Levi 8:13-25

¹³Muri e Moses i tuli e huriki e tune Aron ri valai, i vakarodo ria na nirodo, i vakarea ria na palabele, i vakatama ria na tama, i ramaia a ngava e BAKOVI DAGI i vakukua vona.

¹⁴Muri e Moses i bolea a bulmakau a toga, ge a nihabi na naro hale. Lakea e Aron turana e tuna mai ri ru langa a limane ria na gina.

¹⁵Muri e Moses i rabalakia a bulmakau, i lutu a kukulimana na darana, i ravu na maka tupina dede na nihabi gutu-vuro. Na naro iea kunana i gamaia a dede i matapado na matana Vure. Muri i bole paru a darana i tababana, i guru na taruna dede, i gamaia, i kavitagua.

¹⁶Lakea e Moses i bole a vina pololilo na mahalana, a kinake i kavitagu a hate, a vuanalipi i rua turana vina, i gutu-vuro na dede.

¹⁷Pali i bole ranga balena bulmakau turana a kulina, a bobona, a tahena, i gutu-vuro polovavo na mada, i ramai a ngava e BAKOVI DAGI i vakuku e Moses vona.

¹⁸Muri e Moses i bolea tara sipsip a toga ge a nihabi gutu-vuro. Lakea e Aron turane huriki e tuna ri ru langa a limane ria na gina.

¹⁹Muri e Moses i rabalakia, i bole a darana, i voro tamali langa na tabekena dede i va.

²⁰I pala kesikesia a sipsip, i gutu a gina, a vina, a balena.

²¹I vahilolo a maka mahalana, a vahana. I gutu loboa langa na dede. Ra sipsip iea a nihabi gutu-vuro ni rata na kanono, i manginoro a mangina. Ia a nihabi ni gutu na kanono ne BAKOVI DAGI, i ramaia a ngava e BAKOVI DAGI i vakuku e Moses vona.

²²Muri e Moses i bole tabua tara sipsip a toga, ne vona ni gamai a bakovi ge ia a prister. Lakea e Aron turane huriki e tuna ri ru langa a limane ria na gina sipsip.

²³Muri e Moses i rabalakia a sipsip iea, i bole ranga darana, i ravu na taruna talingana kanena ne Aron, na kukukoru na limana kanena, na kukukoru na vahana kanena.

²⁴Muri i tuli valai e huriki e tune Aron, i ravu a dara na taruna talingana kanene ria, na kukukoru na limana kanena ne ria, a vahana kanena ne ria. I bole paru a dara i tababana, i voro tamali lakea na tabekena dede i va.

²⁵Muri i bole a vina, a vina na kuna, a vina na mahalana, a kinake i kavitagu a hate, a vuanalipi i rua turana a vina, a pona kanena.