Lepin Padahk Audapan Kan 2:3-19

³Ei, peki loalokong oh peki erpit ni ngidingid.

⁴Rapahki uwen omw kak, rasehng me kin rapahki silper de takai kesempwal me rir kan.

⁵Ma ke pahn kapwaiada met, eri, ke pahn esehla dahkot masak KAUN-O oh ke pahn pweida ni omw pahn padahngki duwen Koht.

⁶Pwe KAUN-O iei ih me kin ketikihdo kupwurokong; iei ih me kin ketikihdo loalokong oh dehdehki.

⁷E kin ketin sewesewese oh sinsile aramas pwung oh mehlel kan.

⁸E kin ketin apwalih irail kan me kin apwalih mwahu meteikan, oh kin ketin sinsile irail kan me poadidiong.

⁹Ma ke rong ie, ke pahn esehla dahkot pwung, mehlel, oh pwung pahrek. Ke pahn esehla dahme ke pahn wia.

¹⁰Ke pahn loalokongla, oh omw loalokong pahn kansenamwahwihiukala.

¹¹Omw erpit oh dehdehki en wia poadoarepomw

¹²oh kasilehsang uhk wiewia suwed. E pahn pil kadohwanowei sang uhk aramas akan me kin wiahda kahpwal sang ni arail koasoi—

¹³soangen aramas me keselahr mour pwung pwe re en kousoan nan rotorot en dihp,

¹⁴aramas me kin rapahki ar nsenamwahu nan wiewia sapwung oh perenki tiahk suwed kan,

¹⁵iei ih aramas keseulikilik oh sohte emen kak likih.

¹⁶Ke pahn kak pitsang lih suwed me pahn song en kasongosongehkin uhk eh lokaia kansenamwahu kan,

¹⁷soangen lih me sohte kin loalopwoatohng eh pwoud oh manokehla inou sarawi kan me e wiadahr.

¹⁸Ma ke pahn kohla ni imwen soangen lih suwed menet, ke kekeidier nan ahl en kolahng mehla. Pwe kolahng wasao, rasehng kolahng nan wasahn me melahr akan.

¹⁹Aramas koaros me kin kolahng rehn liho sohte kin pwurodo. E sohte mwahn kin pwurodohng nan ahl en mour.