Lifitikos 9:13-23

¹³Ra pwal ngeni eu me eu kinikinin ewe mönün asoren kek pwal möküran, nge Aaron a kenirela won ewe rongen asor.

¹⁴Iwe, a talü pisekin lon inisin me pechen o kenirela fiti ewe asoren kek won ewe rongen asor.

¹⁵Mürin, Aaron a uwato än ekewe aramas asor. Iwe, a angei ewe ätemwänin kuuch pwe asoren tipis fän iten ekewe aramas, o niela. Iwe, a föri angangen asoren tipis, usun chök ewe aeuin asoren tipis a föri fän püsin itan.

¹⁶A pwal uwato ewe mönün asoren kek o eäni asor lon pwüngün angangen allükün.

¹⁷Iwe, a pwal uwato ewe asoren mongö, a angei ekumwuch seni o keni me won ewe rongen asor pach ngeni ewe asoren kek mi fis iteiten rän.

¹⁸Mürin, Aaron a pwal niela ewe ätemwänin kow me ewe ätemwänin sip pwe asoren kinamwe fän iten ekewe aramas. Iwe, nöün Aaron kewe mwän ra uwato chan ekewe mönün asor ren, nge Aaron a uti ngeni pwelin ünükün ewe rongen asor.

¹⁹Iwe, ra angei kirisin ewe ätemwänin kow me kirisin ewe ätemwänin sip, iei ewe mechan mi kiris echök, ewe kiris mi pwölüela pisekin lon inisir, ekewe föün lor me mwärekeon ammünür,

²⁰o iseis meinisin won leupwen ekewe mönün asor. Mürin Aaron a angei ewe kiris o kenala won ewe rongen asor.

²¹Nge ekewe leupwan me pelifichin pechen, Aaron a assawa pwe eu asoren assaw fän mesen ewe Samol mi Lapalap, pun iei usun Moses a fen allük.

²²Iwe, wesin än Aaron eäni ekewe asoren tipis me asoren kek pwal asoren kinamwe, a aitiela pöün won ekewe aramas o afeiöchüür. Mürin a feitiu seni ewe rongen asor.

²³Mürin, Moses me Aaron ra tolong lon ewe imw mangaku ia aramas ra churi Kot ie. Nge lupwen ra towu, ra afeiöchü ekewe aramas. Iwe, lingen ewe Samol mi Lapalap a pwä ngeni ekewe aramas meinisin.