Los Hechos 13:38-47

³⁸Mija ã'mitiᵽe yijeyomarã, ikuᵽaka mija õrĩrika yija yaᵽayu: Moiséte jã'meka ma'mitiriᵽẽakoᵽemaka, ba'iaja mabaaikareka mare tããbeyuka Tuᵽarã. I'suᵽaka simako'omakaja Jesúre ã'mitiriᵽẽairãte takaja ba'iaja baarikareka Tuᵽarãte ye'kariayu. Suᵽa imarĩ Jesúre baaekaᵽi ãrĩwa'ri, ba'iaja baakoribeyurã maime Tuᵽarã ñakoareka.

⁴⁰Rakajekaja mija imabe, bikija Tuᵽarãro'si bojaĩjirimajare bojaeka uᵽaka mijare sima'si ãrĩwa'ri. Mia je'e, ikuᵽaka sime: “ ‘Jia mija ã'mitiᵽe yire eebaraka, yire jaiwã'imañurãoka. Mija ruᵽurõ'õrã ima ikuᵽarõ'õᵽiji mijare ᵽuᵽatarãka. I'suᵽaka baawa'ri, mijare sariatarãñu. Mija ĩarãka wãjitãji majẽrãko'abeyua yibearãñu. Ĩ'rĩkate mijare sabojarikareka samija õrĩwãrũberijããeka’, Tuᵽarãte ãrĩka”, ãrĩwa'ri kirika bojarimajire o'oeka,— ãrĩwa'ri Ᵽablote wãrõeka Antioquíakarãre.

⁴²I'suᵽaka jaiweatirã Ᵽablorãkare ᵽoriwa'rika judíorãka rẽrĩriwi'iaᵽi. Naᵽoriwa'rika ᵽoto, —Aᵽea jẽrĩtarikareka ate yijare sawãrõrĩ mija i'tabe,— nare narĩka.

⁴³Toᵽi naᵽoriwa'rika ᵽoto rĩkimarãja judíorãkare Ᵽablo, Bernabéᵽitiyika nayejoariwa'rika. Suᵽabatirã judíorãkamarĩrã imariᵽotojo Moiséte jã'meka yi'riwa'ri judíorãkare baaroyika uᵽakaja baarimajaoka naka a'rikarã. I'suᵽaka nabaamaka ikuᵽaka Ᵽablorãkare nare bojaeka: —“Mare wayuĩariwa'ri Jesúre reyaekaᵽi ãrĩwa'ri jĩjimaka Tuᵽarãte maka ime”, ãrĩwa'ri mijare yija bojako'a mija yi'ririja'ata'si,— nare kẽrĩka.

⁴⁴I'sia be'erõ'õ jẽrĩtarirĩmi imaekareka, rĩkimabaji i'sia wejeakarãre torã rẽrĩka Tuᵽarãrika ã'mitiyaokaro'si.

⁴⁵I'suᵽaka nabaamaka jiamarĩa simaeka judíotatarã ĩᵽarimarãro'si. I'sirokaᵽi ãrĩwa'ri Ᵽablote bojamaka ã'mitiritirã aᵽerõ'õrã oyiaja nayi'rika. Suᵽabatirã kiwãrõeka okae'ebaraka ba'iuᵽakaja kire najairiwã'imarĩka.

⁴⁶I'suᵽaka nabaamaka, okajãjiaᵽi ikuᵽaka Ᵽablorãkare nare ãrĩka: —Judíorãka mija imamaka Tuᵽarãrika mijare yibojaũ'mutiraᵽe. I'suᵽaka simako'omakaja samija yi'ribeyu ruᵽu. I'siaᵽi ãrĩwa'ri, Tuᵽarãka õñia imajiᵽarika yaᵽabeyurã uᵽakaja mija ime. Mijare yija bojaika yaᵽabeyurã mija imamaka judíorãkamarĩrãte Tuᵽarãrika yija bojaerã baayu mae.

⁴⁷Mia, ikuᵽaka Tuᵽarãte yijare ãrĩka: “Judíorãkamarĩrã ᵽõ'irãoka mire yiᵽũatayu yimajaroka mibojaerã. ‘Ritaja ᵽo'imajare Tããrũkikate yi'yurãte takaja õñia kika Tuᵽarãte imajiᵽarũjerãñu’, ãᵽaraka ritaja ᵽo'imajare mibojabe”, ãrĩwa'ri Tuᵽarã majaroᵽũñurã sabojayu,— nare narĩka.