Loma: 16:8-22

⁸Mo hande Tekehali yaapo ta꞉ma꞉ni pea hala꞉ hali A꞉mbiliatusi make ota꞉ yaka yankeke pa꞉ta꞉ a꞉taloe pi la꞉niaasome.

⁹Nika꞉ mandakena꞉ hata꞉ Ketisona꞉ e pokao haloma꞉ hali Ebanusi ipiki pa꞉ta꞉ make ota꞉ yaka yankeke Sitakusi ipiki pa꞉ta꞉ make a꞉taloe pi la꞉niaasome.

¹⁰Hande ipika꞉ Ketiso pa꞉ta꞉ ti lao hala꞉eki peneme yala꞉ hali A꞉pelisi pa꞉ta꞉ make a꞉taloe pi la꞉niaasome. Hande Atisitobulusi tapake wanda꞉hali pa꞉ta꞉ make a꞉taloe pi la꞉niaasome.

¹¹Ya tapake Diu hali Hetodioni pa꞉ta꞉ make mo hande Nasisasi tapake Ketiso wanda꞉hali pa꞉ta꞉ make a꞉taloe pi la꞉niaasome.

¹²Tekehalina꞉ e pokao halepe hali yaapo Totaipina pita꞉ Totaiposa yaapo pa꞉ta꞉ make Tekehalina꞉ e wotu pokaala꞉ hali Pesisi pa꞉ta꞉ make a꞉taloe pi la꞉niaasome.

¹³Hande ponka꞉ ponka꞉ pilo hata꞉ Tekehalina꞉ e pokao hala꞉ hali Lupasi pa꞉ta꞉ make hande ipika꞉ eiyeke handeteke hala꞉ tupa꞉ kone I̱ make handeteke hao hala꞉ wanda꞉ Lupasina꞉ inkiki pa꞉ta꞉ make a꞉taloe pi la꞉niaasome.

¹⁴Asinkitidasi Pilekoni Hemesi Pa꞉todobasi Hema꞉si kutupa iki ame̱le̱ hao haleme Ketiso wanda꞉hali paeyao pa꞉ta꞉ a꞉taloe pi la꞉niaasome.

¹⁵Pilolokusi Diulia yaapo pa꞉ta꞉ make Netiasi ipika꞉ ana꞉ yaapo ipiliki pa꞉ta꞉ make Olimbasi pa꞉ta꞉ make kutupa iki ame̱le̱ hao haleme Koda꞉na꞉ wanda꞉hali paeyao pa꞉ta꞉ make a꞉taloe pi la꞉niaasome.

¹⁶Iki paeyaoma꞉ hande Ketiso wanda꞉halima꞉ pu haloma꞉ tupa꞉ hopula alualu pea꞉pa꞉peke. Ketisona꞉ siosimanu paeyaoma꞉ iki pa꞉ta꞉ a꞉taloe pi la꞉niaasememe.

¹⁷Yaka Ketiso kame titio. I̱ma꞉ iki sutiaaso hata꞉ dupiki pi alome. Mo wanda꞉halina꞉ hone tulaasemeeki hoeyaasa꞉eki make wanda꞉hali ka꞉ta꞉ alualu peaasa꞉eki make kutupiki hau piteleme wanda꞉halima꞉ iki hoeyaama꞉na꞉ma꞉ wotu handeteke hapa꞉peke. Amba꞉ titina꞉ iki pa꞉ta꞉ walemeke handa ikana꞉ma꞉ opimiki pi manuta꞉ ame mo wanda꞉halima꞉ tombualuekema꞉ taapelememe. Koto wanda꞉halita꞉ iki ame̱le̱ mandake pa꞉ta꞉ na momba꞉la꞉pa꞉peke.

¹⁸Kutupiki haumanu pu haleme wanda꞉halima꞉ta꞉ Tekehali Yesu Ketisona꞉ e na pokaake ika꞉ loke manuna꞉ na꞉na꞉ pa꞉la꞉ ekimanu homeke hone u halememe. Ikana꞉ma꞉ mo tendepiki nonopiki pa imeke piki pimanu aleme ekima꞉ mo hokeeki wopu na handeleme wanda꞉hali makeao halememe.

¹⁹Pate iki Loma꞉ wanda꞉hali ikana꞉ma꞉ mo hande Pi Seliapo opu haleme ekita꞉ mo wanda꞉hali paeyaoma꞉ amba꞉ opua wilimime. Kutu pa꞉la꞉ ekina꞉ I̱ma꞉ make iki pa꞉ta꞉ ta꞉na꞉ma꞉ homolome. Yaka hone pa꞉la꞉ ekita꞉ dupae. Ikana꞉ma꞉ta꞉ hokeeki puluekema꞉ hone na wiki wanda꞉hali hata꞉ epekeeki puluekema꞉ hone wopu wilimi wanda꞉hali hapa꞉peke hone witolome.

²⁰Kutu pimika꞉na꞉ta꞉ hande puki lopa꞉niaasa꞉ ekina꞉ teke hali Koda꞉ma꞉ mo Sadanita꞉ ika꞉ anke teke pa꞉ta꞉ lu tombualo pa꞉la꞉ ekita꞉ teke pa꞉ta꞉ ya꞉la꞉me. Tekehali Yesu ipika꞉ pa hameke a꞉ta꞉ma꞉ homa꞉la꞉eki iki ame̱le̱ pitina꞉ lena꞉e alome.

²¹Dika꞉ mandakena꞉ e pokao halopa꞉ hali Timodima꞉ make iki pa꞉ta꞉ a꞉taloe pi la꞉niaasa꞉me. Lusiasima꞉ make Dieisonima꞉ make Sosipeidema꞉ make mo mandane Diu tapake haliweki ikana꞉ma꞉ make iki pa꞉ta꞉ a꞉taloe pi la꞉niaasememe.

²²Do wape peawaaso hali Tetiasi I̱ma꞉ make Ketiso hali hata꞉ iki pa꞉ta꞉ a꞉taloe pi la꞉niaasome.