6Yaubada keke kaliva yadi huluva yamumuna fa隇媔na gidaluwafadi, au Tauna yana nuwadogeya giluwafadi. Ka隇媔 Yaubada kaliva yadi huluva yamumuna gida隇媔taluveluveni-yo gidaluwafadi digo, yana nuwadoga vaita dewa yamumuna fatana au keke nuwadoga velemo隇媏na.
7Yaubada yana lauwafa gavaiyami ana nuwanuwa? MiIsileli yadi yegayega Yaubada matane hilelelena tu keke moya隇媋idi hidanuhagani. Au tufoidiga Yaubada giluwafadi-ma kalivai-dina hinuhagana. Tu velugadiyao tagadi gikulu-mo隇媋.
8Meda anafaiweya yadi tagakulu fa隇媔na Veyao Tuwaina ana buki gigahe gigayo, Yaubada nuwadi gikivefanina be keke adifaiweya hinanuwanuwahagihagi, kadu keke adifaiweya hina隇媔tahalamana. Boi hidedemi hivebutu be gi隇媏la tova adamoya.
9Kadu Devida Yaubada nibaineyao gi隇媋latabutabuyedi ada yana gahe Veyao Tuwaina ana bukiya gidadauda gigayo, Yadi avemwamwala ana toveya Yaubada agedi ginavebahina be hinabe隇媢. Adi matahiwadi ginaveledi. Matadi ginakahuna be keke hina隇媔ta. Vita tulina tulina ginasive隇媜du-vagahidi. Au hidedemi Devida gigahe.
LOMA 11
LOMA 11:6-9