Levi 13:10-54

¹⁰A prister ge lei kamumua a kulina, ge masia a kulina i vaki, i kea, i ratea a vungana i kea, i mapoka a hini i vaki,

¹¹ra bakovi iea i tahoka a patala. A prister ge vakalongoa a bakovi iea i muto. Ngane a prister i lohoka vona, ra bakovi iea i muto, pali nahea ge tonoa ge made kikeri.

¹²“Na tahuna a prister i masia a patala i rako lae na kulina viri, i tubu na gina i puru na vahana,

¹³a prister ge lei kamumu tabua a kulina. Ia ge masia a gilanga i rako lobo na kulina, i ratea a kulina i kea, a kulina ge kea lobo, ra bakovi iea i matapado, a vuhuna a kulina i kea lobo pali.

¹⁴Pali na tahuna a patala i mapoka, i tabuli kavakava a bobona, ra bakovi iea i muto.

¹⁵A prister ge lei tabua a patala, ge masia i mapoka, i tabuli kavakava a bobona, ra bakovi iea i muto. Ra gilanga maea i hale hateka.

¹⁶Pali na tahuna a gilanga i lobo, i keke a murina, ra bakovi iea ge hamule lakea tabu na prister.

¹⁷A prister ge lei kamumua a kulina a bakovi iea, bara i masia i lobo, i keke a murina a patala, ra bakovi iea i matapado. Muri ge vakalongoa i matapado pali.

¹⁸“A viri tara ge tahoka a loto na kulina, a loto vona i mavu,

¹⁹muri a murina loto i keke, i vaki tala, i vururu, ra bakovi iea ge lakea na prister.

²⁰A prister ge lei kamumua a murina loto na bakovi. Na tahuna i mata visi a vungana na tabeke i vaki i kea, a ngarava vona i ngara i dupi, a prister ge takia a bakovi iea i muto. I tahoka a patala.

²¹Pali na tahuna a prister iea i lei kamumu a loto, i masia i uka ma i ngara, i uka ma i kea a vungana, ge tonoa ge made kikeri na parava ge polorua.

²²Muri na parava ge polorua ge lobo, a loto ge vaki dagi, ra loto iea a maki hale, lakea a prister ge takia a bakovi i muto.

²³Pali bara a loto iea i tabuli na hini i taku kunana, i uka ma i rako ge tuvu lakea na hini ranga, ra loto iea a vuruna loto muga, a prister ge takia a bakovi iea i matapado.

²⁴“Na tahuna a viri i gutua a kanono a kulina, i lele a bobona, i vururu keakea o i keakea,

²⁵a prister ge lei kamumua a ngarava vona, ge masia a vungana ge kea na hini i gutua a kanono, i ngara i dupi, ra gilanga iea a patala. A hini i gutua a kanono i vakabelea a patala. A prister ge takia i muto.

²⁶Pali na tahuna a prister i lei a kulina, i uka ma i matai a vungana ge kea na hini i gutua a kanono, i uka ma i ngara, a prister ge takia a bakovi ge made kikeri na parava ge polorua.

²⁷Na poloruana parava a prister ge lei kamumu tabua a bakovi. A gilanga vona ge rako lae, a prister ge takia i muto. I tahoka a patala.

²⁸Pali a ngarava i uka ma i ngara, a harena kanono i kamumu kunana, a prister ge vakalongoa a bakovi iea i matapado, a vuhuna a ngarava vona a murina hini i gutua a kanono.

²⁹“Na tahuna a bakovi, a ngatavine i vona a vuruputuka a gina, o i pero a sivana,

³⁰a prister ge lei kamumua. A prister ge masia a vuruputuka, a pero ge dupi dili na kulina, a vungana ge ngango ngango, i makudu lae a vuna, ngane a prister ge vakalongoa i muto. A gilanga vona, a patala, i makali.

³¹Na tahuna a prister i lei kamumua a vuruputuka a pero na bakovi, i matai i uka ma i dupi dili, a vuna i uka ma i koru rike ma, ge takia a bakovi ge made kikeri taro na parava ge polorua.

³²Na poloruana parava, a prister ge lei tabua a kulina bakovi iea. A vuruputuka a pero i uka ma i tuvu lakea na hini ranga, i uka ma i ngango a vungana, i uka ma i dupi dili,

³³a bakovi iea ge ali a vuna na gina, a sivana, pali nahea ge ali a hini i tuvu vona a vuruputuka a pero. Muri a prister ge takia ge made kikeri na parava ge polorua.

³⁴Na poloruana parava, a prister ge lei tabua a vuruputuka a pero na bakovi iea. A vuruputuka a pero i uka ma i ngara, ge takia a bakovi iea i matapado. Muri ge loi a maka kala vona bara i matapado ia.

³⁵Pali a vuruputuka a pero ge rako lae muri na tahuna a prister i takia i matapado,

³⁶a prister ge lei tabua a kulina, i masia i rako lae na kulina a gilanga, nahea ge matakana a vuna i ngango, a vuhuna a bakovi iea i muto.

³⁷Pali a prister i lei kamumua a bakovi, i matai a vuruputuka a pero i uka ma i ngara, i tuvu mule a ivu, a prister ge takia a bakovi iea i matapado.

³⁸“Na tahuna a bakovi, a ngatavine tara i tahoka a maki i keke lae na kulina,

³⁹a prister ge lei kamumua a hini keke. I uka ma i kea hateka, a maki tavula. A bakovi iea i matapado.

⁴⁰“Na tahuna a vuna bakovi i makudu tala na gina i lete, ra bakovi iea i mata­pado.

⁴¹A vuna bakovi i makudu na hini polomeli na dumena, i lete, ra bakovi iea i matapado.

⁴²Pali bara a ngarava tara ge bele na lete vona i vururu i kea, ra gilanga iea a patala.

⁴³Muri a prister ge lei kamumua a ngarava iea, ge vururu ge vona kume, ra ngarava iea i mata manga a patala.

⁴⁴Ra gilanga i tabuli na gina i hale hateka, a patala. A prister ge takia a bakovi iea i muto.

⁴⁵“A viri i tahoka tara ngarava hale maea ra patala, ge rea na matutuna varakia, nahea ge pelengea a vuna. Ge kavitagua a ngavana na limana, ge gale maea, ‘Iau a muto! Iau a muto!’

⁴⁶A bakovi i tahoka a gilanga maea, i muto. Ge pagitala na mada, ge made kikeri polovavo.

⁴⁷“Na parava ranga a limuta i tuvu na maka varakia ni rata na vuna sipsip, na kala, na kulina bulmakau.

⁴⁹Ra maki iea ge goma o ge vururu, bara i rako lae, ni gi bole ni gi vakasiri na prister.

⁵⁰A prister ge bolea ge lei kamumua, ge ru herehere na tabeke tara, ge harena na parava ge polorua.

⁵¹Na poloruana parava ge lei kamumu tabua. A limuta ge tuvu lobo vona, bara i ratapilea. A maki i tuvu vona i muto.

⁵²A prister ge bole a maki nga ge rungani na kanono, a vuhuna a maki i manga a patala i bele ne ria.

⁵³“Bara prister ge masia a maki iea i maea kunana, i uka ma i tuvu tala tabu na maka varakia,

⁵⁴ge taki ria ri gi loi a maka varakia, ri gi ru here na parava ge polorua tabu.