩrãte nabaabeaeka, Ᵽablo, Bernabéᵽitiyika nare nabojaeka.

¹³Sabe'erõ'õjĩte Santiagote ikuᵽaka ãrĩka: —Ñañua jia mija ã'mitiᵽe yijeyomarã.

¹⁴Judíorãkamarĩrã majaroka Simónre mare bojaweayu. Sã'mitiritirã, “Judíotatamarĩrãteoka kirirã nimaerã jia Tuᵽarãte baaũ'mueka”, marĩwãrũyu.

¹⁵I'suᵽakajaoka Tuᵽarãro'si bojaĩjirimajare bikija o'oeka:

¹⁶“David wi'ia ᵽo'imajare riatako'omakaja ñamajĩ ate jia sabaaᵽe'aokaro'si yetarãñu.

¹⁷I'suᵽaka yibaarãñu ‘Tuᵽarãte mayi'riye'e’, judíorãkamarĩrã yiwã'maekarãte ãñaokaro'si. Yi'i, mija ĩᵽamakiji, i'suᵽaka ñañu, bikijarãja yirirãte sõrĩrũjera'aekaki imarĩ.”

¹⁹Ika yijaiweaikaᵽi ãrĩwa'ri: Matã'omajamarĩrã imarã ba'iaja nabaaika ja'atairã nime Tuᵽarãte yi'riwa'ri. I'suᵽaka simamaka, “Mañekiarãte imara'aeka uᵽakaja baarika sime”, nare ãrĩrũkimarĩa sime.

²⁰I'suᵽaka nare ãrĩbekaja, ᵽaᵽera nare maᵽũataye'e ikuᵽaka nare okajããokaro'si: “Waᵽuju imaja jẽrãka jiyiᵽuᵽaka õrĩwa'ri sawã'tarã ri'ia naᵽããeka mija ba'a'si. Rõmikirã, tĩmiairã, rõmimarĩrã, tĩmiamarĩrãoka ba'iaja baabekaja mija imabe. Suᵽabatirãoka wa'iro'sia sawãmua namokoru'ataeka mija ba'a'si, i'suᵽakajaoka sariwea.” Jẽrĩtarirĩmi rakakaja judíorãkare rẽrĩriwi'iarã i'suᵽaka nabojara'aeka nimataᵽaekarõ'õrã. Suᵽa imarĩ, i'suᵽaka ñañu, jiyubeyua judíorãkare naka jarikoreka,— Santiagore nare ãrĩka.