IKUƆ́ NÌÙBƐ̀ 13:10-54

¹⁰Kòo ò wèńtɛ́, kòò sɔ̃́ ndinútírì mɑrì ɑ̃nnɛ́ o kɔ̃̀ntì, kɛ̀ ticìtì wũɔ̃tɛ́ dɛborɛ̀ kɛ̀ dɛ̀ tɔ̀tɛ́.

¹¹Dɛ kó mumɔmmú ò bimu. Ikuɔ́ nìùtìi ò nɑ̀kɛ́ kɛ dɔ̀ ò sĩ̀mmu, ò bɑ́ɑ́ bennɛ́ kóò cɑ̃̀nnɛ́ omɑ́ɑ̀ borɛ̀ kɛ bo ò wèńní ò sĩ̀mmu.

¹²Kɛ̀ dɛ kó inútíbí mɛ mpitɛ́ o kɔ̃̀ntì timɔu ĩ́nkɛ̀, o yuu nɛ̀ o nɑɑ̀cɛ̀io, ikuɔ́ nìùtì bo nɑ kɛ́wéntɛ́ dɛ̀ɛ̀ kó dimɑ̀ɑ̀.

¹³Kòò wèńtɛ́ kɛ sɔ̃́ ndɛ kó mumɔmmú bo o kɔ̃̀ntì timɔu ndi wèe ò nɑ̀kɛ́ kɛ dɔ̀ ò í sĩ̀. Kɛ yɛ̃́ o kɔ̃̀ntì timɔu tiì pɛikɛmɛ̀, ò í sĩ̀.

¹⁴Kɛ̀ dɛ̀ mɛ mboní kɛ̀ dɛ̀mɑrɛ̀ tɔ̀tɛ́ kɛ nɑɑ́ ndɛmɔnnɛ ò sĩ̀ntɛmu.

¹⁵Kɛ̀ ikuɔ́ nìùtì wèńtɛ́ dɛ kó ditɔ́tírì wèe ò nɑ̀kɛ́ kɛ dɔ̀ ò sĩ̀mmu, tikɔ̀ntì nti.

¹⁶Kɛ̀ dɛ kó ditɔ́tírì wɛ̃̀tɛ kɛ pɛikɛ wèe yɑ̀ ikuɔ́ nìùtì.

¹⁷Kòo ò wèńtɛ́ kòò sɔ̃́ ndɛ kó ditɔ́tírì pɛikɛ wèe ò nɑ̀kɛ́ kɛ dɔ̀ o mɔmmú í tú musĩ̀mmù, ò í sĩ̀.

¹⁸Kɛ̀ dɛ̀ mɛ ndò ndinútírì diì yɛ̀ òmɔù kɛ miɛtɛ́.

¹⁹Kɛ̀ dimutiri dii mɛ nhɑ̃nnɛ́ dinútírì do borɛ̀, kɛ dɔ́ kɛ́mpɛ́ì kɛ wɛ̃̀tɛ kɛ wũɔ̃, dɛ yiɛ̀ mbɛnkɛ omɑ́ɑ̀ ikuɔ́ nìùtì.

²⁰Kòò ò wèńtɛ́, kòò sɔ̃́ ntikɔ̃̀ntì dɔ́ kɛ́nɑɑ́ ntɛfɔ̃̀tɛ̀ dɛborɛ̀ kɛ̀ ticìtì pɛikɛ, wèe ò nɑ̀kɛ́ kɛ tú: Mumɔmmú sĩ̀mmù muù dɔ́ kɛ́feitɛ́ dinútírì do yɛ̀ dɛ̀.

²¹Kòò mɛ nhò wèńtɛ́ kɛ sɔ̃́ nticìtì í pɛikɛ, tikɔ̃̀ntì mɛ nyí nɑɑ́ ntɛfɔ̃̀tɛ̀ dɛborɛ̀ kɛ̀ dɛ̀ dɔ́ kɛ́ceetɛ, weè ò kɑ̀nnɛ kɛ̀ dɛ̀ dɔ̀ yɛwe yɛ̀yiekɛ̀.

²²Kɛ̀ mù pɛ̃̀kɛ̀ o kɔ̃̀ntì wèe ò nɑ̀kɛ́ kɛ tú dɛ kó mumɔmmú tú musĩ̀mmù mmu, tikɔ̀ntì nti.

