Lifitikos 10:3-12

³Mürin, Moses a üreni Aaron, “Iei usun wewen mine ewe Samol mi Lapalap a apasa: Üpwe pwärätä pwe ngang üa pin me lein chokewe ra kan ngeniei, nge üpwe pwal alinga ai ling fän mesen aramas meinisin.” Iwe, Aaron a chök fanafanala.

⁴Mürin, Moses a körato Misael me Elsafan nöün Ussiel mwän, nge Ussiel pwin semen Aaron. Iwe, a üreniir, “Oupwe kaneto o ekiela pwimi seni lon ewe imwenfel seni mangaku, pwe oupwe ekirewu lükün ewe ia aramas ra nonom ie.”

⁵Iwe, ra feito o ekirewu lükün ewe ia aramas ra nonom ie, usun Moses a apasa, nge ekewe somä ra chüen üföüf üfer üfen souasor.

⁶Mürin, Moses a üreni Aaron me nöün kewe mwän iter Eleasar me Itamar, “Ousap atorongauei möküremi, ousap pwal kamwei üfemi pwe asisilen ämi letipeta, pwe ousap mäla, nge ewe Samol mi Lapalap esap pwal song ngeni unusen ewe mwichen aramas. Nge pwimi ekewe chon Israel meinisin repwe kechüeiti afeiengauen ewe kar, ewe Samol mi Lapalap a afisätä.

⁷Ousap towu seni leasamalapen ewe imwenfel seni mangaku, pwe ousap mäla. Pun än ewe Samol mi Lapalap löön epit a nonom womi.” Iwe, ra föri usun mine Moses a kapas ngeniir.

⁸Iwe, ewe Samol mi Lapalap a kapas ngeni Aaron,

⁹“En me noum kana mwän ousap ünümi wain are sakau mi pwichikar, lupwen oupwe tolong lon ewe imw mangaku ia aramas ra churiei ie, pwe ousap mäla. Iei eu allük esemwüch ngenikemi me mwirimwirimi kana, seni eu täppin aramas tori eu täppin.

¹⁰Oupwe alefila lefilen mettoch mi pin me mettoch resap pin, pwal lefilen mettoch mi limengau me mettoch mi limöch.

¹¹Oupwe pwal aiöü ngeni ekewe aramasen Israel ekewe allük meinisin ngang ewe Samol mi Lapalap üa ngeni Moses pwe epwe aiti ngeniir.”

¹²Iwe, Moses a üreni Aaron me nöün kewe mwän mi chüen manau iter Eleasar me Itamar, “Oupwe angei ewe asoren mongö lusun ewe asor won ekkei ngeni ewe Samol mi Lapalap, pwe oupwe mongö ewe pilawa esap wor iis lon lükün ewe rongen asor. Pun ei asor a unusen pin.