Levítico 15:8-22

⁸Ar dule-boni-nikad dule-baidgi wii-agsale, dulegi-wii-aglesad e-mor enukoed, degi, obbaloed. Dulegi-wii-aglesad neg-mutikguedse swilidiksuli gudii guoed.

⁹Dule-boni-nikad moli-e-gangi-sigisale, we-moli-e-gan swilidiksuli gunonikoed.

¹⁰Ar doa-dule, dule-boni-nikad-urba-ibmar-sigisad-ebusale, dule-ibmar-ebusad neg-mutikguedse swilidiksuli gudii guoed. Ar dule-we-ibmar-sedoed e-mor enukoed, degi, obbaloed. Geb we-dule neg-mutikguedse swilidiksuli gudii guoed.

¹¹Ar dule-boni-nikad e-argan-enuksasuli dule-ebusale, we-dule-ebulesad e-mor enukoed, degi, obbaloed. Dule-ebulesad neg-mutikguedse swilidiksuli gudii guoed.

¹²Ar dule-boni-nikad ibmar-napsagi-sobaled-ebusale, we-ibmar-napsagi-sobaled marilegoed. Ar ibmar-urgogi-sobaled-ebusale, we-ibmar diigi nue enuklegoed.

¹³Dule-bonigwaled nugusdibe, san-uruked-igar-imakegala, ibagugle (7) edarboed. E-mor enukoed, diigi nue-oboed, geb deyobi, swilidik gunonikoed.

¹⁴” ’We-dule-nugusadi, ibabaabakgine (8), wagnuu-gwabo, sapur-nuu-gwabodibe, Bab-Jehováʼga Bab-Dummad-dulemar nugusdibe boo-ambikued-neg-yawagakse sedoed. Agi dule-irwa-Bab-Dummadse-goledga nuumar ukoed.

¹⁵Dule-irwa-Bab-Dummadse-goled nuu-gwagwen dule-isgued-ular ukoed, nuu-baiddi ogumakar Bab-Jehováʼga ukoed. Deyobi, dule-irwa-Bab-Dummadse-goled Bab-Jehová-asabin swilidik-imakega dule-bonigwaled-saoed.

¹⁶” ’Machered-gwensak e-san-burba misale, oboed. Geb neg-mutikguedse swilidiksuli gudii guoed.

¹⁷Ar ibi-morgindibe, ibi-ibmar-ukagindibe, dule-burba milesale, we-ibmar diigi nue enuklegoed. Geb neg-mutikguedse swilidiksuli guoed.

¹⁸Dule-gwensak omebo-gabisadgi, e-san-burba misale, ebobela nue obmaloed. Geb neg-mutikguedse swilidiksuli gudii gumaloed.’ ”

¹⁹Bab-Jehová, Moisésʼga, degi, Aarónʼga sogdebalid: “Israel-dulemarga be sunmakmar, ega be sogmar: ‘Ome-gwensak na e-igar-dakdiile, ibagugle (7) swilidiksuli gudii guoed. Ar doa-dule we-ome ebusale, we-dule mutikguedse swilidiksuli gudii guoed.

²⁰Ar we-ome ibugi megoe, bela we-ibmar swilidiksuli gunonikoed. Ar we-ome na igar-dakdiid-ibagangi ibugi sigbalodibe, amba deyobi, a-ibmar swilidiksuli gunonibaloed.

²¹Ar doa-dule we-ome-gabed-ebusale, we-dule e-mor enukoed, degi, nue obbaloed. Geb neg-mutikguedse swilidiksuli gudii guoed.

²²Ar doa-dule we-ome-ibmar-birgi-sigisad ebusale, e-mor enukoed, degi, nue obbaloed. Geb neg-mutikguedse swilidiksuli gudii guoed.