²³Kɛ̀ dɛ̀ mɛ ndò ndɛ̀ í pɛ̃̀kɛ̀ o kɔ̃̀ntì ĩ́nkɛ̀, dinútírì kó kufíɛ̀kù nku, wèe ò nɑ̀kɛ́ kɛ dɔ̀ ò í sĩ̀.

²⁴Kɛ̀ dɛ̀ mɛ ndò nhòmɔù weè cɔ̀útɛ́ kɛ̀ dinútírì yɛ̀ dɛ kó kuhɑ̃ɑ̃tɔ̀ntɔ̀nkù ĩ́nkɛ̀, kɛ wɛ̃̀tɛ kɛ dɔ́ kɛ́nwũɔ̃, kɛ dɔ́ kɛ́mpɛ́ì yoo dɛ̀ pɛ́ì,

²⁵ikuɔ́ nìùtìi ò wèńtɛ́, kòò sɔ̃́ nticìtì dɔ́ kɛ́pɛikɛ yoo tikɔ̃̀ntì dɔ́ kɛ́nɑɑ́ ntɛfɔ̃̀tɛ̀ dɛborɛ̀, tikɔ̀ntì tiì ò pĩ. Ikuɔ́ nìùtìi ò nɑ̀kɛ́ kɛ dɔ̀ o mɔmmú tú musĩ̀mmù mmu, ò sĩ̀mmu.

²⁶Kɛ̀ dɛ̀ mɛ ndò nyikuɔ́ nìùtì ò wèńtɛ́ kɛ sɔ̃́ nticìtì í pɛikɛ dɛborɛ̀, tikɔ̃̀ntì mɛ nyí nɑɑ́ ntɛfɔ̃̀tɛ̀ dɛborɛ̀ kɛ cèètɛ kɛ pɛikɛ, wèe ò kɑ̀nnɛ kɛ̀ dɛ̀ dɔ̀ yɛwe yɛ̀yiekɛ̀.

²⁷Diyiè yiénnì yiè wèe wɛ̃tɛ kóò wèńtɛ́, kɛ̀ dɛ kó tɛwũɔ̃tɛ̀ pɛ̃̀kɛ̀, wèe ò nɑ̀kɛ́ kɛ dɔ̀ o mɔmmú tú musĩ̀mmù mmu, ò sĩ̀mmu, tikɔ̀ntì nti.

²⁸Kɛ̀ dɛ kó tɛwũɔ̃tɛ̀ mɛ nyí dɛukɛ, kɛ dò ntɛdòntì kɛ pètìnkɛ dɔ́ kɛ́ceetɛ, muhɑ̃ɑ̃́ mmuù ò cɔ̀útɛ́ kɛ̀ dɛ̀ dɔ́ kɛ́pɛikɛ, ikuɔ́ nìùtìi ò nɑ̀kɛ́ kɛ dɔ̀ o mɔmmú í tú musĩ̀mmù, kuhɑ̃ɑ̃tɔ̀ntɔ̀nkù kó kufíɛ̀kù nku.

²⁹Kɛ̀ yɛmuɔ nhɑ̃nnɛ́ onitidɔ̀ù yoo onitipòkù yuu yoo o kúóǹnì:

³⁰Ikuɔ́ nìùtìi wéntɛ́ dɛ kó dɛmɔnnɛ, kòò sɔ̃́ ndɛ̀ dɔ́ kɛ́nɑɑ́ ntɛfɔ̃̀tɛ̀ dɛborɛ̀, kɛ̀ ticìtì wũɔ̃tɛ́ kɛ yɛ̃ ntimɑ timɑ, wèe ò nɑ̀kɛ́ kɛ dɔ̀ o mɔmmú tú musĩ̀mmù mmu, yɛyukɔ̃̀rɛ̀ kó mumɔmmú mmu yoo dikúònnì kɔ̃mu.

³¹Kɛ̀ dɛ̀ dò nyikuɔ́ nìùtì ò wèńtɛ́ kɛ sɔ̃́ nyɛyukɔ̃̀rɛ̀ í ɑ̃nnɛ́ tɛfɔ̃̀tɛ̀ dɛborɛ̀ yoo tiyùtì í sɔ̀utɛ, wèe ò kɑ̀nnɛ kòò dɔ̀ yɛwe yɛ̀yiekɛ̀.

