Lom 8:2-18

²Niminbabe, Yesus Klaiste bainobo gabob nibo daabenea Gode Hobe dabanea daak tenea nibo kima bie kesoa nibo Yesus Klaist etem nanoba nib bobol tem funino makob anoba afen biobobe. Sino nibo hengmino makob sa gein kenoa kima bianoa dletnoa aseinin bib unom genabob otane Gode Hobe hengmin olo tila omtlabenea nibo hengmino temo deibonobbiobe.

³Nibo hengmin gam kesoa Mosese hekmel wengo klao mo wafu binabobbabe. Hekmel weng olo nibo mo daabeim blim otane Gode funanea Ne i hengmin kukub olo yang kenano genea e miine makob nakai hengminsai ulab dabanea daak tenea atdimo kaanebiobe. Gode inanea nib kukub misiamo yang kenano gabeo omonea Yesuse dimanea eta nib alango dokonea atdimo kaanea nibo denobbiobe.

⁴E inanebio kesoa memalo hengmino nib bobol temo bibebuo nib damo mo kimanota skila kweila sitala kina klanga bobol temao mo wafu biobabe. Memalo Gode Hobe nib bobol temo bibe bie kesoa e titilo nibo daabenea nibo e hekmel weng ayamo kla wafubuobe.

⁵Nakaia unangai bobol tem funin misiamo wafu blibi bobol tem misiam olo gobo bianiba amitie inamomo gabinabiobe. Ina otane nakaia unangai Gode Hobe kukubo wafu blib ile Gode Hobe kukubo gobo bie ota amitie namomo gabinabiobe.

⁶I bobol tem funin misiamo amitie wafu blib mole i makob kaanabibi ulab blib kesoa i kaanimibo God esuo mo unomabibbabe. Ina otane i Gode Hobe bobol temo fumbe ota isa funib mole i sma afen bliba Gode bobol tem ayamo omkayemabebe.

⁷I bobol tem funin misiamo wafu bianiba i damo kukub misiamo nanomo galib mole i Gode makaabe. I funaniba Ni bobol tem funin misiam ota wafunomo gabib kesoa i Gode hekmel wengo mo wafu blibbabe. I titil blim kesoa i Gode hekmel wengo mo wafu blibbabe.

⁸Inabib naka unang ile bobol tem funin misiam ota wafu blib kesoa Gode mo seinyebebabe.

⁹Ina otane ibo bobol tem funin misiam olo mo wafu blibbabe. Niminbabe, Gode Hobe ib bobol temo bie kesoa ibo e bobol temo fumbe ota ibsa fumbiobe. Eka Klaiste Hobe ib bobol temo mo bieba mole ibo Klaist emibabe.

¹⁰Ibo hengmino hengabib kesoa ib damo kaanomabib otane Klaiste ib bobol temo bibe bie kesoa Gode ib hengmino omtlanea baabenea Ibo naka molot unang molotobo gabe kesoa ib afen smiki Gode temna bliobe.

¹¹Eka Gode Yesuse imin dofaanebue e Hobe ib bobol temo bibe biebe. E Yesuse imin dofaanebio kesoa ibo tekein kebiobe, ib damo kaanomabib otane Gode, e Hobe ib bobol temo bibe bie baabanea Kobo i daabenale genea e ibo daabenea ib damo imin dohaanea hananiba afenomabiobe.

¹²Inamin kesoa ne nekwal ibo nibo bobol tem funin misiam olo mo wafu bianobta kukub misiamo mo namobe! Gode Hobe Ibo kukub ayam ota namine ge oye bianea daayebe kesoa nibo e bobol temo fumbe ota nibsa fumbianoba wafu nomo!

¹³Niminbabe, nakaia unangai memalo bobol tem misiam fumbibi kaanimibo God esuo mo unomabibbabe. Ina otane nakaia unangai Hobe baabaniba Ni titil blim kesoa ni kukub misiam osa bobol tem funin misiam osa mo deibonomabbiobabo, kobo ni daabeneba keb titilo omyeba ni kukub misiam osa bobol tem funin misiam osa deibonomo genimibi Gode afen smike i dobya amit nomabiobe.

¹⁴Nakaia unangai Gode Hobe wengo wentehabib ita Gode memebe.

¹⁵Sino tosianin kukub ota ibo kima binobi otane memalo Gode Hobe ib bobol temo bibe bie kesoa tosianin kukubo ibo imino mo kima biobabe. Hobe nib bobol temo bie ele nibo daabenea Gode meme anoba E ayo ge ohabuobe.

¹⁶Gode Hobe emaye nibo baabenea Ibo Gode memebo gabea nib bobol temo fumbianoba E weng olo bainobo ge fumbuobe.

¹⁷Eka nibo e meme anob mole e inamin namin ayamo dlomabbiobe. Inamin namin olo Yesus Klaiste dlamabe ota nibsa dlomabbiobe. Nibo e kukub ayamo wafu biob o dafa ota naka maki teniba makob sino i Yesuse enino omalibbio inaniba nibsa enino omkayebiobe. Nibo inanoba Klaiste tenanoba enin kino watemob mole nibte ete nanoba abilim uto bianoba seinomabbiobe.

¹⁸Ne tekein kebibe, nib enin kino watemebobo gwabobe. Ina otane sinanoa nibo naka molot unang molot anoba makob Klaiste ulab anomabbio kukub olo dot ayam kesoa nibo enin kino watemebobo bobolo mo funomobe!