Kristus Klosan Lian 13:38-47

³⁸Mamaluk sia, rona diꞌa-diꞌak! Ema Moon nia, mak Yesus! Kalo ita fiar baa Nia, nanis Nia kasu itakaan salan. Masik ita haruꞌi aan tuir Ukun-Badu Bei Musa hotu-hotu moos, ita la biit. Naꞌi Maromak nanis nafoli ita naꞌak, ema maksalan. Mais, kalo ita fiar baa Yesus, Naꞌi Maromak nafoli ita naꞌak, ema loos.

⁴⁰Tan nunia, emi musti hanoin diꞌa-diꞌak. Keta toꞌo lia saa mak Maromak makoꞌan sia katak tiꞌan nia, kona baa emi. Tan sia nakerek nela naꞌak, ‘Sintidu, ema mak naleuk Haꞌu! Tan Haꞌu neꞌe, Maromak. Haꞌu kalo lia mak nalo ema blaar. Masik ema nalore tiꞌan lia nia baa emi moos, emi la simu. Sintidu! Nosi ikus emi hetan kastikar toꞌo mate.’ Tan lia nia, hanoin diꞌa-diꞌak mamaluk sia. Lia mak haꞌu katak neꞌe, keta firuk lakon, hanesan ema maleuk teen sia. Haꞌukaan dalen, toꞌo neꞌe dei.”

⁴²Dale hotu nunia, Paulus no Barnabas nariik atu laꞌo nela uma hamulak nia. Mais ema nia sia nusu nebee domiku oin, sia mai nikar nalore tenik lia Yesus nia.

⁴³Sia rua sai nosi uma hamulak, ema waꞌin moos sai tuir sia. Paulus no Barnabas foo lia tateꞌan baa sia naꞌak, “Naꞌi Maromak laran diꞌak tebes baa ita. Tan nunia, emi musti fiar metis baa Nia.”

⁴⁴Domiku oin, kona baa ema Yahudi siakaan loron boot, ema hotu-hotu mak iha kota nia tomak, kreꞌis mai hotu atu rona Naꞌi Maromak Manfatin.

⁴⁵Baa oras ema Yahudi sia naree ema waꞌin mai rona Paulus nunia, sia hirus. Hotu, sia sakar Paulus dalen, hotu dale nahaat nia.

⁴⁶Mais Paulus no Barnabas la nakiduk kois. Sia katak naꞌak, “Rona! Naꞌi Maromak loke uluk dalan bodik ita ema Yahudi, nodi foo Niakaan Manfatin baa ita. Tebes! Mais emi la simu Niakaan Manfatin nia. Tan baa nia, emi la fatan moris nima-nimak ho Nia. Oras neꞌe ami atu hodi Manfatin nia baa ema nosi klubun seluk sia.

⁴⁷Naꞌi Maromak duꞌuk mak naruka nunia hori uluk. Nia nodi Bei Yesaya nakerek nosi ita ema Yahudi naꞌak, ‘Haꞌu kfoti emi ema Yahudi, dadi hanesan badut bodik ema nosi klubun seluk sia, nebee emi haroma dalan mai baa Haꞌu, nebee Haꞌu ksori sia kosi siakaan salan. Emi musti hatudu dalan nia baa ema iha raiklaran tomak.’ ”