³²Diyiè yiénnì yiè kòo ò wèńtɛ́ kòò sɔ̃́ ndɛ kó mumɔmmú í pɛ̃̀kɛ̀ tiyùtì mɛ nyí wũɔ̃tɛ́, dɛ̀ mɛ nyí nɑɑ́ ntɛfɔ̃̀tɛ̀ dɛborɛ̀,

³³omuɔntii kuó kɛ́soó ndɛ kó dibòrì kɛ̀ ikuɔ́ nìùtìi yíɛ́ kóò kɑ̀nnɛ kòò dɔ̀ yɛwe yɛ̀yiekɛ̀.

³⁴Diyiè yiénnì yiè kòò ò wèńtɛ́ kɛ sɔ̃́ mmù í pɛ̃̀kɛ̀, dɛ̀ mɛ nyí nɑɑ́ ntɛfɔ̃̀tɛ̀ dɛborɛ̀, wèe ò nɑ̀kɛ́ kɛ dɔ̀ ò wenkɛmu, kòo ɔ́ú o yɑ̀ɑ̀tì kɛ́wenkɛ.

³⁵Kòò mɛ nhɔ́ú o yɑ̀ɑ̀tì kɛ dèè kɛ̀ dɛ kó mumɔmmú pɛ̃̀kɛ̀.

³⁶Ikuɔ́ nìùtìi wɛ̃tɛ kóò wèńtɛ́ kòò sɔ̃́ ndɛ kó mumɔmmú pɛ̃̀kɛ̀ kɛ̀ tiyùtì wũɔ̃tɛ́ ò sĩ̀mmu. Ikuɔ́ nìùtì bɑ́ɑ́ bennɛ́ kɛ́nwéí tiyùtì bo wũɔ̃tɛ́mɛ̀.

³⁷Kɛ̀ mù í tòtɛ, kɛ bɑɑ dò mmudòntì. Kɛ̀ tiyusɔ̀ùtì yɛ̀, ò miɛtɛ́mu, ò í sĩ̀. Ikuɔ́ nìùtìi ò nɑ̀kɛ́ kɛ dɔ̀: A í sĩ̀.

³⁸Kòo nitidɔ̀ù nwe yoo onitipòkù, kòò sɔ̃́ nho kɔ̃̀ntì ɑ̃nnɛ́ tɛpɛ́ítɛ̀.

³⁹Ikuɔ́ nìùtìi ò wèńtɛ́. Kɛ̀ dɛ kó tɛpɛ́ítɛ̀ dò ntɛdòntì kɛ í cèètɛ, mùmɑmù í ò dò ntɛpɛ́ítɛ̀ tɛɛ̀ cɛ̃́nkɛ ɑ̃nnɛ́ o kɔ̃̀ntì, ò í sĩ̀.

⁴⁰Kòo nìtì yuu fɔ̃ũ ò mɔ̀kɛ mɛyukɑ́nkɑ́mmɛ̀ mmɛ, ò í sĩ̀.

⁴¹Kòo tĩ́nnì kó tiyùtì tiì mɛ nfɔ̃̀ũ mɛyukɑ́nkɑ́mmɛ̀ mmɛ ò í sĩ̀.

⁴²Kɛ̀ diciitirì mɑrì mɛ nhɑ̃nnɛ́ mɛɛ̀ yukɑ́nkɑ́mmɛ̀ miɛkɛ, kòo bɔri ndi yoo o tĩ́nnì kɛ dɔ́ kɛ́mpɛ́ì kɛ wɛ̃̀tɛ kɛ dɔ́ kɛ́nwũɔ̃, tikɔ̀ntì nti.

⁴³Ikuɔ́ nìùtìi ò wèńtɛ́, kòò sɔ̃́ ndiciitirì ɑ̃nnɛ́ o bɔri yoo o tĩ́nnì, kɛ wɛ̃̀tɛ kɛ dɔ́ kɛ́nwũɔ̃, kòò sɔ̃́ ndɛ̀ dò ntikɔ̀ntì,

⁴⁴dikɔ̀nnì ndi, ikuɔ́ nìùtìi ò nɑ̀kɛ́ kɛ tú ò sĩ̀mmu, tikɔ̀ntì tiì pĩ nho yuu.

