Romu 16:8-22

⁸Mo ngasovanu aso laixe noxilo ulai noxou Amipiliatusi anu menexilo no anu ꞌilixo noxou Kalisito.

⁹Mo ngasovanu aso laixe noxilo ulai noxou Ulivanusi anu nenge menexinge no anu xaixai noxou Kalisito. Mo ngasovanu aso laixe noxilo kalumo ulai noxou Sitakisi anu menexilo eni emasaxau manina.

¹⁰Mo ngasovanu aso laixe noxilo ulai noxou Apelisi kalumo. Anu itema vile e ta mitema ilemolu lexe anu itema sou umulimulinu Kalisito laixe. Mo ngasovanu aso laixe noxilo ulai noxiꞌa Alisitovulusi iloꞌa aneꞌi ane ixoxolu no tani noxou.

¹¹Mo ngasovanu aso laixe noxilo ulai noxou tulaleli Elotioni, mo ngasovanu aso laixe noxilo ulai noxiꞌa aneꞌi ane ixoxolu no tani noxou Nasisusi kalumo. Aneꞌi ta mitema noxou Tila.

¹²Mo ngasovanu aso laixe noxilo ulai noxiꞌa Tilipina ilee Tiliposa, aneꞌi ta sema ta tamei ilavusou ixaxai xavineꞌi manina no anu xaixai noxou Tila. Mo ngasovanu aso laixe noxilo ulai noxie Pesisi, ane sema vile ilavusou ixaxai xaviine no anu xaixai noxou Tila kalumo.

¹³Mo ngasovanu aso laixe noxilo ulai noxou Luvusi, anu itema laixe no anu xaixai noxou Tila, mo ulai noxie nenu, e ane loxo nenilo kalumo.

¹⁴Mo ngasovanu aso laixe noxilo ulai noxou Asinikilitusi mo Pelexoni mo Elemesi mo Patalovaisi mo Elemasi, xe ulai noxiꞌa ta vivilo e aneꞌi iloꞌa ixoxolu.

¹⁵Mo ngasovanu aso laixe noxilo ulai noxou Piloloxusi mo Iulia mo Neliusi ilee vimou mo Olinipasi xe ta mitema noxou Lataua e aneꞌi iloꞌa ixoxolu ipita ne.

¹⁶Mo ta temanu lalotu noxou Kalisito lai ꞌo misovanu aso laixe kalumo ulai noxinge. Mo ngingi ukalusi ne ngasexelangenge ngatongatoꞌo no anu ꞌilixo noxinge nenge ta mitema noxou Lataua.

¹⁷Ioxe, eni peletoto pekiaꞌu noxilo ulai noxinge ta vivilo ne aloxo ꞌo, ngalaxaꞌingengi laixe noxiꞌa ta mitema seꞌi no taingengi. Aneꞌi maasi la ipupuiou vaikala e ngingi ngenoꞌu ne, la ixalixu mamulo xe valavala. La sou ngaxolu vaꞌaxu noxiꞌa ta mitema aloxo ne.

¹⁸Xo ta mitema ane iꞌoxoꞌoxonu ꞌiliꞌilixo aloxo ne, ilavusou iꞌoxonu xaixai noxou Tila noxinge Kalisito uasi, aneꞌi ilavusou imulinu masaxa no anu vasimeꞌasi. Mo aneꞌi ilavusou iꞌoxonu vaikala soxu e lailaixe manina, mo iꞌoxonu vaikala tuꞌatuꞌaxu la iꞌoxonu loloxaꞌa aneꞌi ane ilavu laixe malaxo uasi.

¹⁹Xo ngingi ngalavusou ngamulimulinu vaikala noxou Lataua laixe, la aꞌalosinge muiaveiave mulai no tuatuala mukalu mo ta mitema milomusou, la muꞌoxoleli eni eꞌosa manina noxinge. Ia eni emasaxa lexe ngingi ngalavu laixe no anu ꞌilixo laixe xe ꞌilixo masua la ngaꞌume no anu.

²⁰Mo anu voxo ꞌalaisi sou Lataua opo seꞌisisi uꞌoxongengi ngataxapalisou Satani uxolu no laangenge. Alauna noxou Tila noxinge Iesu uxolu noxinge.

²¹Eni tangaxo Timoti e noxou texaxai tepita musovanu aso laixe ulai noxinge kalumo. Mo ta tulaleli Lukiosi mo Iasoni xe Sosipatele, aneꞌi kalumo misovanu aso laixe ulai noxinge.

²²Mo eni Tetiusi e ekaukavunu vaivaikala noxou Paulo ꞌo, esovanu aso laixe ulai noxinge kalumo no nano no anu ualasou Tila.