لٍوِ سّرّشّدُبّ 10:3-12

³عَننَبِ مُنسَ نَشَ عَ قَلَ هَرُنَ بّ، «عَلَتَلَ وٌ رَكٌلٌنشِ نّ يِ رَ، عَ تٌ عَ قَلَ، ‹نَشٍيٍ مَكْرّ ﭑ نَ، عٍ شَ عَ كٌلٌن ﭑ سّنِيّن، حَمَ شَ ﭑ بِنيَ.›» هَرُنَ نَشَ دُندُ يٍن.

⁴عَننَبِ مُنسَ نَشَ مِكَيٍلِ نُن عٍلِسَقَن شِلِ، هَرُنَ بَبَ شُنيَ يُسِيّلِ شَ دِيٍ. عَ نَشَ عَ قَلَ عٍ بّ، «وٌ شَ وٌ نفَشَكٍرٍنيِيٍ قُرٍيٍ شَنِن حَمَ يٌنكِندٍ قَرِ مَ، دّننَشّ مَكُيَ يِرٍ سّنِيّنشِ رَ.»

⁵عٍ نَشَ عٍ قُرٍيٍ شَنِن حَمَ يٌنكِندٍ قَرِ مَ، عَلْ عَننَبِ مُنسَ عٍ يَمَرِشِ كِ نَشّ. عٍ نُ بَرَ سّرّشّدُبّ دُفِيٍ لُ عٍ قُرٍيٍ مَ.

⁶عَننَبِ مُنسَ نَشَ عَ قَلَ هَرُنَ نُن عَ شَ دِيٍ بّ، عٍلٍيَسَرِ نُن عِتَمَرِ، «وٌ نَشَ وٌ شُنسّشّ رَبّحِن، وٌ نَشَ وٌ شَ دُفِيٍ قَن عِبْو. وٌ نَشَ سٍسٍ رَبَ نَشَن نْمَ سُننُنيِ مَسٍندٍ يِ مِشِيٍ شَ قَشّ شَ قٍ رَ، عَلَكٌ عَلَتَلَ نَشَ شْنْ حَمَ مَ، عَ وٌ قَن قَشَ. وٌ نفَشَكٍرٍنيِ عِسِرَيِلَكَيٍ تَن نْمَ سُننُندٍ يِ مِشِيٍ شَ قٍ رَ عَلَتَلَ نَشٍيٍ قَشَشِ تّ رَ.

⁷وٌ نَشَ كٍلِ عَلَ شَ هْرْ مْلِنفِرَ سٌدٍ دّ رَ يِ سَشَنيِ، عَلَكٌ وٌ نَشَ قَشَ. عَلَتَلَ شَ مِشِ سُفَندِشِيٍ نَن وٌ تَن نَ.» عٍ نَشَ عَننَبِ مُنسَ شَ يَامَرِ رَبَتُ.

⁸عَلَتَلَ نَشَ عَ مَسٍن هَرُنَ بّ،

⁹«وٌ نَ سٌ هْرْ مْلِنفِرَ كُي، وٌ نَشَ وّنِ مِن. وٌ نَشَ مِنسٍ يٌ مِن نَشَن مِشِ سِيسِمَ، شَ نَ مُ عَ رَ وٌ قَشَمَ نّ. نَ سّرِيّ مُ كَنَمَ وٌ بْنسْي بّ عَبَدَن.

¹⁰نَ نَن عَ نِيَمَ وٌ نْمَ عَلَ فبٍ نُن عَدَ مَدِ فبٍ تَفِ رَبَدٍ، سّنِيّنيِ نُن سّنِيّنتَرٍحَ.

¹¹نَ قَن عَ نِيَمَ نّ وٌ شَ نْ عِسِرَيِلَكَيٍ شَرَندٍ عَلَتَلَ شَ يَامَرِيٍ رَ، عَ نَشٍيٍ قِشِ عٍ مَ عَننَبِ مُنسَ سَابُي رَ.»

¹²عَننَبِ مُنسَ نَشَ عَ قَلَ هَرُنَ نُن عَ شَ دِ دْنشْييٍ بّ، عٍلٍيَسَرِ نُن عِتَمَرِ، «سَنسِ شْرِ دِنشِ نَشَن بَشِ سّرّشّ رَ عَلَتَلَ بّ، كْنْ نَشَن بِرِن مُ فَنشِ تّ رَ، وٌ شَ نَ دٌن سّرّشّبَدٍ قّ مَ. وٌ نَشَ لّبِنِ سَ عَ شُن مَ دٍ، بَرِ مَ عَ سّنِيّن.