⁴⁵Kɛ̀ tikɔ̀ntì pĩ nwè ndɑ́ɑ́tí tiyɑ̀ɑ̀tì tìì kɛ̃rí kɛ yóu kòò yùtìi yɛ̃kɛ́ kòo nkɑ̃nkɛ́ o nucìtì, kɛ pĩɛ̃kù kɛ tú: N sĩ̀mmu! N sĩ̀mmu!

⁴⁶Kɛ̀ dɛ kó mumɔmmú kpɑɑ́ koò bo yɛ̀ɛ̀ we miɛkɛ ò yó sĩ̀mmu, ò bɑ́ mbo Isidɑyɛɛribɛ kɑrì, ò mbo mɛkɛntímɛ̀.

⁴⁷Kɛ̀ tiyɑ̀ɑ̀tì bɛ̀ dùɔ̀kɛnɛ̀ tì tipecìtì yoo mupɑɑ̀konkperímù kɛ̀ tì pũ̀ũti.

⁴⁸Kɛ̀ dɛ̀ tu kuyɑ̀ɑ̀kù yoo kuyɑɑ̀dɑ́ndɑ́tínkù nku bɛ̀ dùɔ̀kɛnɛ̀ kù tipecìtì yoo mupɑɑ̀konkperímù, kɛ̀ dɛ̀ mɛ ntú kukɔ̃̀nkù nku yoo kunɛnkù mɑkù bɛ̀ dɔ̀ɔ̀nɛ̀ kù kukɔ̃̀nkù,

⁴⁹dɛɛ̀ pũ̀ũti kuyɑ̀ɑ̀kù ĩ́nkɛ̀ yoo kukɔ̃̀nkù yoo kuyɑɑ̀dɑ́ndɑ́tínkù yoo kunɛnkù kukɔ̃̀nkù kɔku ĩ́nkɛ̀, kɛ̀ dɛ̀ dò mmɛnɔ́ɔnnúɔ̀ nyoo dɛ̀ dɔ́ kɛ́ nwũɔ̃, bɛ̀ɛ dɛ̀ bɛnkɛ ikuɔ́ nìùtì.

⁵⁰Kòo wéntɛ́ dɛ kó kunɛnkù pũ̀ũti dɛ̀, kɛ́ kù dɔú nkumɑ́ɑ̀ kɛ̀ dɛ̀ dɔ̀ yɛwe yɛ̀yiekɛ̀.

⁵¹Diyiè yiénnì yiè kòò sɔ̃́ ndɛ̀ pɛ̃̀kɛ̀ dɛ kó kuyɑ̀ɑ̀kù ĩ́nkɛ̀ yoo kuyɑɑ̀dɑ́ndɑ́tínkù yoo kukɔ̃̀nkù yoo kunɛnkù mɑkù bɛ̀ dɔ̀ɔ̀nɛ̀ kù kukɔ̃̀nkù, bɑ́ kɛ̀ dɛ kó kunɛnkù tu kùù botí dɛ̀ í yóó deè, dɛ kó kunɛnkù sĩ̀ntɛmu.

⁵²Ikuɔ́ nìùtìi tuɔ ndɛ kó kuyɑ̀ɑ̀kù, yoo kuyɑɑ̀dɑ́ndɑ́tínkù kùù dùɔ̀kɛnɛ̀ tipecìtì, yoo mupɑɑ̀konkperímù, kɛ̀ dɛ̀ mɛ ntu kukɔ̃̀nkù kó kunɛnkù mɑkù nku, bɑ́ kɛ̀ kù tu kùù botí kɛ nɛ́ pũ̀ũti dɛ̀ í yóó deè bɛ̀ɛ kù tùɔ.

⁵³Kɛ̀ ikuɔ́ nìùtì mɛ nsɔ̃́ ndɛ̀ɛ̀ pũ̀ũti dɛ̀ í pɛ̃̀kɛ̀ kuyɑ̀ɑ̀kù yoo kuyɑɑdɑ́ndɑ́tínkù yoo kunɛnkù bɛ̀ dɔ̀ɔ̀nɛ̀ kù kukɔ̃̀nkù ku ĩ́nkɛ̀. Bɑ́ kɛ̀ kù tu kùù botí,

⁵⁴wèe duɔ́ nkɛ̀ bɛ̀ɛ kù ɔ̀útɛ́ kòo kù dɔú nku mɑ́ɑ̀ borɛ̀, kɛ̀ dɛ̀ dɔ̀ yɛwe yɛ̀yiekɛ̀.