Leevi 4:15-30

¹⁵Izelayɛle ɠɛwolaiti ta yeeʋɛɛ nikɛ zinɛi unmaʋɛ, ti kɔdaaleʋe Ɠɔoɠɔ GALAGI ɠaazu.

¹⁶Zalaɠa ɠula nui nii gulɔi ziaai ma, naa ɠa li ga nikɛ zinɛi ma ɲamai ta GALA daaɠomi seɠe ʋɛlɛi wu,

¹⁷toɠa yeeɓeɠai lɔ ɲamai wu, é faza, ná zeizu ɠɛ lɔfela Ɠɔoɠɔ GALAGI ɠaazu, seɠe zuɠooza golai letemaʋɛ.

¹⁸Toɠa ɲamai ta ziɛ zalaɠa ɠulazuʋɛ ma minɛiti su, nii é Ɠɔoɠɔ GALAGI ɠaazu GALA daaɠomi seɠe ʋɛlɛi wu, ta toɠa ɲamai mɔtai ʋu ya gala zalaɠaiti kulazuʋɛ ɠɔɠɔaʋɛ, nii é GALA daaɠomi seɠe ʋɛlɛi laaʋɛ.

¹⁹Toɠa nikɛ zinɛi ma wulɔi kpein kula, é gala, zalaɠa ɠulazuʋɛ.

²⁰Toɠa nikɛ zinɛi naa ɠɛ, eɠɛʋelei nɔ koto gba nikɛ zinɛi ɠɛɛzu la. Toɠa kɛ ɠana nɔ. Zekana zalaɠa ɠula nui a koto gba vai ɠɛ la ti ʋɛ, suvaa ɠa yɛ ti ʋɛ.

²¹Toɠa li ga nikɛ zinɛi ti-ʋuuzuʋɛ ʋoluʋɛ, é gala, eɠɛʋelei é nikɛ zinɛ mɔungi ɠalani la. Koto gba zalaɠai ɠana bɛbɛi ná-faa zu.

²²«Siɛgi zu kundiɠii ta a kotoi ɠɛɛna la, é la gaaɠilini ma, é kɛ ná-GALAGI, Ɠɔoɠɔ GALAGI ná-devei ta laalɔɠɔma, é fai ta ɠɛ, nii maa la nɛɛni ga é ʋa ɠɛ, é ɓɔɠɔ ɠɛ ɠana ga sɔba nu,

²³a ná-kotoi ɠwɛɛna, nii é kɛai, toɠa boli zinɛi ɠula ga zalaɠai, nii nɛɛʋuzu la ba.

²⁴Toɠa yeeʋɛɛ boli zinɛi unmaʋɛ, é kɔdaaleʋe, gala zalaɠa loganiiti kɔdaaleʋezuʋɛ, Ɠɔoɠɔ GALAGI ɠaazu. Koto gba zalaɠai ʋe.

²⁵Zalaɠa ɠula nui ɠa koto gba zalaɠai ma ɲamai ta zeɠe ga yeeɓeɠai, é ta ziɛ gala zalaɠaiti kulazuʋɛ ma minɛiti ma, toɠa ɲamai mɔtai ʋu ya gala zalaɠaiti kulazuʋɛ ɠɔɠɔaʋɛ.

²⁶Toɠa ma wulɔi kpein gala zalaɠa ɠulazuʋɛ, eɠɛʋelei ziilɛi zalaɠai ma wulɔi la. Zekana zalaɠa ɠula nui a koto gba vai ɠɛ la kundiɠii naa ʋɛ, ná-kotoi vaa zu, suvaa ɠa yɛ bɛ.

²⁷«Ni nui ta ʋe, nuɓusɛiti saama, é kotoi ɠɛai, é la gaaɠilini ma, é naa ɠɛ Ɠɔoɠɔ GALAGI ná-tɔgiti ta laalɔɠɔma, é fai ta ɠɛ, nii maa la nɛɛni ga é ʋa ɠɛ ɲɛgɛlɛin, é ɓɔɠɔ ɠɛ ga sɔba nu ɠana,

²⁸a ná-kotoi ɠwɛɛna, é kɛai, toɠa boli zaai ɠula ga zalaɠai, nii nɛɛʋuzu la ba, kotoi vaa zu nii é kɛai.

²⁹Toɠa yeeʋɛɛ koto gba loganii unmaʋɛ, é kɔdaaleʋe, gala zalaɠa loganiiti kɔdaaleʋezuʋɛ.

³⁰Zalaɠa ɠula nui ɠa suai ma ɲamai ta zeɠe ga yeeɓeɠai, é ta ziɛ gala zalaɠaiti kulazuʋɛ ma minɛiti ma, é ɲamai mɔtai ʋu ya zalaɠa ɠulazuʋɛ ɠɔɠɔaʋɛ.