Aposotolo Adi Hewau 15:12-20

¹²Gamagaridi oigogo eai wa isi nige ariarinadi, Banaba eo Paulo edi riba se ataieikomakomanidi, gigiboridi eo noodi Eaubada i hemasarahadi nimadi eai wa, Murimuri‐tataodi boeadi eai, taudi labui se ribaribaedi.

¹³Se riba lautom abotai abo Iamesi ie riba, i ene, “Tatao e, eo egu tataoyao e, egu riba ta au ataiei.

¹⁴Simeona wasa wa i ribaeyao Eaubada Murimuri‐tataodi i ita‐mugaiedio, headi ia bena i abidi se hemala ena tataoyao eai se lau.

¹⁵Peroveta ribadi hinage nei doha gonogonoadi mo, doha si uriyao si ene,

¹⁶‘Abotai abo ea uioma, Davida ena abamia iaede i gurio wa, abo ea hetorouioi; i tatagorigorio abo ea peigogouioi

¹⁷bena tatao gamagaridi Guiau se eooi, Murimuri‐tataodi gamagaridi hinage, isi wa esagu eai se eogaidi,

¹⁸Guiau ie riba, ia mumuga eai ginauri gamagaridi ta i hemasarahadi.’ (Amos. 9.11; Iere. 12.15; Is. 45, 21.)

¹⁹Na egu riba hedudurai ede teina ea ene, Isi Murimuri tataodi headi se sinibui Eaubada arinai tabu ta hemodedi.

²⁰Uriuri enadi mo ta uridi, ta ene edi oitau laulaudi tabu se abiwataiuioidi, tabu se itaitadio, eo ginauri gadodi se lamosidi abo se otaotaedi, eo osina hinage tabu se abilau.